Cho a 13 chôu, Leh tơbâ hnoăng pôa Nguyễn Phú Trọng - Kăn xiâm pơkuâ hnê ngăn Đảng châ tơkŭm po kân krip a Hngêi ‘mé Tơnêi têa kơxô̆ 5 Trần Thánh Tông, Hà Nội. Klêi kơ’nâi mơ’no nhak ‘mé kiâ tơnêi têa Việt Nam po kân krip, pôa Tô Lâm - Kăn xiâm hnê ngăn tơnêi têa teăng mâ khu râ kăn pơkuâ Đảng, Tơnêi têa pơchuât Rơkong tơbâ pôa Nguyễn Phú Trọng - Kăn xiâm pơkuâ hnê ngăn tơnêi têa.

Pôa Tô Lâm, Kăn xiâm hnê ngăn tơnêi têa pơchuât tơbâ hnoăng ‘na châ ƀă tơdroăng pêi cheăng kăch măng dêi pôa Nguyễn Phú Trọng, Kăn xiâm pơkuâ hnê ngăn Đảng, mơnhên, vâ chê 60 hơnăm pêi cheăng kăch măng hên hĭn, krá tơniăn, Yăo sư, Tiê̆n sih, pôa Nguyễn Phú Trọng, Kăn xiâm pơkuâ hnê ngăn Đảng ƀă tuăn ngôa rơkê, ƀeăn ƀĕng rơkê kân hiăng lôi ăm tâi tâng Đảng, tâi tâng kuăn pơlê, tâi tâng khu lêng pin tơdroăng tơmiât ƀă tơpui leăng kơnâ khât ‘na troăng cheăng kăch măng Việt Nam tung rơxông nếo.

Krá chân, xúa ki rơkê chuh ngiah Mác – Lênin, troăng tơdjâ Hồ Chí Minh, ƀă pơkâ pêi plah tơniăn krê hdroâng mơngế ƀă chuh ngiah pơlê pơla, ngế djâ troăng tơmiât Nguyễn Phú Trọng, hlá cơ tơpui leăng dêi Đảng hiăng pro hleăng lĕm tơpui leăng ‘na chuh ngiah pơlê pơla ƀă troăng prôk to chuh ngiah pơlê pơla a Việt Nam, ‘na hnoăng dêi Đảng Kŏng san, ‘na tơdroăng cheăng kâ kơchơ mơdró tiô troăng xah hô̆i chuh ngiah...

Tơmeăm ki kơnía kơnâ mê hiăng thăm pro rơdêi tơdroăng loi tơngah ó rơdêi ‘na troăng prôk to chuh ngiah pơlê pơla, veăng gum kal kân khât ăm tơdroăng mơnhông dêi tơdroăng kŏng san tung lâp plâi tơnêi, mơnhông chuh ngiah Mác – Lênin, troăng tơdjâ Hồ Chí Minh tiô rơxông nôkố. Kăn xiâm hnê ngăn tơnêi têa mơnhên: Pơ’lâng Kăn xiâm pơkuâ hnê ngăn Đảng, tâi tâng Đảng, tâi tâng kuăn pơlê, tâi tâng khu lêng môi hiâm mơno pêi pro tơdroăng tơkêa pói vâ dêi Pôa, tâi hiâm mơno, tâi ivá gum ăm Tơnêi têa, gum ăm kuăn pơlê, pêi pro châ tơƀrê pơkâ xiâm mơjiâng tơnêi têa Việt Nam hơniâp lĕm, tơniăn krê, môi tuăn sap apoăng troh tá tui lui, kuăn pơlê pơkuâ dêi hnoăng cheăng, kro mơdrŏng, rơkê, hơniâp lĕm’’.

*** Klăng 13 chôu 30 phut, hiăg pơxiâm po leh tông, chơ djâ poăng pôa Nguyễn Phú Trọng. Pôa Tô Lâm, Kăn xiâm hnê ngăn tơnêi têa, pôa Phạm Minh Chính, Ngế pro xiâm hnê ngăn Chin phuh, pôa Trần Thanh Mẫn, Kăn xiâm hnê ngăn Kuô̆k hô̆i, pôa Lương Cường, Kăn xiâm pơkuâ hnê ngăn Đảng rơtế ƀă hên mâu kăn pơkuâ ki ê, mâu kăn pơkuâ Đảng, Tơnêi têa hneăng hdrối, kăn pơkuâ mâu kong têa hiăng prôk tâ tá poăng pôa Nguyễn Phú Trọng, Kăn xiâm pơkuâ hnê ngăn Đảng, chiân pôa troh a tíu ối pơtê má mơ’nui a ilâng kiâ Mai Dịch, Hà Nội.

Klăng 15 chôu kơxê Leh ‘mé pôa Nguyễn Phú Trọng - Kăn xiâm pơkuâ hnê ngăn Đảng châ tơkŭm po kân krip a ilâng kiâ Mai Dịch, Hà Nội. Tung tơdroăng pâ mơjo ó, teăng mâ Khu tơkŭm mơdâm ƀă rơpŏng hngêi pôa Nguyễn Phú Trọng - Kăn xiâm pơkuâ hnê ngăn Đảng, pôa Lương Cường, Ngế cheăng tung Khu xiâm kal kí, Kăn pơkuâ Đảng, Ngế xiâm pơkuâ Khu tơkŭm po leh mơdâm hiăng tơpui mơnê troh mâu kăn ƀă kuăn pơlê: “Teăng mâ Khu tơkŭm mơdâm ƀă rơpŏng hngêi pôa Nguyễn Phú Trọng, Kăn xiâm pơkuâ hnê ngăn Đảng, á pâ mơnê mâu kăn kăn pơkuâ, mâu kăn pơkuâ Đảng, Tơnêi têa, Măt trâ̆n Tơnêi têa Việt Nam hneăng hdrối; mâu kăn, mâu tơmối, mâu kuăn pơlê, mâu vâi pú tung lâp tơnêi têa, mâu tíu pêi cheăng khu lêng kring vế, mâu nhak sih, mâu ngế ki rơkê plĕng, mâu khu ki tiô khôp, mâu khu tơpui kâ, teăng mâ mâu khu tơrŭm kong têa ê hiăng troh ngăn, pơtroh rơvĭng reăng, krếo phôn veăng sĭng khéa, veăng ai mâ a leh tơbâ hnoăng, Leh ‘mế ƀă chiân pôa Nguyễn Phú Trọng, Kăn xiâm pơkuâ Tíu xiâm Đảng Kŏng san Việt Nam troh ối a tíu ối pơtê má mơ’nui”.