Hâi lơ 12/2, a pơlê kân Sa Thầy, kong pơlê Kon Tum, Vi ƀan ngăn ‘na rak  tơniăn troăng prôk tơnêi têa tơkŭm po tơ’noăng THACO Marathon, xua vâ pro tơniăn troăng prôk.  Châ tơkŭm po kân, ƀă vâ chê 1 rơpâu ngế kơtâu, Tơ’noăng THACO Marathon xua vâ rak tơniăn troăng prôk vâ mơhnhôk pơtâp ivá tiô troăng hnê dêi Pôa Hồ ki rơkê; hnê mơhno, mơdêk hlê plĕng ‘na rak tơniăn troăng prôk; hnê tơdroăng ki lĕm ton nah dêi kăch măng, tơbleăng tíu tơbâ ton nah dêi tơnêi têa ki tơviah a rôh hên ngế prôk 1015, Văng Charlie ƀă chôu hên mơngế prôk a 1049 Văng Delta.

Rôh kố, Liăn ‘măn kơdĭng tơkŭm pêi xua vâ rak tơniăn troăng prôk dêi Hlá tơbeăng chêh ‘na troăng prôk hiăng ăm 25 kơxu tơmeăm kơnâ rêm kơxu 2 rơtuh liăn kum ăm mâu rơpŏng, nhŏng o xiâm ki ai ngế xía vâ ‘na troăng prôk ki rơpŏng hngêi kơtiê xơpá; diâp ăm 200 to muâk rak vế ko ăm Khu rak tơniăn troăng prôk kong pơlê Kon Tum.