Kơxê măng lơ 17/2, po hneăng Hôp mơgêi tơdroăng cheăng tơrŭm pơla Vi ƀan pơkuâ cheăng Kuô̆k hô̆i ƀă Khu kăn hnê ngăn Vi ƀan Xiâm Măt trâ̆n tơnêi têa Việt Nam. Tối tơbleăng a hneăng hôp, pôa Vương Đình Huệ, Kăn xiâm hnê ngăn Kuô̆k hô̆i tơmâng xo, khĕn kơdeăn hnoăng veăng ‘no dêi Măt trâ̆n tơnêi têa Việt Nam ƀă mâu khu tơrŭm cheăng tung khu tung hnoăng cheăng pêi tơdjuôm tâi tâng dêi tơnêi têa tung hơnăm 2022.

Kăn xiâm hnê ngăn Kuô̆k hô̆i púi vâ, tung hơnăm 2023, péa kơ koan pơtối mơdêk tơrŭm cheăng tung tơdroăng ‘mâi mơnhông krá tơniăn khu ki môi tuăn hdroâng mơngế, pơtối rak môi tuăn kuăn pơlê, pơtối mơdêk ki rơkê hriăn plĕng dêi kuăn pơlê vâ mơdêk rĕng tung tơdroăng ‘mâi mơnhông, mơdêk cheăng kâ - rêh ối.

Péa pâ kal tơmâng hơ’lêh nếo ƀă mơdêk tơƀrê tơdroăng cheăng hnê tối, mơhnhôk, hơ’lêh nếo tơdroăng pêi, troăng rơhlâ pêi, mơdêk tơƀrê, pơxúa tung hnê mơhno, mơhnhôk  pơxúa khât, tơtro ƀă tơrêm ngế.