Pêi pro tơdroăng tơ’noăng tơdjuôm ivá mơjiâng thôn pơlê nếo, tơdjuôm ivá kum mơngế kơtiê, 5 hơnăm hiăng hluâ, khu lêng kong pơlê Dak Lak hiăng mơhnhôk lối 2.300 roh kăn ƀô̆, mâu lêng ƀă vâ chê 20.000 hâi pêi cheăng kum kuăn pơlê kơpong pá puât. Mơhnhôk lối 1 rơtal liăn mơjiâng hngêi ăm mâu rơpŏng ai hnoăng tơnêi têa, rôe hrê mơnăn păn, rơxế tung tung pêi cheăng ăm mâu rơpŏng kơtiê.

Tung hneăng pơreăng COVID-19, khu lêng kong pơlê hiăng tơrŭm ƀă mâu kơ koan khu tơrŭm cheăng kal kí pơlê pơla mơhnhôk lối 3 rơtal liăn tŏng gum kuăn pơlê trâm pá ƀă hên troăng pêi châ tơƀrê.

Veăng ƀă xông tơpui a Hneăng hôp, Trung tươ̆ng Thái Đại Ngọc, Kăn cheăng tung Tíu xiâm Đảng, Kăn pơkuâ Kuân khu 5 mơnhên, tối ăm rêm ngế ‘nâi mâu tơdroăng tơ’noăng kheăn kơdeăn, tơ’noăng khŏm ƀlêi trâng dêi khu lêng Dak Lak tung 5 hơnăm hiăng hluâ. Mâu hơnăm la ngiâ, tơdroăng lâp plâi tơnêi, kơpong tối hdrối kô pơtối ai mâu tơdroăng pá puât, ôh tá ‘nâi tối hdrối, tung kơpong Kuân khu, ki má lối cho kơpong Tây Nguyên xuân cho môi tung mâu tơdroăng ki xiâm ai tơdroăng ki ôh tá tơniăn.

Khu xiâm pơkuâ lêng Kuân khu pơkâ thế Đảng ŭy - Hô̆i đong tơ’noăng kheăn kơdeăn, Khu xiâm pơkuâ lêng kong pơlê Dak Lak tơkŭm pơkuâ, hnê mơhno pêi lĕm tro mâu tơdroăng ki xiâm:

“Hlê plĕng pêi pro trâu hơngế troăng tơdjâ dêi Pôa Hồ Chí Minh, Kăn xiâm hnê ngăn tơnêi têa ‘na tơ’noăng pâ nhuô̆m tơnêi têa; pêi pro nhên ‘’5 khŏm mơ-eăm, 5 hbrâ’’ dêi pôa Nguyễn Phú Trọng, Kăn xiâm pơkuâ hnê ngăn Đảng; mâu mơ-éa pơkâ luât ‘na pêi pro tơdroăng tơ’noăng, kheăn kơdeăn. Pro ăm rêm kăn ƀô̆, mâu lêng, mâu ngế pêi cheăng hlê plĕng trâu hơngế ki kơnâ, ki kal dêi tơdroăng tơ’noăng, kheăn kơdeăn ƀă tơdroăng tơ’noăng khŏm ƀlêi trâng, kố cho tơdroăng pêi cheăng Kăch măng dêi ‘’Mô đô̆i Pôa Hồ’’, ki má môi, ki lĕm krê dêi Khu lêng kuăn pơlê Việt Nam’’.

A Dak Nông, 5 hơnăm hiăng hluâ, tơdroăng tơ’noăng khŏm ƀlêi trâng dêi khu lêng kong pơlê hiăng mơjiâng tơdroăng ki mơdêk dâi lĕm tâi tâng, ivá ó rơdêi tơplâ, gum kal khât tung pêi pro mâu pơkâ mơnhông cheăng kâ, rêh ối pơlê pơla, pêi krá tơniăn gâk kring tơnêi têa, tơniăn pơlê pơla. Tung 5 hơnăm, hiăng ai chât rơpâu roh kăn ƀô̆, mâu lêng kum kuăn pơlê kơpong pá puât; mơhnhôk châ lối 5,6 rơtal liăn mơjiâng 78 toăng hngêi rŭm môi tuăn; tŏng gum 1,4 rơtal liăn tăng cheăng pêi kum mâu rơpŏng kơtiê mơ-eăm; khăm pơlât châi tamo xo xo ăm vâ chê 1.900 ngế kuăn pơlê kơpong hơngế, hơngo.

Tung hneăng hơnăm 2019 – 2024 lâp kong pơlê hiăng rah xo, tơbleăng 67 khu pú hên, 82 ngế krê ki má môi tâi tâng tung rêm tơdroăng pêi cheăng. Tung 5 hơnăm hiăng hluâ ai 31 roh khu pú hên châ Khu xiâm pơkuâ lêng ƀă Kuân khu 5 mơnhên tíu cheăng krá tơniăn ó rơdêi tâi tâng ‘’hiâm mơno lĕm, rơkê kơhnâ’’.

A Hneăng hôp, Trung tươ̆ng Thái Đại Ngọc, Kăn pơkuâ Kuân khu 5 kheăn kơdeăn khu lêng Dak Nông hiăng rŭm môi tuăn, hbrâ xêh, tơmiât pêi rơkê tâi tâng mâu tơdroăng tơ’noăng khŏm ƀlêi trâng. Tung tơdroăng nếo, Trung tươ̆ng Thái Đại Ngọc pơkâ thế Đảng ủy, Khu xiâm pơkuâ lêng kong pơlê Dak Nông pơtối hlê plĕng pêi pro trâu hơngế troăng tơdjâ dêi Pôa Hồ Chí Minh, Kăn xiâm hnê ngăn tơnêi têa hneăng apoăng ‘na tơ’noăng pâ nhuô̆m tơnêi têa.

“Tơtrŏng châ hlo, hriâm vâ ‘nâi tơ’nôm, pơtâng tối po rơdâ mâu tơdroăng pêi, troăng pêi tơmiât rơkê, châ tơƀrê, mâu um méa khu pú hên, ngế krê ki rơkê, hôm má môi. Mâu ngế ki kơhnâ rơkê thế cho mâu khu pú hên, ngế krê tơmiât mâu tơdroăng cheăng ki hên ngế tá hâi tơmiât lo, tơkâ hluâ mâu tơdroăng pá puât ki hên ngế tá hâi tơkâ hluâ; tá hâi chiâng pêi mâu tơdroăng ki hên ngế ôh tá vâ pêi lơ tá hâi pêi, ai troăng tơmiât pêi rơkê, khên tơmiât, khên pêi. Tơ’noăng thế ai kheăn kơdeăn, kơdeăn teăm tơdrêng, mơhá tơxâng’’.

Ing Hneăng tơ’noăng khŏm ƀlêi trâng khu lêng hneăng hơnăm 2019 – 2024 môi xôh nếo ăm hlo, kăn ƀô̆, mâu lêng mâu kong pơlê Dak Lak ƀă Dak Nông, mơhé drêng lâi, tơdroăng rêh tiah lâi pơrá mơdêk hiâm mơno kăch măng, djâ troăng hdrối, kheăn tối, tơdrăng lĕm, mơdât tơdroăng ki ôh tá lĕm tro. Thăm pá puât mê khu lêng thế thăm tơ’noăng pơhlêh nếo, tơmiât pêi rơkê; thế kêi đeăng rơkê má môi tơdroăng cheăng dêi khu lêng tơplâ, khu lêng pêi cheăng, khu lêng pêi cheăng pêt mơjiâng tơmeăm dêi Khu lêng kuăn pơlê Việt Nam./.