Tung rôh lăm pôu ƀă pêi cheăng a kong têa Lếo, Khu kăn Hô̆i đong Kuăn ngo Kuô̆k hô̆i Việt Nam xua pôa Y Thanh Hà Niê Kdăm, Kăn xiâm hnê ngăn Hô̆i đong   Kuăn ngo pơkuâ djâ mâu kăn troh koh tơpui tơno ƀă Kăn xiâm hnê ngăn Kuô̆k hô̆i Lếo – pôa Xaysomphone Phomvihane ƀă hlối pơkuâ hneăng hôp tơpui tối túa cheăng ‘na kuăn ngo ƀă Pơkuâ Vi ƀan mâu hdroâng kuăn ngo Kuô̆k hô̆i Lếo.  

A rôh tơdah, Kăn xiâm hnê ngăn Hô̆i đong - pôa Y Thanh Hà Niê Kdăm hiăng tối mâu tơdroăng hiăng tơpui klêi pơla Hô̆i đong kuăn ngo dêi Kuô̆k hô̆i Việt Nam ƀă Vi ƀan mâu hdroâng kuăn ngo Kuô̆k hô̆i Lếo tung hơnăm hdrối, troăng rơhlâ tơrŭm cheăng tung la ngiâ ‘na tơrŭm tơkŭm po hneăng hôp tối ăm dêi rơpó ‘nâi túa cheăng ‘na kuăn ngo péa tơnêi têa.

Hdrối mê, Hô̆i đong ngăn Kuăn ngo dêi Kuô̆k hô̆i Việt Nam ƀă Vi ban Mâu hdroâng kuăn ngo Kuô̆k hô̆i Lếo hiăng tơrŭm tơkŭm po hôp tơpui tối ăm ‘nâi mâu tơdroăng ki hlê pêi tung mơjiâng luât ƀă séa ngăn tơdroăng tối tơbleăng pêi mâu luât pơkâ tŏng kum ‘na tơdroăng kuăn ngo, xăm kơtiê krá ton, tơniăn rêh ối pơlê pơla, tối ăm dêi rơpó ‘nâi mâu tơdroăng cheăng séa ngăn, mơnhông thôn pơlê, kơdroh kơklêa, xăm kơtiê, tăng cheăng pêi tơniăn ăm kuăn pơlê... Việt Nam ƀă Lếo mơdêk tơrŭm cheăng pơla mâu kơ koan pêi tơdroăng cheăng ‘na kuăn ngo.