Kơxo lơ 27/1, tơkéa vâ tối cho hâi má 6 Têt Lo hơnăm nếo, a Kơpong xối tơbâ tơnêi têa Đền Hai Bà Trưng, tơring Mê Linh, pơlê kong kân Hà Nội, jâ Võ Thị Ánh Xuân, Kăn xiâm hnê ngăn tơnêi têa ki pơtân veăng a Leh tơbâ 1983 hơnăm hâi pơxiâm tơplâ Hai Bà Trưng ƀă Pơxiâm po Mơdĭng Đền Hai Bà Trưng rơnó Hơngui Quý Mão 2023. Hdrối vâ veăng a leh tơbâ, jâ Võ Thị Ánh Xuân ƀă mâu kăn chôu nhăng, tơbâ, mơnê Hai Bà Trưng, péa ngế kơdrâi khên tơnôu dêi hdroâng mơngế.

Tơpui a rôh leh, jâ Võ Thị Ánh Xuân vêh hơ’muăn tối rôh pơxiâm xông tơplâ Hai Bà Trưng, tối nhên, rôh pơxiâm tơplâ Hai Bà Trưng ai pơxúa kân khât, hiăng ‘măn chôu ăm hdroâng mơngế pin môi to kế tơmeăm ki kơnía ‘na hiâm mơno; cho ƀai hriâm “kuăn pơlê cho xiâm”, mơdêk ivá rơdêi tơrŭm tâi tâng hdroâng mơngế, mơdêk ivá khên tơnôu, hiâm mơno pơkuâ dêi kuăn pơlê tối tơdjuôm ƀă vâi kơdrâi Việt Nam tối krê tung plâ ton mơjiâng ƀă rak vế tơnêi têa dêi hdroâng mơngế.