A tíu xiâm mơ’no Rơ’jíu Tơnêi têa 58 Quán Sứ, Hà Nội, Khu ki pêi dêi hnoăng cheăng dêi Vi ƀan mơhno túa lĕm tro hnê hriâm dêi Kuô̆k hô̆i hiăng ai rôh pêi cheăng ƀă Rơ’jíu xiâm Việt Nam. A rôh pêi cheăng, kăn pơkuâ mâu tíu pêi cheăng dêi Rơ’jíu Việt Nam tối ‘na mâu tơdroăng cheăng hnê tối dêi VOV, mâu tơdroăng ki xơpá tung pơla pêi pro troh tơniăn ki tơniăn krê ‘na liăn ngân dêi VOV tiô pơkâ 60 dêi Chin phuh; xơpá tung tơrŭm kơ koan tơnêi têa drêng athế pêi pro kơdroh mâu ngế cheăng tiô pơkâ; troăng hơlâ pơkâ dêi kơ koan chêh hlá tơbeăng tung pơla nôkố, drêng liăn ngân rế hía rế kơdroh mê tơdroăng rêh ối dêi mâu kăn ƀô̆, mâu ngế pêi cheăng rế hía rế trâm hên xơpá.

Tơdrêng amê hlối pơkâ mơ’no mâu troăng hơlâ tŏng kum tung la ngiâ. Mâu ngế cheăng tung Vi ƀan mơhno túa lĕm tro Hnê hriâm dêi Kuô̆k hô̆i mơnhên tối khât: VOV cho môi tung 6 tíu pêi cheăng chêh hlá tơbeăng xiâm dêi tơnêi têa pin, nôkố trâm hên tơdroăng xơpá, pơloăng mơnúa, tơdroăng ki tơbriât ‘na túa pêi tối tơbleăng tung um tơvi lơ hơ’lêh tơdjâk troh mâu tơdroăng pơkâ pơkuâ.

Malối mâu tơdroăng xơpá ‘na tơdroăng pơkâ, troăng hơlâ ƀă liăn ngân. Vi ƀan mơhno túa lĕm tro Hnê hriâm dêi Kuô̆k hô̆i kô tơrŭm ƀă VOV pơkâ mơ’no mâu troăng hơlâ tŏng kum, malối cho troăng hơlâ tung Luât hlá tơbeăng ki ‘mâi rơnêu la ngiâ kố ah kô mơnhên hnoăng cheăng dêi mâu kơ koan chêh hlá tơbeăng xiâm ƀă Luât.