Dế tung rơnó mêi hên, Thiê̆u tă Nguyễn Phúc Thuận (Đông mô đô̆i gâk tơkăng kong Dak Lao) inhên hnê mơhno kuăn pơlê thôn Dak Thọ, cheăm Dak Lao, tơring Dak Mil, kong pơlê Dak Nông kih thuât rak ngăn kơphế. Sap ing châ xing xoăng tơdroăng cheăng ‘na veăng hôp rơtế chi ƀô̆ thôn Dak Thọ, ngoh đi đo rơtế kuăn pơlê tung pêt mơjiâng tơmeăm, tơmiât pêi rơkê chôa ‘lâng mơdêk tơdroăng rêh ối kuăn pơlê tung lâp tơkăng kong.

‘’Vâ tơniăn ăm loăng plâi, mơnăn păn tơtro, mê á hiăng ti tăng plĕng, tơrŭm ƀă chi hô̆i kuăn pơlê pêi chiâk deăng cheăm, dêi tơring hriăn plĕng mâu hdrê loăng plâi ki tơtro vâ tơbleăng tối ăm kuăn pơlê pêt. Djâ sinh viên troh tơpui tơno ƀă kuăn pơlê mâu troăng pêi ki tơtro vâ kuăn pơlê kô chiâng xúa. Á xuân khên tơnôu pơkâ mâu kăn ƀô̆ chu a pơlê, chu a thôn vâ veăng tŏng kum mâu rơpŏng ki pá puât’’.

 Pôa Nguyễn Khắc Chinh, Kăn pơkuâ hnê ngăn Chi ƀô̆ thôn Dak Thọ, cheăm tơkăng kong Dak Lak, tơring Dak Mil, kong pơlê Dak Nông tối ăm ‘nâi, sap ing hâi Thiê̆u tă Nguyễn Phúc Thuận châ xing xoăng tơdroăng cheăng veăng hôp, mâu roh hôp chi ƀô̆ thôn kơdrâm sôk ro. Hên pơkâ kal khât ƀă tơdroăng rêh ối, pêt mơjiâng tơmeăm châ chi ƀô̆ pơkâ ƀă pêi pro châ tơƀrê. Mâu đảng viên xuân hlê plĕng nhên tâ hnoăng, tơdroăng cheăng djâ troăng ahdrối dêi tơná, mơ-eăm tung mơnhông cheăng kâ, khên tơnôu pơhlêh pêt khu hdrê loăng plâi, mơnăn păn. Thiê̆u tă Thuận rơtế ƀă chi ƀô̆ thôn hiăng mơhnhôk, veăng tơlo mơjiâng 4 toăng hngêi tuăn pâ.

‘’Ngoh Thuận cho môi ngế kăn ƀô̆ hơnăm ối nếo, pêi tá hiâm mơno, kơhnâ tung rêm kơvâ cheăng, tơdroăng cheăng. Pơchân tối chi ƀô̆ xuân môi tiah kuăn pơlê thôn tung pêt mơjiâng tơmeăm, pêi lĕm tơtro tơdroăng rak tơkăng kong. Cho kơnía ƀă châ kuăn pơlê hâk vâ’’.

Mơ-eăm troh tá tui lui ‘’pái tiô, pŭn rơtế’’ vâ ‘’ối ton kô plĕng tŭm tơdroăng’’, mâu đảng viên gâk tơkăng kong châ pơtroh hôp rơtế mâu chi ƀô̆ thôn, pơlê tung tơkăng kong Dak Nông hiăng gum kuăn pơlê chôa ‘lâng pơhlêh troăng tơmiât troăng pêi, mơdêk tơdroăng rêh ối. Jâ H’Xuân, Kăn phŏ pơkuâ hnê ngăn cheăng Đảng kong pơlê Dak Mil, kong pơlê Dak Nông tối ăm ‘nâi:

“Ƀă khu mô đô̆i gâk tơkăng kong dêi tâi tâng tơring mê xuân hiăng mơjiâng châ hên troăng pêi, tơdroăng châ tối ăm dêi pó rơdâ kân. Mâu tơdroăng pêi mê kô troh lâp lu, ƀă kuăn pơlê tung lâp tơring kheăn kơdeăn. Gum tung tơdroăng mơjiâng pơlê xiâm Dak Mil, ki rơhêng vâ tối cho pêi pro mâu pơkâ dêi Đảng ‘na mơnhông cheăng kâ – rêh ối pơlê pơla mơjiâng gâk kring, gâk kring tơnêi têa tung tơring’’.

