Kơxo lơ 4/3 ƀă kơxê hâi lơ 8/3, ngin ai mâ a kơpong hrik xo prêi a têa Krông Nô, kơpong tơkâ hluâ cheăm Quảng Phú, tơring Krông Nô, kong pơlê Dak Nông. A kơpong têa kroăng bu lối 2 km, ai 6 toăng plong  tuk hrik prêi kơmăi pơtôu pơ’lok pơ’lâ. A kơpong châ Vi ƀan kong pơlê Dak Nông ăm phêp ăm mâu khu tê mơdró hrik prêi, hên tíu tơhnah tơhnâp trâu a kĭng, pro têa kroăng chiâng tơ-ê.

Laga mâu plong tuk xuân ối hrik prêi hên hĭn. Môi ngế kuăn pơlê a thôn Phú Lợi, cheăm Quảng Phú hêng hôu tối ăm ‘nâi, tơdroăng hrik prêi tung to lâi hơnăm la ngiâ kố hiăng pro chiâng tơdroăng tơhnah tơhnâp tơnêi thăm rế ó, pro hía hên ƀăng deăng tơnêi pêt mơjiâng tơmeăm:

‘’Tối tơdjuôm a kố mê nếo 5h kơxo mê vâi hriăng hrik, vâi hrik troh 6 – 7h kơmăng nếo pơtê. Ai pin amê vâi ví pa kong môi iâ, tâng ôh tá ai mê vâi djâ klŏng hrik prêi a kĭng ‘noăng têa, mê cho tơhnâp tê. Mê, môi tiah ngoh hlo peăng tâ, nôkố gá lôi klŏng a mê, kô cho tung pơla 2 hâi tê mê tơnêi mê tơhnâp tâi tâng hlối. Khu râ kăn pơkuâ thế ti tăng troăng mơdât tơdroăng kố, tâng ối hrik tiah kố mê tơnêi pêi chiâk deăng tơhnâp tung têa kroăng tâi’’.

Pôa Nguyễn Chung Huy, Kăn pơkuâ ƀơrô rak ngăn loăng pơlái kong kế ƀă kong prâi tơring Krông Nô, kong pơlê Dak Nông tối ăm ‘nâi, tơdroăng tơhnah tơhnâp rơhê têa kroăng Krông Nô ối tung cheăm Quảng Phú rế hía rế ó a mâu tíu mâu khu tê mơdró chiâng phêp hrik xo prê. Tiô riân troh mơ’nui hơnăm 2022, ai 28 rơpŏng a cheăm Quảng Phú tro lŭp ‘na tơnêi pêt mơjiâng tơmeăm, plâi kâ xua tơhnah tơhnâp a mâu kơpong têa kroăng ăm 3 khu tê mơdró hrik xo prêi. Mâu rơpŏng hiăng pro đơn pâ thế pơtroh Vi ƀan cheăm Quảng Phú ƀă nôkố khu râ kăn pơkuâ dế pêi cheăng ối tung dế vâ ăm khu tê mơdró môi tuăn chêl ăm mâu rơpŏng.

Pôa Nguyễn Chung Huy tối, tơdroăng hrik xo prêi nôkố cho thâ, tơdroăng tơhnah tơhnâp chiâng săm tối, cho ôh tá tơniăn. Pôa Huy xuân mơnhên, mâu kơpong têa kroăng châ Viƀan kong pơlê Dak Nông ăm phêp hrik ăm mâu khu tê mơdró hrik prêi drêng apoăng nah ôh tá tơhnah tơhnâp. Tiô pơkâ dêi khu tê mơdró châ hrik prêi kơtăn kĭng rơhê têa 20 met, laga ôh tá tơniăn a ôh tá pơkâ nhên kơtăn 20m kĭng rơhê têa kroăng drêng apoăng ăm phêp lơ drêng lâi.

