Tơdroăng tơkêa bro mê pơxiâm pro apoăng hơnăm 2021, pơxiâm  tơbleăng thế pêi pro sap apoăng hơnăm 2022 a tơnêi rơdâ 1.810 ha. Troh nôkố, hên mâu tíu pêi pro ki kal dêi Tơdroăng tơkêa bro  hiăng pro klêi, hiăng pêi pro tâi mâu tíu tơƀai vâ kơneăng séa ngăn hôm hâi tơtro ƀă tối nhên tơdroăng tơƀai kơneăng. Tiô tơdroăng hiăng tí tăng ngăn ăm ‘nâi dêi Khu pêi pro ngăn ‘na troăng tơƀai Air Transport Action Group, drêng kơneăng, Tơraih tơƀai mê hiăng kum 22.000 ngế ai cheăng pêi, veăng ‘no hnoăng pêi lo châ dâng 37 rơtal dollars/hơnăm...

Ƀă tơdroăng ki mơ-eăm mê, tơdroăng mơjiâng pro tơraih tơƀai  Long Thành - rôh má 1 mơ-eăm pro klêi hdrối hâi lơ 19/12/2025 ai tiô púi vâ ăm tơƀai kơneăng tro kih thuâ̆t, vâ Tơdroăng tơkêa bro châ xúa hlối ăm tơƀai kơneăng a tơdế apoăng hơnăm 2026... Tối mơgêi hâi pêi cheăng pôa Tô Lâm - Kăn xiâm pơkuâ hnê ngăn Đảng khĕn kơdeăn mâu Khu xiâm, kơvâ cheăng, cheăm bêng kong pơlê ki tơdjâk troh hiăng mơ-eăm pêi cheăng luâ tơdroăng rôh apoăng pro tơniăn Tơdroăng tơkêa mơjiâng pro tro tiô pơkâ.

Tối nhên, ki kal dêi Tơdroăng tơkêa bro, Kăn xiâm pơkuâ hnê ngăn Đảng pơkâ thế, thế pro Tơraih tơƀai Lâp plâi tơnêi Long Thành châ ăm tơƀai xúa kơneăng tro luâ tâ, hôm tâ, ahdrối tâ, cho túa ki nếo ‘na tơraih tơƀai mơjiâng pro tiô túa nếo nôkố, krá kak ƀă hlối rơkê plĕng, chiâng tíu ki hên ngế vâ troh má môi a Đông Nam Á. A rôh pêi cheăng, Kăn xiâm pơkuâ hnê ngăn Đảng xuân ăm veăng hnê tối ‘na mâu tơdroăng pâ thế dêi mâu kong pơlê, mâu khu pơkuâ ‘no liăn mơjiâng pro ƀă Ƀơrô Tíu xiâm Đảng tơkŭm tâi tâng, pơtroh ăm mâu kơ koan ki tơdjâk troh tăng ngăn, séa ngăn thâ tơleăng  mơnhên tro tiô pơkâ râ kơpêng, tơniăn tro tiô pơkâ dêi Luât ƀă ing tuăn vâ kơjo kum hên vâ Tơdroăng tơkêa bro kô pro klêi tro tiô pơkâ, mơnhông krá tơniăn tung mâu hơnăm la ngiâ.