Ƀă tơdroăng ki tŏng, gum dêi mâu mô đô̆i krâ kơlŏng ngiât, cheăng kâ, tơdroăng rêh ối dêi kuăn pơlê tung tơkăng kong dêi Dak Nông chôa ‘lâng châ mơdêk. Xuân ing mê, kuăn pơlê xuân mơdêk tơdroăng hlê plĕng gâk kring hnoăng pơkuâ, gâk kring tơkăng kong tơnêi têa. Ngoh Y Quyết, hdroâng kuăn ngo M’Nông, a ƀon Sapa, cheăm Thuận An, tơring Dak Mil, pêi kơphế a kơpong tơkăng kong Thuận Hạnh, tối:

“Rơpŏng ai chiâk deăng a kố, ƀă ai tơneăn a chiâk deăng hlối. Rêm roh lăm pêi cheăng mê á xuân hiăng po văng nhâ rơtâ tâ tơneăn. Ƀă tâng châ hlo ngế ki tơviah mot tung kơpong tơkăng kong mê ngin kô tơbleăng ăm mô đô̆i gâk tơkăng kong ‘nâi tâi tâng. Mô đô̆i gâk tơkăng kong lăm séa ngăn đi đo mê ngin xuân hmiân tuăn pêi chiâk deăng a mê’’.

Tiô Trung tă Lương Đình Hùng, Cheăng kal kí Đông mô đô̆i gâk tơkăng kong Dak Song, kong pơlê Dak Nông, mơnhên gâk kring krá tơniăn kơpong tơkăng kong ôh tá xê to hnoăng cheăng dêi mô đô̆i gâk tơkăng kong mê ối cho hnoăng dêi tâi tâng kuăn pơlê, thế kơnôm tung ivá rơdêi dêi kuăn pơlê. Tíu cheăng đi đo rak ngăn tơdroăng rêh ối pơlê pơla, “rơtế kâ, rơtế ối, rơtế pêi’’ rơtế môi tiah tơdroăng tơmiât ƀă kuăn pơlê a kơpong tơkăng kong.

“Đông lêng mô đô̆i gâk tơkăng kong thế kơnôm a kuăn pơlê, kuăn pơlê cho ngế ki xiâm tung pơkuâ gâk kring tơkăng kong, mô đô̆i gâk tơkăng kong cho khu ki pêi cheăng xiâm pêi tơdroăng gâk kring. Rêm hơnăm mê đông mô đô̆i tơrŭm ƀă khu râ kăn pơkuâ cheăm tơkŭm po hên tơdroăng khôi túa lĕm tro ngê̆ thuât tơ’noăng ivá, ƀă mơgêi pơtân 1 hơnăm pêi pro tơdroăng tâi tâng kuăn pơlê gâk kring hnoăng pơkuâ tơkăng kong, vâ rơtế ƀă kuăn pơlê pêi pro lĕm tro hnoăng cheăng gâk kring hnoăng pơkuâ gâk kring tơkăng kong tung tíu tơkăng kong’’.

Mâu hơnăm hiăng hluâ, Mô đô̆i gâk tơkăng kong Dak Nông hiăng tơbleăng 57 ngế đảng viên troh hôp a 55 chi ƀô̆ thôn, pơlê; xing xoăng 146 đảng viên pơkuâ khu rơpŏng a kơpong tơkăng kong. Ƀă mâu tơdroăng pêi ki kal khât ƀă châ tơƀrê hiăng gum mơdêk tơdroăng rêh ối dêi kuăn pơlê mâu hdroâng kuăn ngo, tơbêng tuăn pâ rŭm môi tuăn khu lêng kuăn pơlê a tơkăng kong. Mê cho xiâm kối vâ mô đô̆i gâk tơkăng kong Dak Nông mơjiâng tơdroăng tâi tâng kuăn pơlê gâk kring, kring vế tơkăng kong tơniăn lĕm ƀă rế hía rế mơnhông.