Kơxê lơ 27/2, a Tíu pêi cheăng dêi Khu xiâm pơkuâ ngăn lêng (Hà Nội), Thượng tướng Hoàng Xuân Chiến, Ngế cheăng tung tíu xiâm Đảng, Ngế xiâm phŏ pơkuâ ngăn lêng, Ngế xiâm pơkuâ Kơ koan Hnê mơhno cheăng dêi tơnêi têa ‘na pêi pro vâ tơkâ luâ xơpá xua ƀom min ƀă trếo ‘mêi a chal tơplâ nah a Việt Nam nah cho Khu hnê mơhno 701 hiăng pêi cheăng ƀă Kăn teăng mâ Mih a Việt Nam cho pôa Marc E.Knapper ‘na tơrŭm cheăng tah ƀom min klêi ai tơdroăng tơplâ a Việt Nam.

Tối troăng rơhlâ dêi Việt Nam tung tơrŭm cheăng tơkâ luâ xơpá xua ƀom min, tơmeăm ki pơtôu kơ’nâi rôh tơplâ ƀă Mih, Thượng tướng Hoàng Xuân Chiến loi khât tung la ngiâ, tơdroăng tơrŭm cheăng mê kô pơtối ‘mâi mơnhông mơdêk; hlối púi vâ Mih pơtối tơ’nôm mâu tơdroăng tŏng kum, kơjo kum ton  hơnăm ăm Việt Nam, veăng kum Việt Nam tơleăng mơnhên klêi mâu tơdroăng  xơpá xua ƀom min, trếo pơtôu tơplâ nah ki u ối, pro lĕm kơpong tơnêi ki ai trếo ‘mêi, pro ăm kuăn pơlê ai tíu pêi cheăng kâ rêh ối.

Thượng tướng Hoàng Xuân Chiến tối nhên Việt Nam kô pơtối pro hlâu, tơrŭm krá ƀă mâu khu tơrŭm cheăng dêi Mih vâ tah lôi mâu tơdroăng ki xâu xía tung chal tơplâ nah ƀă pêi tro tiô tơdroăng hiăng pơkâ tơhrâ.