Ai đang 500 ngế kuăn pơlê troh ing 5 cheăm, mê cho: Đăk Nên, Đăk Ring, Măng Buk, Đăk Tăng, Măng Cành dêi tơring Kon Plông veăg mâu lâm hnê mơhno. Ing lâm hnê mơhno kuăn pơlê, ki hên cho kuăn pơlê hdroâng kuăn ngo Rơteăng châ xing xoăng ăm mơ-éa chêh tơbleăng, mơ-éa hnê mơhno hbrâ, ví tơnêi tơdro. Ôh tá xê to veăng tŭm ƀă tơmâng ngăn, kuăn pơlê a mâu cheăm kơpong ki xiâm tơnêi tơdro a tơring Kon Plông, kong pơlê Kon Tum xuân hbrâ kơ-êng, tối tơdroăng ki rơhêng vâ ‘nâi, tô tuăn vâ kăn ƀô̆ tiâ tối.

Tiê̆n sih Bùi Thị Nhung, môi tung 5 ngế rơkê troh ing Viê̆n Vâ̆t lĭ đĭa kâu tối ăm ‘nâi, xuân ing tơdroăng trâm mâ, tơpui tơno tơdrêng ƀă kuăn pơlê 5 cheăm kơpong ki xiâm tơnêi tơdro, Viê̆n Vâ̆t lĭ đĭa kâu kô pơtối hriăn plĕng pơkâ mơ’no mâu troăng ki tơtro ƀă nôkố, vâ kuăn pơlê kâi trâng ƀă châ hluăn xía vâ ƀă tơdroăng tơnêi tơdro.