A Hà Nội, hâi lơ 8/3, hiăng tơkŭm po tơpui tơno gâk kring râ Ngế xiâm phŏ Việt Nam – Nhuk roh má 7. Thươ̆ng tươ̆ng Lương Tam Quang, Ngế xiâm phŏ Khu xiâm pơkuâ Kŏng an Việt Nam ƀă Kăn phŏ pơkuâ Kơ koan Kan sat kong têa Nhuk - pôa Ogata Yoshimi rơtế pơkuâ tơpui tơno.

Pôa Lương Tam Quang tối nhên, tơpui tơno roh kố cho roh péa kơ koan rơtế mơnhên mâu tơdroăng châ tơƀrê; tối ăm dêi pó, tơrŭm cheăng, tơpui tơno tơdrăng ‘na mâu tơdroăng xiâm péa pâ rơtế rơhêng vâ ‘nâi plĕng; môi tuăn troăng pêi la ngiâ, tơdroăng xiâm tơrŭm cheăng ki châ pơxúa, châ tơƀrê tâ nếo, tơleăng tơtro mâu tơdroăng ‘na mâu ngế xôi péa tơnêi têa tung rơxông nếo, tơxâng pơkâ tơdroăng tơniăn gâk kring, tơplâ mơdât mâu ngế xôi; kum mơdêk hiâm mơno loi tơngah pơla péa pâ, xua pơxúa tơdjuôm dêi péa tơnêi têa.

Tơdrêng amê, kum krá tơniăn hơniâp lĕm, rak tơniăn ƀă mơdêk kơpong. A roh tơpui tơno, tiô hiâm mơno nhŏng o, loi tơngah ƀă hlê plĕng dêi pó, péa pâ hiăng môi tuăn kal pơtối thăm pêi pro rơdêi tơrŭm cheăng păng ‘nâng, châ tơƀrê, tơrŭm tơniăn tâ tung hnoăng pêi cheăng tơrŭm hbrâ mơdât mâu ngế xôi, rak tơniăn tơdroăng rêh ối tơniăn lĕm, hơniâp ro ăm kuăn pơlê péa tơnêi têa Việt Nam – Nhuk.