Sap ing hơnăm 2004 nah, kong pơlê Lâm Đồng hiăng pơkâ tơdroăng cheăng mơnhông pêi chiâk deăng xúa kơmăi kơmok chal nếo. 6 hơnăm kơ’nâi mê, cho hơnăm 2010, lâp kong pơlê hiăng mơnhông lối 6 rơpâu 400 ha, cho kơxô̆ tơnêi ki pêi chiâk pêi deăng xúa kơmăi kơmok chal nếo, tung mê, hngêi, hơkôp, hơpăm ki lêm ƀă nhĕng ai 1 rơpâu 170 ha; hơnăm 2015 kơxô̆ tơnêi ki kố pơtối tâk hên tâ lối 43 rơpâu ha ƀă hơkôp nhĕng mê châ vâ chê 3 rơpâu 150 ha. Troh hơnăm 2020, tâi tâng kơxô̆ tơnêi pêi chiâk pêi deăng xúa kơmăi kơmok chal nếo dêi Lâm Đồng ai 60 rơpâu 200 ha, kơxô̆ tơnêi ki hding ƀă nhĕng ai vâ chê 4 rơpâu 350ha, tung mê, ki hên tơnêi chiâk deăng ki hding ƀă nhĕng mê cho a pơlê kong kơdrâm Đà Lạt.

Pôa Trần Quang Duy, Kăn ngăn ‘na pêi pêt ƀă rak vế hdrê loăng kong pơlê Lâm Đồng tối ăm ‘nâi, xua tơdroăng ki mơjiâng hơkôp nhĕng mê ôh tá ai tơdroăng ki rak ngăn, ki rơhêng vâ tối cho mâu ƀăng tơnêi chiâk deăng ki ai hding hơkôp ƀă nhĕng, khu ngế, kế tơmeăm rak ngăn mâu troăng prôk, hno têa, kơpong ki tơbâ vế mâu tơmeăm roh vâi krâ nah, mơhno túa lĕm tro, mâu tíu ôm hyô, kong kế, nhâ loăng krip lĕm ƀă hên hĕng mâu tơmeăm ki ê hiăng ai tơdjâk troh kơphô̆.

Tơdrêng amê, ki hên, tơnêi chiâk deăng ki hding ƀă nhĕng ôh tá tro tiô tơdroăng ki pơkâ, ƀăng chiâk deăng ki lâi xuân ai lêm nhĕng, ôh tá krâ ’măn kơmăi ki mơ’no tah têa hbrông ing mê khoh chiâng ai on chếo kâ kân, pro têa rơlêa ƀă kơdroh tơdroăng ki hngiâm kơchoh têa, khoh chiâng ai têa tung kơdâm tơnêi, pro tơnêi rơlâm tơhnâp, pro têa chiâng châ lân lu hên ƀăng chiâk deăng ƀă hên hĕng mâu tơdroăng ki ê.

Pôa Trần Quang Duy tối ăm ‘nâi:

“Xua tơdroăng ki tơƀrê dêi pêi lo kế tơmeăm pro pơxúa kân khât ăm kuăn pơlê mê khoh châ mơnhông mơdêk rĕng. Xuân séa mơnhên ngăn peăng tơdroăng pơkuâ ngăn dêi tơnêi têa tá hâi teăm tơdrêng vâ rĕng ai troăng hơlâ ki pơkâ ƀă hnê mơhnhôk nhên ăm kuăn pơlê. Vâi lôi kuăn pơlê pro hơkôp ki lêm ƀă nhĕng mê, vâi mơjiâng hê̆n hĕng, tíu lâi xuân ai, achê dêi pó ing mê khoh chiâng ai tơdjâk troh hyôh kong prâi, troh tá tơdroăng rêh ối dêi kong kế, nhâ loăng ƀă hên hĕng mâu tơdroăng ki ê. Drêng ai tơdroăng ki păng ‘nâng kố, sap ing khế 10/2019, Vi ƀan hnê ngăn kong pơlê kal ai troăng hơlâ ki nhên ăm Khu ngăn ‘na chiâk deăng ƀă mơnhông thôn pơlê mơjiâng môi tơdroăng ki xiâm tung pơkuâ ngăn, séa mơnhên ngăn, kơdroh tơdroăng ki ‘mêi dêi hngêi nhĕng, hngêi lêm ƀă nhĕng tung kong pơlê Lâm Đồng”.

Tiah mê, kong pơlê Lâm Đồng dế tơkŭm pơkâ pêi pro mâu troăng hơlâ vâ kơdroh ƀă la ngiâ kô ôh pá ai xếo tơdroăng ki lêm nhĕng a mâu kơdrum chiâk deăng tung dế pơlê kong kơdrâm, kơpong ki ai kuăn pơlê rêh ối a pơlê kong kơdrâm Đà Lạt ƀă mâu tơring ki ối tâ tá. Ki xiâm dêi tơdroăng mê ối pơkâ troh a hơnăm 2025 kơdroh châ 20% kơxô̆ kơdrum chiâk deăng ki lêm nhĕng tâng vâ pơchông ngăn ƀă dế nôkố, ƀă troh a hơnăm 2030 kô kơdroh, ƀă la ngiâ kố oh tá ai xếo tơnêi kơdrum chiâk deăng ki lêm ƀă nhĕng tung dế pơlê kong kơdrâm Đà Lạt.

