Tung tơdroăng ki tơkŭm po hmái ilĭng ƀă ƀriê tung hiâm mơno, mâu khu lêng ki hlŭm, tôu tơdrá Koh hlá cơ dêi Tơnêi têa hiăng pơtroh vâ pơ’lâng pôa Nguyễn Phú Trọng, Kăn xiâm pơkuâ hnê ngăn Đảng – Ngế kăn pơkuâ rơkê má môi, plâ rơxông xua tơnêi têa xua kuăn pơlê.

Ƀă tơdroăng ki ƀriê ƀă khéa pâ kơ pôa, pôa Tô Lâm, Ngế cheăng tung khu xiâm kal kí, Kăn xiâm hnê ngăn tơnêi têa, Ngế xiâm pơkuâ Khu tơkŭm po mơdâm kố pơchuât Hlá mơéa tối nhên: Pôa hía lôi cho tơdroăng ki hía hĕng kân khât ăm mâu tơdroăng, ôh tá chiâng kâi chêl boăng dêi Đảng pin, Hdroâng mơngế pin.

Tơnêi têa pin hía lôi môi ngế kăn xiâm pơkuâ ki rơkê; tơdroăng cheăng Kŏng san, tơdroăng ki rơkê a kong têa ê hía lôi môi ngế kăn lĭ luâ̆n rơkê ó; mâu vâi pú tung lâp plâi tơnêi hía lôi môi ngế pú ki tơdrăng, ngế pú ki achê hmâ; rơpŏng, hdroâng hdrê, pơlê xiâm Đông Hội hía lôi môi ngế kuăn ki rơkê.

Tơdroăng ki kơnía git dêi pôa Nguyễn Phú Trọng - Kăn xiâm pơkuâ hnê ngăn Đảng kô đi đo rêh ối tung tơnêi têa Việt Nam, kô châ pơtó ƀă mơnhông tâ nếo tung hnoăng cheăng pơhlêh nếo; pêi pro ƀlêi chiâng tơdroăng pơkâ pêi mơjiâng tơnêi têa Việt Nam hơniâp lĕm, tơniăn krê, môi tuăn, kro mơdrŏng, rơkê plĕng, hơniâp ro ki pôa tơchĕng tơmiât, mơ-eăm hlâ rêh.