Chiâng ai tơdroăng tơhnah tơhnâp ó mê mâu plong tuk hrik prêi trâu tâ nếo a tíu kĭng rơhê têa kroăng ton nah. Nôkố, mâu tíu tơhnah tơhnâp châ chât met, plong tuk mơni dế hrik trâu a tíu kĭng rơhê têa kroăng hdrối nah. Ƀă kố cho tơdroăng luât pơkâ ăm mâu khu cheăng, kơvâ cheăng ƀă Vi ƀan kong pơlê Dak Nông séa ngăn vâ ‘mâi rơnêu:

‘’Tíu ăm mơ-éa phêp chiâng hrik xo prêi mơdât tíu apoăng, tíu mơ’nui, pa kĭng mê tiô tơdroăng tơkêa bro pơkâ hrik xo prêi kơtăn kĭng rơhê têa kroăng 20m. Tơdroăng tơkêa bro hrik xo prêi cho môi tiah mê ƀă rơhê têa kroăng alâi mê cho tơdroăng, tiô rêm roh, dế tro kreăng a tíu kố. Tơring xuân hên xôh pâ thế séa ngăn môi tiah lâi, troăng tơmiât pêi cho drêng mơnhên têa kroăng mê ăm mơ-éa phêp, tâng drêng hiăng tơhnah tơhnâp mê kơbố mơnhên rơhê têa kroăng a lâi cho môi tơdroăng thế tiô luât’’.

Tơdrêng amê, ƀă tơdroăng tơhnah tơhnâp ó, khế 11/2022, Vi ƀan tơring Krông Nô hiăng ai mơ-éa pơkâ Vi ƀan kong pơlê Dak Nông pơtân pơtê tơdroăng hrik xo prêi a mâu tíu tơhnah tơhnâp a cheăm Quảng Phú. Laga, tơring tơkôm kong pơlê sap ing mê nah troh nôkố, tơdrêng amê tơhnah tơhnâp rơhê têa kroăng rêm hâi:

‘’Ƀă tơdroăng tơhnah tơhnâp drô têa kroăng Krông Nô mê tơring xuân hiăng ai mâu tơdroăng pơkâ thế mâu khu hrik xo prêi thâ mơjiâng ƀă kêi đeăng troăng vâ rơnêu, pro tơniăn lĕm tơnêi tíu, kong prâi tung tơdroăng hrik xo prêi vâ pơtroh ăm mâu kơ koan ai hnoăng séa ngăn, mơnhên ƀă môi tuăn pêi pro. Pơkâ thế Khu pơkuâ loăng pơlái kong kế ƀă kong prâi séa ngăn, vêh mơnhên tơdroăng tơhnah tơhnâp kĭng rơhê têa kroăng. Pơkâ pơtê pơtân hrik xo prêi tiô pơkâ a Pơkâ 23 dêi Chin phuh.

Tối cho pơtân mơdât vâ pro tơniăn lĕm kong prâi, klêi kơ’nâi pro tơniăn lĕm mê chiâng vâ hrik xo prêi. Tơring hiăng pâ thế ối tơkôm kong pơlê mơnhên môi tiah lâi, troh kơlo ki lâi tê’’.

A têa kroăng Krông Nô a chê cheăm Quảng Phú, tơring Krông Nô, Vi ƀan kong pơlê Dak Nông ăm 4 hlá mơ-éa phêp hrik xo prêi ăm 4 khu tê mơdró mê cho: Kŏng ti pêi cheăng tiô rơnó môi khu hrik xo prêi Phước Lộc, Khu tê mơdró krê Văn Hồng, Kŏng ti pêi cheăng tiô rơnó môi khu hrik xo prêi Quảng Phú ƀă Kŏng ti pêi cheăng tiô rơnó môi khu Hải Khánh Ngân.

Tung mê, Kŏng ti pêi cheăng tiô rơnó môi khu Hải Khánh Ngân hiăng pơtê hrik xo prêi sap ing khế 1/2022. 3 khu tê mơdró ki ê ối hrik xo prêi ối ăm phêp hrik xo prêi tâi tâng ivá hrik xo prêi dâng 68.000 met khô̆i/hơnăm tung tâi tâng thông têa kroăng dâng 6,4 km.

Ƀă tơdroăng tơhnah tơhnâp rế hía rế ó a cheăm Quảng Phú, tơdroăng pơtê pơtân hrik xo prêi vâ pêi pro mâu troăng rak vế rơhê kĭng têa kroăng, pro tơniăn lĕm kong prâi tiô pơkâ 23 dêi Chin phuh ƀă tiô pơkâ dêi tơring Krông Nô cho tơxâng. Vi ƀan kong pơlê Dak Nông kal rĕng ai pơkâ, ví tơdroăng tơhnah tơhnâp pơtối, ‘nhê têa kroăng Krông Nô xuân môi tiah pro hía tơnêi pêt mơjiâng tơmeăm dêi kuăn pơlê.