Pơxiâm po rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên: 10 tơdroăng tơkêa hlá mơ-éa luât châ ăm rơkong veăng tơpui a rôh hôp kố ối tung hên kơvâ cheăng châ kuăn pơlê kal vâ ‘nâi, môi tiah Luât Kŏng đoân (‘mâi hơ’lêh); Luât Nâp hnoăng liăn mơhá ki kơnâ mơdêk (‘mâi hơ’lêh); Luât kế tơmeăm túa lĕm tro (‘mâi hơ’lêh); Luât Túa pơkâ kơphô̆ ƀă túa pơkâ thôn pơlê; Luât hbrâ mơdât on chếo, trếo pơtôu ƀă tŏng xo mâu ngế hliăng tiâ.

Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, Khu xiâm ngăn tơdroăng kal kí nếo pơkâ 178 ‘na hbrâ mơdât hnoăng hbrâ mơdât kâ kơluâ tung hnoăng cheăng mơjiâng luât, pơkâ thế mâu ngế cheăng tung Vi ƀan pơkuâ Kuô̆k hô̆i tối nhên túa tơmiât dêi tơná, pôi tá ví mâu tơdroăng ki ôh tá tro, tơ’lêi trâm xua vâ pơxúa ăm tơná ‘na liăn ngân.

Tơdrêng amê ăm ‘nâi apoăng hơnăm 2025 kô tơkŭm po Rôh hôp ‘na luât, vâ tơpui trâu tâ, nhên tâ vâ mơdêk ki rơkê, prôk trâu hngế tung hnoăng cheăng mơjiâng luât.