Pơtối roh hôp 20, kơxo lơ 14/2, Vi ƀan pơkuâ cheăng Kuô̆k hô̆i ăm hnê tối mâu tơdroăng luât hbrâ ’na lêng ki kân ối hnê tối pơrá dêi rơpó dêi tơdroăng tơkêa luât Hbrâ mâu lêng. Hdrối mê, a rôh hôp má 4, Kuô̆k hô̆i hneăng 15, hên mâu kăn vâ môi tuăn ƀă tơdroăng kal pơkâ Luât hbrâ mâu lêng. Pakĭng mê, hên ngế kăn tối thế pơtối séa ngăn rêm râ ki hbrâ mâu lêng vâ tơniăn drêng kal vâ.

Ing mê, râ má 1 châ xúa vâ hbrâ, tơkâ luâ mâu tơdroăng pá xúa trâm tơdroăng xía vâ, tơdroăng xía vâ tung râ tơring, râ má 2 cho tung kong pơlê. Pơkâ roh râ  hbrâ mâu lêng cho xiâm pơkâ dêi râ kơpêng tơbleăng thế pêi pro, tah lôi ƀă pơkâ mâu tơdroăng vâ xúa tung rêm râ ki hbrâ mâu lêng.

Xuân tung hâi kố, Vi ƀan pơkuâ cheăng Kuô̆k hô̆i  tơkŭm tâi tâng rôh hôp ôh tá xê tiah hmâ rôh má 2 ƀă má 3, Kuô̆k hô̆i hneăng 15; séa ngăn, tơbleăng hlá mơ-éa luât Pơkâ hnê pêi pro tiô tơdroăng dêi rôh hôp Kuô̆k hô̆i ƀă séa ngăn hlá mơ-éa pơkâ ‘na hnoăng cheăng pêi ƀă tơdroăng mơjiâng, tơkŭm pêi dêi Khu kăn chêh tôm xo rơkong ƀă séa ngăn tơdroăng tối tơbleăng ‘na tơdroăng cheăng kuăn pơlê vâ pêi dêi Kuô̆k hô̆i khế 12/2022 ƀă khế 1/2023.