Môi tiah hmâ, a rơnó tô khăng khoăng môi tiah nôkố, rơxế kân pơto kơtếo tot pơtăng tiô troăng tung plông a Hngêi kơmăi sik An Khê, lơ Hngêi kơmăi sik Ayun Pa, kong pơlê Gia Lai. Laga phá tơ-ê ƀă rêm hơnăm, hơnăm kố mâu rơxế pơto kơtếo drêng mot a mâu hngêi kơmăi kố pơrá châ tot tiô troăng lĕm.

Mâu ngế vê rơxế hiăng plĕng ‘măn kơtếo lĕm tung kơthung rơxế. Hên rơxế kân châ pơto tro tiô tơdroăng mơjiâng pro, rak tơniăn troăng klông ƀă rơxế kơtâu a mâu troăng kân ai kơpong pêt kơtếo dêi mâu hngêi kơmăi uâ mơdiê kơtếo pro sik.

Pôa Lương Tuấn Thông - Kăn phŏ pơkuâ hnê ‘na kih thuât pêt mơjiâng Hngêi kơmăi sik Ayun Pa tối ăm ‘nâi, hơnăm kố tơdroăng mơdât rơxế pơto lối hngăm châ pêi pro krá tơniăn ing tơdroăng kĭ ƀă séa ngăn troh tơdroăng séa ngăn drô troăng kân. Vâ kum rơtế mâu khu cheăng, peăng hngêi kơmăi sik hiăng ai troăng hơlâ tơ’nôm kơxô̆ liăn rơxế pơto ƀă mâu rơxế pơto tro ki pơkâ hngăm dêi rơxế.

“Nôkố kŏng ti troăng hơlâ pêi pro tiô pơkâ dêi luât, hiăng pơtâng ƀă mâu rơxế pơto vâ tơdroăng pơto châ tơniăn vâ kum ăm tơdroăng pêt mơjiâng dêi hngêi kơmăi. Kŏng ti xuân rơtế ƀă rơxế pơto, ƀă mâu rơxế pơto 17 tâ̆n (tro ki pơkâ pơto hngăm rơxế) mê kŏng ti kô tơ’nôm 8% vâ rak tơniăn pêi lo liăn ăm rơxế pơto ăm vâi krâ kuăn pơlê pêi chiâk deăng. Ƀă mâu rơxế pơto lối hngăm tiô pơkâ mê kŏng ti ôh tá rôe ƀă pro mơ-éa’’.

Tiô ngế vê rơxế Nguyễn Đình Khang, ngế pêi cheăng hiăng ton hơnăm pơto kơtếo hên hơnăm ăm mâu hngêi kơmăi sik a kong pơlê Gia Lai, hơnăm kố hên ngế vế rơxế rah xo pơto kơtếo mơdêk roh, ôh tá mơhnŏng pơto xôi pơkâ xua kơlo pơxâu phak mâu tơdroăng pro xôi kố cho hên.

“Drêng mot a poăng rơnó kơtếo, khu cheăng pơtâng tối ‘na tơdroăng pơto lối hngăm tiô pơkâ, ngế vê rơxế xuân tơkâ pêi tro tiô tơdroăng pơtâng dêi khu cheăng’’.

Trung tă Lê Công Ngọc, Đô̆i trương Đô̆i Kan sat rak tơniăn troăng klông kơxô̆ 1, Ƀơrô Kan sát rak tơniăn troăng klông, Kŏng an kong pơlê Gia Lai tối ăm ‘nâi: Sap apoăng rơnó mơdiê kơtếo troh nôkố, khu hiăng pơxâu phâk lối 100 roh pro xôi. Nôkố mâu kơpong pêt kơtếo pro sik a Gia Lai xuân u ối tơmeăm tâk troh hrĭng rơpâu tâ̆n kơtếo a chiâk, xua mê khu cheăng xuân pơtối pêi pro troăng mơdât ôh tá ăm pơto lối hngăm tiô pơkâ.

“A rơnó kơtếo 2022 – 2023, Ƀơrô Kan sát rak tơniăn troăng klông, cho khu Đô̆i 1, pơkuâ troăng kân tơnêi têa 25 hiăng ăm kĭ tơkêa ƀă 157 rơxế veăng pơto kơtếo pro sik a hngêi kơmăi Ayun Pa. Ƀơrô Kan sát rak tơniăn troăng klông hiăng tơrŭm ƀă 5 tơring ai kơpong pêt, rêm măng tĭng ngin tơrŭm tơdrêng ƀă mâu tơring vâ tơleăng tơdroăng pơto tơmeăm lối hngăm tiô pơkâ’’.

Vâ mơdêk tơdroăng séa ngăn mâu rơxế ai pơto lối hngăm tiô pơkâ, Kơ koan xiâm pơkuâ Troăng kân Việt Nam hiăng pơkâ mâu Khu pơkuâ troăng klông ƀă rơxế kơtâu, mâu Kơ koan xiâm pơkuâ troăng kân hnê mơhno Khu séa ngăn ôh tá xúa kơmăi thâu xup um vâ thâu xup um, ing mê tơkŭm pơxâu phâk ‘’kơ’nâi’’ mâu rơxế pro xôi. Chin phuh xuân hiăng tơbleăng Pơkâ 123, tung mê, mơdêk pơxâu phâk hên ƀă tơdroăng pro xôi pơto lối hngăm tiô pơkâ.

Đăi tă Đỗ Thanh Bình, Kăn phŏ Kơ koan xiâm Kan sát rak tơniăn troăng klông tối, vâ pơxâu phâk kơtăng tơdroăng kố kal mơnhên hnoăng dêi kơ koan pơkuâ rak tơniăn rơxế kơtâu thế pêi kơtăng tơdroăng kố:

“Ngin kô mơhnhôk tâi tâng khu cheăng ƀă xing xoăng hnoăng cheăng nhên, rêm tíu cheăng, môi tiah: Kơ koan xiâm pơkuâ Kan sát rak tơniăn troăng klông pôu râng hnoăng cheăng troh alâi, ƀơrô kan sat rak tơniăn troăng klông ƀă rơxế kơtâu pôu râng hnoăng troh alâi, kăn pơkuâ kŏng an tơring pôu râng hnoăng troh alâi ƀă tơdroăng tơrŭm dêi kŏng an cheăm tung séa ngăn apoăng vâ mơnhên mâu rơxế, mâu tíu chiâ xo tơmeăm, mâu tơdroăng pơto lối hngăm ƀă pơxâu phâk kơtăng.

Khu xiâm pơkuâ Kŏng an hiăng pêi cheăng ƀă Khu xiâm pơkuâ troăng prôk ƀă rơxế kơtâu vâ mơnhên nhên hnoăng tung pơkuâ rak tơniăn kih thuât, rơxế, ôh tá ăm mâu rơxế kĭ ƀă séa ngăn tơ-ê dêi pó, kơ’nâi mê pêi cheăng mê chiâng kơthung ôh tá xê ki gá xếo ƀă ôh tá ai kơbố pôu râng hnoăng cheăng ‘na tơdroăng ki xiâm dêi tơdroăng pơto lôi hngăm tiô pơkâ cho pro tơdjêp chiâng kơthung’’.

Vâ thăm pêi pro tơdroăng mơdât rơxế pơto lối hngăm tung la ngiâ, Khu xiâm pơkuâ troăng prôk ƀă rơxế kơtâu hiăng tơbleăng mơ-éa pơtroh mâu kơ koan, tíu cheăng tung kơvâ pêi pro pơkâ séa ngăn, mơdât tơdroăng pơto lối hngăm tiô pơkâ rơxế tung lâp tơnêi têa.