Tung mâu hâi hdrối kố nah, tâng tối ‘na tơnêi tơdro têi 5 đô̆ richter a kơhâi dế lơ 28/7 pro tơdro têi. Kuăn pơlê hiăng hơ’muăn tối mâu tơdroăng ki tơná tâ, hlối tối mâu tơdroăng ki tơná hlo  ƀă mâ. Nâ Y Phiếu, kuăn pơlê Rô Xia, cheăm Đăk Tăng, tối tiah kố:

“A kơtâu lo pá gong hdrối klêi mê a lăm tăng dêi kuăn. Kuăn pơlê a kố apoăng xuân xâu há xua tơnêi tơdro têi ‘nâng, la klêi kơ’nâi mê rêm ngế mơhnhôk hơlêm dêi rơpó pôi tá xâu, tối dêi rơpó, klêi mê, kuăn pơlê vêh tơniăn tuăn môi tiah hdrối’’.

Klêi ai tơnêi tơdro, tung mâu hâi hdrối kố nah, mâu kăn, kuăn pơlê mâu cheăm dêi tơring Kon Plông, kong pơlê Kon Tum hiăng thế mâu kăn ƀô̆ troh a tơrêm to thôn, pơlê ngăn vâ ’nâi mâu tơdroăng, hlối pơchân kuăn pơlê hbrâ rơnáu tâng lơ pơtối ai tơdroăng tơnêi tơtro. Pôa Nguyễn Văn Bảy - Kăn hnê ngăn Vi ƀan kuăn pơlê cheăm Đăk Tăng ăm ‘nâi, kơnôm pơtâng tối teăm tơdrêng mê kuăn pơlê a 11 to pơlê tung cheăm teăm ví xía vâ tơdroăng tơmiât tơnêi tơdro mê:

 “Klêi ai tơnêi tơdro têi a hâi lơ 28/7, ing tơdroăng pơkuâ hnê djâ dêi Vi ƀan hnê ngăn kuăn pơlê tơring, cheăm mơjiâng mâu tôh mơhnhôk mâu ngế ki rơkê hmâ hlê plĕng iâ tung tơdroăng hnê tối, mơhnhôk ƀă lăm ngăn tối mâu tơdroăng a cheăm. Pakĭng mê, hlối pơlĕm hiâm tuăn kuăn pơlê, pơtối hnê, tối kuăn pơlê hmiân tuăn pêi chiâk deăng’’.

Hbrâ ví ƀă tơnêi tơdro, tung pơla hdrối kố nah Viện Vật lý Điạ cầu hiăng tơrŭm ƀă mâu kăn dêi tơring Kon Plông tơkŭm po hên rôh hriâm vâ hlê tơdroăng ki hbrâ rơnáu ăm kuăn pơlê. Kơnôm ing mê hên kuăn pơlê a mâu cheăm kơpong xiâm tơnêi tơdro, môi tiah: Đăk Tăng, Đăk Nên, Đăk Ring, Măng Buk, Ngọc Tem... xuân hlê ƀă hbrâ ví tơnêi tơdro. O Nguyễn Bỉnh Khiêm a thôn Vi Xây, cheăm Đăk Tăng, ăm ‘nâi mâu tơdroăng kal tung tơdroăng ai tơnêi rơlâm tơhnâp vâ kring vế tơná ƀă kuăn pơlê.

“Drêng á lăm hriâm á hiăng châ thái cô a hngêi trung ƀă mâu khu pêi hnoăng cheăng pơlê pơla a cheăm, thôn hnê tối ‘na tơdroăng hbrâ ví drêng tơnêi tơdro tơhnâp. Drêng trâm tơdroăng tơnêi tơdro tơhnâp á  mot tung kơdâm kơƀăng lơ pá kơdâm xoăng vâ ví mâu tơmeăm lơ kuâ hngêi kô tơhnâp vâ kring vế tơná’’.

‘Na o Y Vỹ (xuân ối a cheăm Đăk Tăng) mê ăm ‘nâi tơdroăng pêi pro ai pơxúa dêi tơná, vâ gum kuăn pơlê ‘nâi tơdroăng hbrâ ví drêng tơnêi tơdro tơhnâp.

“Xuân ai ngế ‘nâi tơdroăng pêi pro ti mê mâu kăn krâ xuân ai ngế ‘nâi la xuân ai há ngế ôh tá ‘nâi. Ngin tối pơchân ăm vâi krâ ‘nâi vâ hmuâ pá kơdâm kơƀăng tâng ôh kơtâu lo ối a tíu ki phuâng ôh tá ai ki klâi vâ  tơná pôi tá tro rong’’.

Sap khế 4/2021 troh nôkố, tung tơring Kon Plông, kong pơlê Kon Tum hiăng hiăng ai dâng 800 roh tơnêi tơhnâp ƀă tiô ăm ‘nâi dêi Viện Vật lý Địa cầu kố cho rôh tơnêi tơhnâp xua tơdroăng hdoăng têa a long hngêi kơmăi on tơhrik pro. Tung 2 hâi hdrối kố nah, hlo tơdroăng tơnêi tơdro tơhnâp ó, têi má môi riân sap ing nah troh nôkố, pôa Lê Đức Tín, Kăn phŏ hnê ngăn Vi ƀan kuăn pơlê tơring Kon Plông ăm ‘nâi troăng vâ pêi dêi tơring cho hbrâ rơnáu ví pôi tá ăm kuăn pơlê xâu tung tơdroăng hbrâ ví tơnêi tơdro:

 “Ngin pơtối ngăn mâu hlá mơ-éa chêh dêi Viện Vật lý Địa cầu  ai chêh tŭm tâi tâng mâu tơdroăng kal vâ hnê, tơbleăng tơ’nôm ăm kuăn pơlê ‘nâi vâ hbrâ ví drêng ai tơnêi tơdro. Hnê mơho mâu cheăm, ăm cheăm hnê tối kuăn pơlê, hnê ăm tơrêm to thôn, pơlê, mâu rơpŏng kuăn pơlê vâ ‘nâi ƀă rơkê hbrâ ví tro tâ. Tơkuăm hnê pơtâp troh tơrêm kơpong tíu tơnêi tơdro têi klêi mê tơbleăng hnê a mâu thôn ki ê tung tơring. Ing mê, gum ăm Khu hnê mơhno cheăng a mâu cheăm hlê plĕng drêng ai tơnêi tơdro têi’’.

Tơdroăng tối ing Tíu xiâm tơbleăng ‘na tơnêi tơdro ƀă tơbleăng hdrối ‘na têa rơlâu kân - Viện Vật Lý Địa cầu ăm hlo, tung 2 hâi lơ 28 ƀă 29/7 ai 46 hdroh tơnêi tơdro ƀă ki xiâm tơnêi tơdro a kơpong tơring Kon Plông, kong pơlê Kon Tum. Ki khât ăm hlo, pa kĭng tơnêi tơdro tơhnâp têi 5 đô̆ richter a kơhâi dế lơ 28/7 pro tơnêi tơdro lâp lu mê mâu rôh tơnêi tơdro ki u ối nếo kuăn pơlê ôh tá ‘nâi ki tơdro têi ga ti lâi. Tơdroăng ki tơnêi tơdro pro mê xuân hâi hlo lŭp hên ‘na tơmeăm.

Mâu kăn ƀă kuăn pơlê a kơpong xiâm tơnêi tơdro têi a tơring Kon Plông, kong pơlê Kon Tum dế pơtối hbrâ rơnáu ƀă tơdroăng ki pơtối mâu tơdroăng ki ê dêi tơnêi  tơdro.