Tạ Thị Thuỳ Linh ƀă Nguyễn Mai Thảo Anh cho 2 đảng viên nếo châ mot tung Đảng. Tŭm 2 ngế xuân cho hok tro hriâm rơkê  tung 12 hơnăm hlối. 3 hơnăm hriâm phôh thong râ má pái xuân cho prế ki kơhnâ veăng pêi tơdroăng cheăng dêi Đoân Droh rơtăm. Prếi cho ngế phŏ pơkuâ hriâm, cho Kăn phŏ pơkuâ hnê ngăn Chi đoan dêi lâm. Thùy Linh kô mot hriâm hngêi trung đăi hok hbrâ tơpâ mơdât on chếo, ‘na  Thảo Anh kô hriâm hngêi trung Đăi hok Luât, Đăi hok Kuô̆k ya Hà Nội. Tạ Thị Thủy Linh tối tơdroăng tơná phiu ro drêng châ mot tung Đảng:

“Drêng hiăng châ mot Đảng á kô mơ-eăm hên tâ nếo tung tŭm tơdroăng. Mơ-eăm hriâm khât tâ ƀă kô mơ-eăm ‘no hnoăng pêi ai pơxúa ăm pơlê pơla’’.

Nguyễn Mai Thảo Anh ai tối tiah kố:

“Nôu pâ á ƀă mâu vâi meh tung rơpŏng hngêi, cho đảng viên á loi khât kơ Đảng. Nôu pâ á xuân hnê tối ăm á hlê. Nôu pâ ăm a mot ƀă veăng gum hnê á’’.

Thái Trần Văn Công, Kăn pơkuâ hnê ngăn Chi ƀô̆ 2, Đảng bô̆ hngêi trung râ má pái phôh thong Ƀuôn Đôn ăm ’nâi: hơnăm hriâm 2020 – 2021 Hngêi trung râ má pái Ƀuôn Đôn ’mot đảng viên ki a poăng cho hok tro. Kố cho rôh pơxiâm dêi Đảng ƀô̆, drêng mê hên mâu thái cô cho đảng viên ối tơmiât ôh tá khên, tơchĕng hên: mơhé vâ nôu pâ dêi hok tro xuân tối: Mot đảng lối rĕng luâ râ hơnăm tơkéa kố:

“Ƀă mâu ngế kơhnâ mơ-eăm, vâ hriâm tơ’nôm ƀă vâ tơ’mot ăm mot Đảng cho môi tơdroăng ki kal păng ‘nâng. Xua mê pakĭng tơdroăng thái cô ki pơkuâ lâm hnê, mê tơdroăng đảng viên hnê hriâm tơ’nôm ăm o mê ngin ối hnê đi đo tơpui kơ-êng nôu pâ vâ  veăng hnê tơ’nôm ăm mâu vâi o. Vâ drêng vâi o hiăng mot Đảng ah kô hmiân tuăn  ‘nâi nhên tơdroăng tơná vâ mơ-eăm tung plâ rơxông tơná’’.

Cô hnê chư Văn Trinh Thị Dung- Ngế hiăng hnê ton hơnăm cho cô pơkuâ ngăn lâm  hiăng 18 hơnăm kố tối tiah kố: Tơdroăng hnê tơ’nôm ăm hok tro ai tuăn pâ tơnêi têa ƀă hlê ‘na Đảng ‘na tuăn tơmiât dêi Kăch măng, ‘nâi mơ-eăm hriâm pât dêi tơnêi mơhnhôk tơná pêi cheăng kơhnâ, malối ƀă mâu vâi o hok to lâm 12.

“Cho môi ngế đảng viên tăng ngăn mơhno ăm mâu đoân viên vâ to chi  ƀô̆, xuân môi tiah séa ngăn mâu vâi pú mê a ‘nâi rơnêu hriâm, má môi drêng vâ gum ăm mâu hok tro hlê ‘na troăng rơhlâ dêi Đảng xuân môi tiah hiâm mơno pâ nhoăm tơnêi têa mê á  hlo mâu vâi o mơ-eăm khât tâ; má môi cho hiăng kân iâ hiăng hlê iâ tung hên tơdroăng môi tiah tung rêh ối xuân môi tiah tung hriâm tâp’’.

‘Na thái Trần Vĩnh Trung, Kăn phŏ pơkuâ hnê ngăn Đảng ủy, Kăn phŏ  pơkuâ Hngêi trung râ má pái phôh thong Ƀuôn Đôn tối: tơdroăng hnê tơnôm ƀă tơ’mot hok tro mot Đảng châ râ ủy tơmâng khât hlối veăng gum. Đảng ủy ôh tá kơtâu tiô hnoăng, tiô kơxô̆ mê cho tơmâng khât a tơdroăng ki mơ-eăm hlo tơƀrê.

“Đảng ủy tơmâng tăng ngăn mâu đảng viên dêi hngêi trung ki hiăng tơ’mot ăm mot đảng, hiăng pơtroh ăm tơkŭm hôp a mâu hngêi trung đăi hok, kao đẳng tung lâp tơnêi têa. Ing mê, tăng ngăn mâu ngế ki mê vâ hnê ăm vâi hriâm mơ-eăm tâ. Kơhnâ pêi pro a hdrối mâu tơdroăng cheăng a tung hngêi trung đăi hok, cho môi tung mâu ngế ki kơhnâ rơkê dêi pêi ahdrối tơdroăng mâu hdroh rơtăm mâu hngêi trung đăi hok’’.

Tơring Ƀuôn Đôn ai 2 to hngêi trung râ má pái phôh thong. Tung hneăng ki kố hiăng tơ’mot 18 ngế đảng viên hok tro. To hơnăm 2023-2024 ai 6 ngế hok tro châ mot đảng. Pôa Ngô Cự Tâm, Ngế pơkuâ ngăn Đảng tơring Buôn Đôn ăm ‘mâi: rêm hơnăm Hngêi trung hnê tơdroăng kal kí dêi tơring tơrŭm ƀă đảng ủy 2 to hngêi trung râ má pái vâ mâu lâm hriâm tơ’môm hlê plĕng ‘na Đảng hngêi trung. Vâ ai đảng viên tung hngêi trung râ má pái, vâ drêng lo ing hngêi trung nah, rêh ối  pơlê pơla, vâi o kô ‘nâi nên troăng tơná vâ pro ti lâi ki tro:

“Kơ’nâi hiăng klêi tơ’noăng râ má páu vêh a pơlê mê Đảng ƀô̆ tơring tơmâng khât ‘na tơdroăng hnê mơhno, mâu Đảng ƀô̆, chi ƀô̆ dêi tơná pơkuâ ngăn xuân môi tiah chi ƀô̆  hngêi trung tơmâng, veăng gum. Pro hlâu ăm mâu vâi o pơtối châ hriâm vâ châ mot tung Đảng''.