Tơbâ 50 hơnăm “Ƀlêi trâng prếo vêh” (3/1973 - 3/2023) dêi mâu lêng kăch măng tro khu xâ rup kroăng, kơxo lơ 23/3, pơlê kong kân Hà Nội tơkŭm po kân krip rôh trâm mâ mâu lêng kăch măng tro khu xa rup kroăng nôkố dế rêh ối a pơlê kong kân. A rôh trâm mâ, mâu lêng kăch măng hiăng hơ’muăn ‘na mâu tơdroăng ki hiâm mơno khên tơnôu tơdrăng, mơ-eăm châi heăng tung mâu tơdroăng ki tro xiê̆n pâm, pâng kơđin a châ, siê chêh a châ ƀă hên ki ê tá troh mâu tơdroăng ki pêi pro ‘nêk mơ’nêa ‘na hiâm tuăn ƀă tơdroăng pêi pro dêi khu xâ.

Mơ-eăm tơkâ luâ tung mâu tơdroăng ki châi heăng mê ƀă hiâm mơno kăch măng, mâu lêng tung hngêi phâk xuân ối cheăng ‘na Đảng, kăn pơkuâ mâu khu tơrŭm rêm râ, khu tơrŭm hên rôh tong lo ing hngêi kroăng phâk, tơplâ pro khu xâ xâu.

Tơpui a rôh trâm mâ, Kăn phŏ pơkuâ hnê ngăn Đảng Pơlê kong kân Hà Nội Nguyễn Thị Tuyến, rơkâu ivá troh mâu lêng ki tro khu xâ rup kroăng, tơdrêng a mê hlối tối hâk tơngăm hiâm mơno dêi ngế kŏng san, ivá dêi ngế lêng kăch măng. Pơlê kong kân Hà Nội đi đo chôu pâ, mơnê mâu hnoăng cheăng pleăng kân kĭn dêi mâu lêng kăch măng ki tro khu xâ rup kroăng xua tơdroăng cheăng tơplâ, tơleăng lĕm hdroâng mơngế tung tơdroăng mơjiâng ƀă mơnhông pơlê kong xiâm.