Kơxo lơ 27/2, Vi ƀan pơkuâ Kuô̆k hô̆i hiăng tơkŭm po rôh Hôp tơbleăng cheăng tơpui kâ dêi Kuô̆k hô̆i hơnăm 2023. Teăng mâ kăn pơkuâ Kuô̆k hô̆i, tơpui a Rôh hôp, Kăn phŏ hnê ngăn Kuô̆k hô̆i - pôa Trần Thanh Mẫn tối tiah kố, tung pơla hdrối nah, Kuô̆k hô̆i Việt Nam pơtối hơ’lêh nếo, kơhnâ ƀă mơdêk hnoăng cheăng, “ivá rơdêi” dêi tơpui kâ kuô̆k hô̆i, kum tơƀrê tung tơdroăng ki pêi pro troăng hơlâ tơpui kâ tơniăn krê, hơniâp lĕm, tơrŭm tơroâ, hên kơvâ, mơdêk um méa, hnoăng cheăng dêi Việt Nam a mâu kong têa ê dêi Đảng ƀă Tơnêi têa pin.

Tung la ngiâ ah, Kuô̆k hô̆i kô pơtối tơbleăng mâu troăng hơlâ pơkâ ki kân dêi Đảng ‘na mơdêk hnoăng cheăng djâ troăng ahdrối dêi tơpui kâ, mơjiâng ivá tơpui kâ tâi tâng, rơkê ƀă 3 tơdroăng ki xiâm cho tơpui kâ dêi Đảng, tơpui kâ dêi tơnêi têa ƀă tơpui kâ dêi kuăn pơlê, tung mê tơtrŏng tíu, hnoăng cheăng tơpui kâ Kuô̆k hô̆i tung tâi tâng troăng hơlâ tơpui kâ dêi Việt Nam.