A Hngêi trung Đăi hok Tây Nguyên nếo tơkŭm po Tơdroăng hnê mơhno, rah xo hok tro, hnê cheăng pêi hơnăm 2023, ƀă veăng amê ai lối 2.000 ngế hok tro trung hok phôh thong. Hơnăm kố, hên hngêi trung Đăi hok, kao đăng ai tơdroăng pơ’lêh troăng rah xo hok tro xua mê hok tro troh hâi leh tơbleăng ti tăng plĕng tơdroăng cheăng kơdrâm hên tâ mâu hơnăm hdrối.

Khu pơkuâ hngêi trung ƀă giảng viên mâu hngêi trung klâ mâu khu kơvâ cheăng: khoa hok pơlê pơla, khoa hok tư̆ nhiên, cheăng kâ, kih thuât ƀă hía hé, vâ hnê mơhno ăm hok tro rêm kơvâ cheăng, troăng hriâm, hngêi trung hnê mơjiâng, roh ki tơ’lêi hlâu tăng cheăng pêi klêi kơ’nâi lo mơgêi hngêi trung ƀă hía hé.

Ki nhên tâ, rêm hngêi trung đăi hok, kao đăng pơrá ai kơ-êng tối ăm krê, hbrâ kơ-êng tối ăm, tiâ tơdroăng rơhêng vâ ‘nâi plĕng dêi hok tro ƀă hnê mơhno rak xo kơvâ cheăng drêng kĭ đăi hok, kao đăng hơnăm 2023.