Pôa K’Ních, kăn pơkuâ ƀuôn Dur1, cheăm Dur Kmăl, tơring Krông Ana, kong pơlê Dak Lak, rơrêk tung hiâm mơno ƀă hâk tơngăm drêng châ trâm pôa Nguyễn Phú Trọng - Kăn xiâm pơkuâ hnê ngăn Đảng a Hâi xah hêi ro rŭm môi tuăn mâu hdroâng kuăn ngo hơnăm 2018. Pôa tâ tơdroăng ki châ achê, veăng kum dêi kăn xiâm pơkuâ dêi Đảng ƀă kuăn pơlê.

‘’Châ tơmâng ƀă trâm mâ tơdrêng hâi ki mê nah, á hlo pôa cho môi ngế ki rêm rơpiât, cho tơdroăng ki á pâ nhuô̆m. Pôa đi đo pơchân tâi tâng kăn ƀô̆ ƀă kuăn pơlê thế rŭm môi tuăn krá tơniăn, ‘nâi tah lôi tơdroăng ki ôh tá lĕm tro vâ rơtế dêi pó mơnhông tơtêk. Ing mê, troh nôkố xuân hiăng 5 hơnăm hiăng hluâ, ing mâu rơkong pơchân dêi pôa mê kuăn pơlê pêi pro cho lĕm tro ‘nâng’’.

Hâk tơngăm nah hiăng châ 2 xôh châ trâm pôa Nguyễn Phú Trọng, Kăn xiâm pơkuâ hnê ngăn Đảng tung mâu hneăng hôp ‘na khôi túa lĕm, ngế chêh văn Niê Thanh Mai, Kăn hnê ngăn Hô̆i Văn hok Ngê̆ thuât Dak Lak pâ rêm rơkong xông tơpui dêi kăn xiâm pơkuâ hnê ngăn Đảng ‘na rŭm môi tuăn hdroâng mơngế. Jâ Niê Thanh Mai tối, mâu hnê mơhno dêi Kăn xiâm pơkuâ hnê ngăn Đảng a Hneăng hôp lâp tơnêi têa ‘na khôi túa lĕm hơnăm 2021 hiăng châ kong pơlê Dak Lak pêi pro inhên.

“Rŭm môi tuăn hdroâng mơngế tung văn hok ngê̆ thuât ƀă ing văn hok ngê̆ thuât mê pin xuân hiăng mơjiâng mâu tơdroăng pêi, mâu pơkâ tung ƀai chêh dêi tâi tâng mâu văn ngê̆ sih; pro tiah lâi hlo hnoăng ƀă tơdroăng rŭm môi tuăn dêi mâu hdroâng mơngế ƀă ki má môi dêi tơdroăng rŭm môi tuăn, tơdroăng ki veăng dêi hên khu ing kŏng an, mô đô̆i, droh rơtăm, vâi kơdrâi ƀă hía hé. Klêi kơ’nâi hneăng hôp khôi túa lĕm lâp tơnêi têa ing pơkuâ dêi pôa Nguyễn Phú Trọng, Kăn xiâm pơkuâ hnê ngăn Đảng mê mơni hiâm mơno ƀă tơdroăng rŭm môi tuăn hdroâng mơngế kô ối rơdâ tâ nếo ƀă kô châ xông ing khôi túa lĕm, văn hok ngê̆ thuât’’.

Git tung rêm kơtâ um châ xup tơdjuôm ƀă pôa Nguyễn Phú Trọng, Kăn xiâm pơkuâ hnê ngăn Đảng, jâ H’Yam Ƀuôn Krông, ối a ƀuôn Tơng Jú, cheăm Ea Kao, pơlê kong kơdrâm Ƀuôn Ma Thuột, kong pơlê Dak Lak khéa pâ mơjo, jâ hâk tơngăm 2 xôh châ trâm Kăn xiâm pơkuâ hnê ngăn Đảng. Ki rơhêng vâ tối, hơnăm 2011, jâ ƀă mâu nâ ối ing kơpeăng kŏng tơná teăn ếo Rơđế lĕm mơnâ mâ ngăn diâp ăm Kăn xiâm pơkuâ hnê ngăn Đảng drêng pôa lăm pôu pơlê:

