A rôh pêi cheăng, Ngế pro xiâm hnê ngăn tơnêi têa hiăng tơmâng kăn hnê ngăn Grup pơkuâ Adani tơbleăng ‘na Grup ƀă tơpui tơno ‘na mâu tơdroăng tơkêa ‘no liăn cheăng dêi Adani a Việt Nam ƀă ki ai hlâu, rôh tơ’lêi tơrŭm tung la ngiâ cho tơdroăng tơkêa Kơno Liên Chiểu Đà Nẵng, Tơraih tơƀai Chu Lai, Hngêi kơmăi on tơhrik Vĩnh Tân 3 ƀă hên ki ê.

Adani rơhêng vâ peăng Việt Nam pro tơ’lêi hlâu, tŏng gum tơdroăng pá puât ‘na chêh bro mơ-éa ăm mâu tơdroăng tơkêa kố. Tơpui akố, pôa Phạm Minh Chính - Ngế pro xiâm hnê ngăn tơnêi têa phiu ro hlo mâu tơdroăng cheăng tê mơdró ƀă troăng ngăn dêi Grup Adani tung pơla hdrối nah. Mơnhên tối tơdroăng tơrŭm cheăng, ‘no liăn pêi cheăng dêi Grup a Việt Nam ƀă rơhêng vâ mơnhông, po rơdâ tung la ngiâ.

Ngế pro xiâm hnê ngăn tơnêi têa tối nhên, Việt Nam phiu ro Grup ‘no liăn cheăng tung mâu kơvâ cheăng Việt Nam kơjo, cho on tơhrik, troăng prôk logictics. Ngế pro xiâm hnê ngăn tơnêi têa pơkâ thế kăn pơkuâ Grup hiăng tơpui tơno cho athế pêi ƀă athế pêi pro nhên tơdroăng cheăng vâ nhên mơngế, nhên tơdroăng, nhên mâu kế tơmeăm, nhên hnoăng cheăng pôu râng ƀă hiăng tơhrâ cho athế pêi pro, vâ mơdêk mâu tơdroăng tơkêa.