Hâi kố, lơ 25/7, Khu xiâm pơkuâ Đảng Kŏng san Việt Nam, Kuô̆k hô̆i tơnêi têa Kŏng hoa Xah hô̆i chưh ngiah Việt Nam, Kăn xiâm hnê ngăn tơnêi têa Kŏng hoa Xah hô̆i chưh ngiah Việt Nam, Chin phuh tơnêi têa Kŏng hoa xah hô̆i chư ngiah Việt Nam, Viƀan xiâm Mât trâ̆n Tơnêi têa Việt Nam ƀă rơpŏng tơkŭm po kân krip leh lăm pôu ngăn pôa Nguyễn Phú Trọng,  Kăn xiâm pơkuâ hnê ngăn Đảng, Kăn xiâm pơkuâ hnê ngăn Đảng kơvâ lêng Tơnêi têa.

Leh tâp pôa Nguyễn Phú Trọng, Kăn xiâm pơkuâ hnê ngăn Đảng châ tơkŭm po ƀă tơdroăng leh ‘mé râ tơnêi têa. Khu pơkuâ leh ‘mé ai 35 ngế xua pôa Tô Lâm, Kăn xiâm hnê ngăn tơnêi têa pơkuâ xiâm. Khu pơkuâ leh ‘mé ai 27 ngế, xua pôa Lương Cường, Kăn cheăng tung Khu xiâm kal kí, Hnê mơhno má môi Khu xiâm pơkuâ hnê ngăn Đảng pơkuâ xiâm. Leh lăm pôu ngăn pôa Nguyễn Phú Trọng, Kăn xiâm pơkuâ hnê ngăn Đảng châ tơkŭm po a Hngêi ‘mé Tơnêi têa kơxô̆ 5 Trần Thánh Tông, pơlê kong kân Hà Nội, pơxiâm sap 7 chô troh 22 chô hâi lơ 25/7/2024 ƀă sap ing 7 chô troh 13 chô hâi lơ 26/7/2024.

Leh lăm pôu ngăn pôa Nguyễn Phú Trọng, Kăn xiâm pơkuâ hnê ngăn Đảng châ tơkŭm po rơtế chôu kố a Hngêi hôp kân Thống Nhất, pơlê kong kân Hồ Chí Minh ƀă a pơlê xiâm cheăm Đông Hội, tơring Đông Anh, pơlê kong kân Hà Nội. Tiô tơbleăng păng ‘nâng, Khu tơkŭm po leh ‘mé kô pro tơ’lêi hlâu, hnê mơhno ăm kuăn pơlê mot pôu ngăn pôa Nguyễn Phú Trọng, Kăn xiâm pơkuâ hnê ngăn Đảng. Drêng troh veăng, kuăn pơlê djâ dêi theh căn cước kuăn pơlê krâ chip điên tưh lơ phôn râng kŏng krâ VNeID kĭch hoăt mưk đô̆ 2 vâ quĕt mah QR. Kŏng an pơlê kong kân Hà Nội hiăng hbrâ mâu tơmeăm ki kal a rêm tíu krâ kơmăi quĕt mah QR vâ kum ăm kuăn pơlê pêi pro tơdroăng quĕt mah tơ’lêi hlâu drêng troh lăm pôu ngăn pôa Nguyễn Phú Trọng, Kăn xiâm pơkuâ hnê ngăn Đảng kơtê hiâm. Rơ’jíu Việt Nam (VOV) mơ’no tơdrêng Leh lăm pôu ngăn pôa Nguyễn Phú Trọng, Kăn xiâm pơkuâ hnê ngăn Đảng ƀă tơdroăng ki má môi ‘’Pôa Nguyễn Phú Trọng, Kăn xiâm pơkuâ hnê ngăn Đảng: Ngế dêi kuăn pơlê, Ngế dêi tơdroăng mơnhông tơtêk’’ sap ing 6 chô 55 phut troh 9 chô 15 phut hâi lơ 25/7/2024 tung mâu ƀâng rơ’jíu VOV1, VOV2, VOV3; um tơvi mơ’no tơdrêng tung ƀâng VTC1, VOVTV; mơ’no tơdrêng tung Hlá tơbeăng điên tưh VOV, VTC News ƀă mâu ƀâng ki ê tung măng pơlê pơla.