“Drêng tâng tối mê pơxiâm bró kơxái prế teăng ếo vâ châ diâp ăm Pôa, pơtroh tơdroăng tuăn pâ, tơdroăng ki nhuô̆m dêi tơná ƀă Pôa. Roh má péa trâm Pôa cho drêng á veăng Hneăng hôp kheăn kơdeăn mâu ngế ki kơhnâ rơkê, tuăn ngôa rơkê, ngế tê mơdró ki rơkê ƀă ngế ki kuăn pơlê hdroâng kuăn ngo loi tơngah a Hà Nội. Á tâ hâk git mâu rơkong Pôa hnê pơchân ƀă kuăn pơlê hdroâng kuăn ngo tối krê ƀă lâp tơnêi têa tối tơdjuôm, thế mơjiâng khu rŭm môi tuăn, ai tơrŭm môi tuăn mê nếo châ tơƀrê’’.

Pôa Hà Ngọc Đào, kăn pơkuâ Khu pơkuâ Hnê hriâm ƀă Hnê mơjiâng tuăn ngôa rơkê Dak Lak tối ăm ‘nâi, hơnăm 2011, drêng pôa Nguyễn Phú Trọng, Kăn xiâm pơkuâ hnê ngăn Đảng pơxiâm pôu râng hnoăng pơkuâ Đảng, xuân cho drêng hbrâ ăm Tơdroăng tơkêa bro pơhlêh nếo ki xiâm, tâi tâng hnê hriâm, hnê mơjiâng tuăn ngôa rơkê. Ƀă hên hnê mơhno trâu achê dêi Kăn xiâm pơkuâ hnê ngăn Đảng, troh nôkố, klêi kơ’nâi 10 hơnăm pêi pro Pơkâ 29-NQ-TW, hnê hriâm – hnê mơjiâng tuăn ngôa rơkê tơnêi têa pin hiăng ai mâu tơdroăng ki mơnhông ó rơdêi ƀă châ tơƀrê hên kal khât, ki rơhêng vâ tối tung kơpong hdroâng kuăn ngo, kơpong tơkăng kong, têa kơxĭ rơlố. Vâ tơxâng ƀă tơdroăng loi tơngah dêi Kăn xiâm pơkuâ hnê ngăn Đảng ăm hnê hriâm, pôa Hà Ngọc Đào tối:

“Pôa Trọng kơtê hiâm cho môi tơdroăng ki tro lŭp kân ƀă tơnêi têa. Krê á tâ rơrêk tung hiâm mơno, tơdroăng ki khéa mơjo kố cho tá kâi tối. Cho đảng viên á loi tơngah a Khu xiâm pơkuâ Đảng kô djâ troăng prôk tơkâ hluâ pá puât kố. Nôkố thế pro tơdroăng ki châi khéa chiâng tơdroăng ki mơ-eăm ó rơdêi tung pêi cheăng. Kuăn pơlê loi tơngah a Đảng, rŭm môi tuăn tâi tâng kuăn pơlê môi tiah môi, rŭm môi tuăn tâi tâng hdroâng mơngế, rŭm môi tuăn tung Đảng, rŭm môi tuăn tung kuăn pơlê tiô tơdroăng pói vâ drêng pôa Trọng dế ối rêh nah’’.

Pâ rơkong pơchân dêi Kăn xiâm pơkuâ hnê ngăn Đảng tung Hâi xah hêi ro Rŭm môi tuăn tâi tâng hdroâng mơngế a Dak Lak hơnăm 2018, pôa Y Giang Gry Niê Knơng, Kăn hnê ngăn Vi ƀan Măt trâ̆n Tơnêi têa Việt Nam kong pơlê Dak Lak tối:

“Pôa Nguyễn Phú Trọng - Kăn xiâm pơkuâ hnê ngăn Đảng đi đo ngăn tơdroăng tơrŭm môi tuăn tâi tâng hdroâng mơngế cho tơdroăng ki kal, cho xiâm kối ivá ó rơdêi dêi tơnêi têa. Pêi pro rơkong tơpui tối dêi Kăn xiâm pơkuâ hnê ngăn Đảng, Vi ƀan Măt trâ̆n Tơnêi têa Việt Nam kong pơlê Dak Lak pơtối pêi pro lĕm tro tơdroăng tơkŭm, tơrŭm môi tuăn mâu râ kuăn pơlê, kuăn pơlê mâu hdroâng kuăn ngo, tơdroăng tiô khôp, tơdjuôm ivá kum pơlê pơla, mơjiâng pơlê xiâm kro mơdrŏng lĕm, rơkê, pêng păm khôi túa lĕm’’.