Vâ hbrâ ăm tơdroăng pêi cheăng séa ngăn tơdroăng tơkêa bro luât tơnêi tơníu (‘mâi rơnêu) tơbleăng Vi ƀan pơkuâ Kuô̆k hô̆i a roh hôp khế 4 ƀă tơpui roh má 2, hneăng hôp má 5, Kuô̆k hô̆i hneăng má 15, kơxê lơ 9/3, Khu hnê mơhno má môi Vi ƀan Cheăng kâ tơkŭm po roh pêi cheăng ƀă Khu xiâm pơkuâ kế tơmeăm khoăng ƀă kong prâi vâ tơmâng tơbleăng ‘na tơdroăng pêi pro dêi Luât Tơnêi tơníu (‘mâi rơnêu), mâu tơdroăng ki má môi tung tơdroăng tơmâng xo rơkong kuăn pơlê tơpui tối.

Pôa Vương Đình Huệ, Kăn xiâm hnê ngăn Kuô̆k hô̆i pơkuâ roh pêi cheăng. Tiô tơbleăng dêi Khu xiâm pơkuâ kế tơmeăm khoăng ƀă kong prâi, riân troh hâi lơ 6/3, tiô kơxô̆ chêh tơbleăng tung website tơmâng xo rơkong kuăn pơlê dêi kơ koan rah chêh, tá hâi kơxô̆ chêh tơbleăng dêi mâu kong pơlê hiăng tơdah 7.873 roh rơkong tơpui dêi kuăn pơlê dêi 768 khu tơrŭm cheăng, ngế krê tung tơdroăng xiâm dêi tơdroăng tơkêa bro luât. Ing tơmâng xo rơkong tơpui dêi kuăn pơlê dêi mâu kơ koan, khu tơrŭm cheăng, ngế krê, hên rơkong kuăn pơlê tơpui tối vâ môi tuăn ƀă mâu tơdroăng ki xiâm dêi tơdroăng tơkêa bro luât, mơnhên tơdroăng tơkêa bro hiăng ai hên pơ’lêh nếo, tơxâng tơdroăng kal vâ, tơdroăng pói vâ dêi kuăn pơlê, xúa tơnêi tơníu châ tơƀrê ăm tơdroăng mơnhông mơdêk cheăng kâ – rêh ối pơlê pơla, kum pơkuâ tơnêi tơníu krá tơniăn, xúa tơnêi kơdĭng, châ tơƀrê.

Mơgêi roh pêi cheăng, pôa Vương Đình Huệ tối nhên, tơdroăng tơmâng xo rơkong kuăn pơlê tơpui thế tiô hiâm mơno kuăn pơlê tơdrăng, ôh tá tơdjâk pa kong, loi tơngah khât, nhuô̆m tâi tâng rơkong tơpui. Kăn xiâm hnê ngăn Kuô̆k hô̆i môi tuăn ƀă mâu rơkong tơpui a roh pêi cheăng, tối kal mơnhên mâu troăng pêi la ngiâ, pâ thế, pơkâ thế. Kơ’nâi mê rah xo mâu tơdroăng ki kal, ki má lối cho mâu tơdroăng ối tơpui phá tơ-ê dêi pó lơ tá hâi ‘nâi nhên tơdroăng tơkêa bro luât vâ pơtối tơkŭm po hriăn plĕng, tơmâng xo rơkong tơpui, tơkŭm po tơpui tơno trâu hơngế tâ, nhên tâ.