Vâ pêi pro tơdroăng cheăng ki kố, kong pơlê Lâm Đồng hiăng hnê thế mâu kơ koan, mâu khu râ séa mơnhên ngăn, mơjiâng mâu troăng hơlâ ki vâ tah lôi mâu kơdrum chiâk deăng ki lêm hơkôp nhĕng ki ôh tá tro phep. Tơdrêng amê, thăm mơdêk tơdroăng ki hơ’lêh tung pêi chiâk pêi deăng, xúa kih thuât pêi pêt ‘na chiâk deăng ôh tá lêm nhĕng a kuâ hơpăm, kuâ hơkôp; ing mê, hơ’lêh mơnhông pêi chiâk pêi deăng a kơphô̆, tơdroăng pêi chiâk deăng kal athế ai to mâu hdrê loăng ki dâi, ki ngiât lĕm, pêi adrêng, hưh cơ ƀă hên hĕng mâu tơdroăng ki ê vâ ga rak vế ki krúa lĕm ăm hyôh kong prâi, tơnêi tíu. Tâi tâng kơxô̆ liăn ki mơjiâng pro kố ai vâ chê 177 rơtal liăn, tung mê, kơxô̆ liăn dêi tơnêi têa mơjiâng pro bú ai 1,7%, ki u ối cho kơxô̆ liăn dêi khu râ, kơvâ cheăng, mơngế krê.

Pôa Phạm S, Kăn phŏ hnê ngăn Vi ƀan kong pơlê Lâm Đồng vêh mơnhên, tơdroăng ki tah lôi, tơdroăng kơdroh tơdroăng lêm hngêi nhĕng tung dế pơlê kong kơdrâm Đà Lạt ƀă mâu tơring ki ối tâ tá achê cho vâ thăm mơdêk tung tơdroăng rak ngăn kơdrum chiâk deăng ki lêm ƀă nhĕng, ing mê, vâ thăm mơdêk tơdroăng pêi chiâk pêi deăng xúa kơmăi kơmok chal nếo tơtro ƀă tơdroăng ki hơ’lêh dêi hyôh kong prâi.

“Ai hên mâu tơdroăng ki tối tiah kố pêi chiâk pêi deăng xúa kơmăi kơmok chal nếo cho xúa nhĕng vâ lêm a kuâ hơkôp, kuâ hơpăm ăm tơmeăm pêt, ki păng ‘nâng ôh ti xê pro tiah mê. Hơkôp ki lêm nhĕng ki ‘ló ga cho môi tung mâu tơdroăng pêi ki kŭn, mâu tơmeăm ki hding, lêm ăm tơdroăng ki tối pêi chiâk deăng xúa kơmăi kơmok chal nếo mê cho bu pro to ƀă tíu ki pêt kơchâi, reăng. Tung dâng vâ chê 20 hơnăm hdrối mê hía nah, tơnêi chiâk deăng ki lêm nhĕng a kuâ hơpăm, hơkôp a pơlê kong kơdrâm Đà Lạt ga hên ‘nâng, laga, tơdroăng ki vâ lêm ƀă nhĕng a mâu hơpăm chiâk deăng kal mơ’no liăn hên ó khât, mâu kăn rơpŏng hngêi ôh tá ai liăn ngân mê vâi pro hơkôp ki lêm ƀă nhĕng chiá krá, la pơtân tê, xua mê vâi khoh lêm ƀă nhĕng rĕng khât. Ngin hiăng pơkâ kơ’nâi hơnăm 2030 ah, kơxô̆ tơnêi chiâk deăng ki pro a tơdế pơlê kong kơdrâm Đà Lạt kô châ mơjiâng pro hơngế ing pơlê kong kơdrâm”.

Kong pơlê Lâm Đồng dế kơdo mơ-eăm mơjiâng Đà Lạt chiâng kơphô̆ ki tiô chal nếo, tíu xiâm dêi tơdroăng ôm hyô mâu xiâm loăng plâi, kơchâi, reăng; xuân cho tíu ki troh pơtê pơto hnối tơdjêp bro ƀă tơdroăng mơnhông “Kơphô̆ ki ối tung kong, kong tung kơphô̆”. Xua ti mê, tah lôi, ‘mâi hơ’lêh hơpăm, hơkôp ki lêm ƀă nhĕng lo ing tơdế pơlê kong kơdrâm cho tơdroăng ki kal khât ƀă tơdrêng hlối.