Kuô̆k hô̆i khŏm pêi kơtăng rĕng tâi tâng tơmeăm tung lâp tơnêi (GDP) mơ-eăm sap ing 10% tơngi klêng, vâ mơjiâng troăng pêi krá tơniăn ăm tơtêk krá tơniăn a kơlo 2 kơxô̆ tung hneăng la ngiâ. Tơdroăng pơkâ tối nhên: Hơnăm 2026 ai kơnâ kal khât, tơkŭm po Hneăng hôp roh má XIV dêi Đảng, tơkŭm po rah xo kăn teăng mâ Kuô̆k hô̆i hneăng má XVI ƀă kăn teăng mâ Hô̆i đong kuăn pơlê mâu râ hneăng hơnăm 2026 – 2031, cho hơnăm apoăng pêi pro Pơkâ pêi mơnhông cheăng kâ – rêh ối pơlê pơla 5 hơnăm 2026 – 2030, mot tung xông mơ-eăm dêi tơná mơnhông kro mơdrŏng rơdêi, mơnhông mơdêk dêi hdroâng mơngế.

Kơjo apoăng mơdêk tơtêk tiô tơdroăng rak tơniăn cheăng kâ kân, mơdât liăn chu rơpâ, tơniăn mâu tơdâng kân. Tơdroăng pơkâ xuân mơnhên 15 túa pơkâ pêi ki xiâm, tung mê: Kơlo tơtêk cheăng kâ mơ-eăm sap ing 10% tơngi klêng. Pêi lo liăn rêm ko mơngế châ 5.400 dollars Mih. Kơxô̆ rơpŏng kơtiê (tiô pơkâ kơtiê hên troăng) kơdroh lối 1%...

‘Na troăng pêi, Kuô̆k hô̆i pơkâ, pơtối kơjo mơdêk tơtêk rak tơniăn cheăng kâ kân, mơdât liăn chu rơpâ ƀă tơniăn tơdâng kân dêi tơdroăng cheăng kâ. Tơrŭm krá tơniăn, châ tơƀrê, ƀeăn ƀĕng pơla troăng hơlâ liăn ngân ƀă mâu troăng hơlâ kân ki ê, pơtối kêi đeăng tơdroăng pơkâ pêi, luât tơdjâk troh mơ’no liăn cheăng tơnêi têa, tah lôi mâu tíu ki kreăng, kơdroh pêi pro rĕng tơdroăng mơ’no liăn ngân tơnêi têa sap apoăng hơnăm 2026, ki rơhêng vâ tối cho mâu tơdroăng tơkêa bro ki kal, ki xiâm tơnêi têa ƀă mâu Tơdroăng pơkâ xiâm tơnêi têa.