Pơtối tơdroăng rôh hôp má 18, hâi kố lơ 14/12, Vi ƀan pơkuâ Kuô̆k hô̆i ăm rơkong tơpui tối ‘na tơdroăng ki pơtroh, tơmâng, ‘mâi rơnêu kơxop hlá mơéa Luât Khăm pơlât ki ‘mâi hơ’lêh. Ƀă tơdroăng ki krâu, nhên, tơmâng rơkong tơpui tối mâu tơdroăng ki veăng tơpui dêi mâu kăn Kuô̆k hô̆i, a Hneăng hôp má 4 kố nah, Kuô̆k hô̆i pơkâ tá hâi tơbleăng Luât Khăm pơlât ki ‘mâi hơ’lêh xua hên tơdroăng pơkâ bro mâu kăn tá hâi hmiân tuăn. Tung mê, ki xiâm cho hơ’lêh tung khăm pơlât chiâng tơdroăng ki xơpá ôh tá ai tơdroăng ki chiâng vâ tơpui tối leăng. Malối cho mâu troăng hơlâ ki mơ’no tối tung kơxop hlá mơ-éa Luât tá hâi tŏng kum mâu tơdroăng ki ôh tá tơniăn ‘na tơdroăng pơkâ pêi pro krê xêh dêi mâu hngêi pơkeăng tơdjuôm.

Maluâ hiăng nhên, tơdroăng ki pêi pro krê xêh dêi tíu khăm pơlât kal mơnhên nhên Tơnêi têa ‘no liăn cheăng troh a klo ki lâi vâ tíu khăm pơlât chiâng rak tơniăn tơdroăng ki pêi pro krê xêh tiô mâu kơlo pơkâ ki phá dêi rơpó. Ing mê veăng kum mơdêk ki rơkê tung tơdroăng cheăng khăm pơlât, pêi pro châ tơdroăng ki rơhêng vâ khăm pơlât dêi kuăn pơlê.