Tung mâu hâi hdrối kố nah, tơdroăng hlâ lêk dêi pôa Nguyễn Phú Trọng - Kăn xiâm pơkuâ hnê ngăn tíu xiâm Đảng Kŏng san Việt Nam, Kăn pơkuâ xiâm dêi mâu kong têa, mâu khu tơrŭm cheăng tung lâp plâi tơnêi, mâu Đảng ƀă mâu vâi pú tung lâp plâi tơnêi ing 103 to kong têa, tung kơpong ƀă 32 khu tơrŭm cheăng lâp plâi tơnêi hiăng pơtroh vâ chê 500 kơthô, krếo phôn veăng hơlêm, síng khéa troh Khu Kăn Tíu xiâm Đảng Kŏng sản Việt Nam, Kăn xiâm hnê ngăn tơnêi têa Kŏng hoa xah hô̆i chuh ngiah Việt Nam, pôa Tô Lâm - Kăn xiâm hnê ngăn tơnêi têa Kŏng hoa xah hô̆i chuh ngiah Việt Nam, pôa Phạm Minh Chính, Ngế pro xiâm hnê ngăn tơnêi têa Kŏng hoa xah hô̆i chuh ngiah Việt Nam, pôa Trần Tranh Mẫn - Kăn xiâm hnê ngăn Kuô̆k hô̆i tơnêi têa Kŏng hoa xah hô̆i chuh ngiah Việt Nam; pôa Lương Cường, Ngế xiâm pơkuâ ngăn tíu xiâm Đảng Kŏng san Việt Nam, mâu kăn xiâm pơkuâ hnê ngăn Đảng, Tơnêi têa ki ê, kuăn pơlê Việt Nam ƀă nhŏng o xiâm dêi pôa Nguyẽn Phú Trọng - Kăn xiâm pơkuâ hnê ngăn Đảng .

100 khu kăn xiâm lâp plâi tơnêi hiăng troh veăng pôu ngăn hlối pơtroh rơvĭu reăng veăng hơlêm tơdroăng sĭng khéa a Việt Nam ƀă lối 3.500 khu kăn xiâm hiăng troh pôu ngăn pôa Nguyễn Phú Trọng - Kăn xiâm pơkuâ hnê ngăn Đảng a mâu kơ koan teăng mâ dêi Việt Nam tung lâp tơnêi. Tung mâu kơthô pơtroh, krếo phôn tối veăng hơlêm síng khéa, mâu kăn dêi mâu kong têa, mâu khu tơrŭm cheăng lâp plâi tơnêi, mâu đảng ƀă mâu vâi pú tung lâp plâi tơnêi hiăng mơhno hiâm mơno nhoăm pâ, mơjo nhoăm kân kơ pôa Nguyễn Phú Trọng - Kăn xiâm pơkuâ hnê ngăn, nhoăm mâu hnoăng kăn xiâm pơkuâ hnê ngăn Đảng veăng ‘no ƀă tơdroăng mơnhông dêi Việt Nam ƀă tơdroăng tơrŭm pơla Việt Nam ƀă mâu khu tơrŭm cheăng, mơhno tơdroăng ki vâ pơtối mơnhông tâ nếo tơrŭm cheăng ƀă Việt Nam tung tâi tâng mâu kơvâ cheăng.

Nhoăm tơdroăng tơrŭm môi tuăn, veăng hnê tối dêi mâu kong têa, ƀă mâu khu tơrŭm cheăng, mâu Đảng ƀă mâu vâi pú tung lâp plâi tơnêi, mâu kăn xiâm Đảng, Tơnêi têa pin hiăng pơtroh kơthô, krếo phôn pơtroh ăm Kăn xiâm hnê ngăn mâu kong têa, mâu khu tơrŭm cheăng lâp plâi tơnêi, mâu Đảng ƀă vâi pú lâp plâi tơnêi, mơnê hiăng mơhno tuăn pâ kân ƀă mâu rơkong kơ êng, mơhnhôk hơhlê hlo tơdroăng ki hiăng hía kân dêi Đảng, Tơnêi têa, Kuăn pơlê Việt Nam ƀă rơpŏng hngêi pôa Nguyễn Phú Trọng - Kăn xiâm pơkuâ hnê ngăn Đảng.

Mâu kăn xiâm pơkuâ hnê ngăn Đảng ƀă tơnêi têa púi vâ rơtế ƀă mâu kong têa, mâu khu tơrŭm pơtối veăng pêi tơdroăng púi vâ dêi pôa Nguyễn Phú Trọng - Kăn xiâm pơkuâ hnê ngăn Đảng djâ tơrŭm cheăng pơla Việt Nam ƀă mâu kong têa, mâu khu tơrŭm cheăng rế ton rế mơnhông tơƀrê, trâu tâ, ai tiô púi vâ pơxúa dêi kuăn pơlê rêm kong têa ƀă hnoăng veăng ‘no tăng troăng hơniâp lĕm, tơrŭm, kro mơdrŏng a kơpong ƀă tung lâp plâi tơnêi.