VOV4.Sêdang - Mâu khế hơnăm achê pơla kố, rơtế ƀă lâp tơnêi têa, mâu kong pơlê, pơlê kong kơdrâm a Tây Nguyên hiăng hlo ai hên kơpôu ro ki êi kéa, môi tiah lo pơtong a kéa. Dế nôkố, kơvâ ngăn ‘na khăm pơlât kơpôu ro, khu kăn pơkuâ ƀă mâu kuăn pơlê a pơlê cheăm dế pêi pro mâu tơdroăng vâ hbrâ mơdât pơreăng ki tâ tú a kơpôu ro kố. Tơdroăng “Rơtế prôk ƀă mơngế pêi chiâk” hâi kố, ngin ai tối ‘na tơdroăng ki ai păng ‘nâng a 2 kong pơlê Kon Tum ƀă Gia Lai

Tiô tối tơbleăng ing Khu xiâm ngăn păn mơnăn ƀă pơlât mơnăn dêi kong pơlê Kon Tum, tíu tâ tú pơreăng êi kéa po pom châ re\ng hlo má môi a tơdế khế 5 kố nah a mâu ro dêi péa rơpŏng kuăn pơlê a thôn Đăk Tem, cheăm Ngọc Tem, tơring Kon Plông ai 3 to ro ki tro pơreăng mê. Klêi mê dâng 10 hâi, kơ koan ngăn pơkeăng pơlât mơnăn pơtối nhôm ai tơ’nôm 2 tíu tâ tú pơreăng a 2 to ro ki tro a pơlê Rắc, cheăm Ya Xiêr, tơring Sa Thầy ƀă thôn 3, cheăm Ia Dom, tơring Ia H’Drai.

Klêi châ ‘nâi mâu tíu tâ pơreăng, Khu ngăn păn - pơlât mơnăn hiăng thế prâu tah 5 to ro ki tro pơreăng, hlối pêi pro tơdroăng hdró kơpong ki tâ pơreăng vâ mơdât pơreăng. Laga tâi tâng mâu ro 105 rơpâu to, hâi teăm châ pâk vaccine hbrâ mơdât pơreăng, ki tơ’lêi tâ tú dêi pơreăng êi kéa lo po pom tâ tú lâp ku khu ro, a Kon Tum dế tâ tú hên.

Môi to ro tro pơreăng êi kéa po pom a tơring Kon Plông, Kon Tum

Pôa Hà Thanh Lâm, Ngế pơkuâ ƀơrô mơdât pơreăng, Khu ngăn ‘na păn ƀă pơlât mơnăn kong pơlê Kon Tum ăm ‘nâi:

 “Ƀă mâu tơring cheăm tung kong pơlê dế ai pơreăng mê kăn ƀô̆ cheăng ‘na kơvâ ki mê dêi khu xiâm ngăn păn mơnăn tơrŭm ƀă mâu kăn  kơvâ cheăng dêi Ƀơrô ngăn pêi chiâk deăng ƀă mâu kăn tơring cheăm tíu ai tâ pơreăng hnê tối, mơhnhôk, hnê kuăn pơlê thế ‘nâi pơreăng tung thôn tơná, cheăm tơná ƀă mâu troăng hơlâ mơnhông mơdêk tơbleăng pêi tro tiô pơkâ.

Mê cho mơgrúa krúa, tRâ văng nhâ êa rơtoh, kui tah trâp drô troăng têa hbrông vâ kơdroh pôi tá ai mâu pơreăng hmuâ ối. Klêi mê xôh pơkeăng kơdê pơreăng, ƀă hnê kuăn pơlê thế đi đo rak ngăn vâ ‘nâi mâu tơdroăng pơreăng tâ tú a mâu kơpôu ro dêi tơná păn”.

A Gia Lai, cho kong pơlê achê tíu tơkăng kong ƀă Kon Tum, tung mâu hâi hdrối kố nah hiăng hlo ai 4 tíu tâ tú pơreăng êi kéa po pom a kơpôu ro dêi kuăn pơlê ki păn a 3 tơring ƀă dế hlo tâ tú lâp lu. Ngoh Đơng, pơlê Brếp cho môi ngế tung mâu rơpŏng kuăn pơlê ki apoăng a cheăm Đăk ‘Jrăng, tơring  Mang Yang, kong pơlê Gia Lai ai ro tro pơreăng êi kéa po pom. Hâi lơ 27/5, ngoh hiăng châ hlo a 4 to, tung 20 to ro dêi tơná hlo ro lo têa môh, lo ‘nhêa mâ, lâp kéa châ ai mâu tíu êi tơrân tân, la ôh tá teăm pơlât, mê hiăng pro 2 to ro klâ:

“Rơpŏng hngêi á ai 4 to ro. Rôh apoăng hlo lo po pom, á ôh tá ‘nâi ro tro ti lâi, á rak ngăn tiah hmâ, klêi mê ai 2 to ro hlâ. Cheăm hnê kuăn pơlê rak ngăn, kroăng ro ki hiăng rơ-ốu hiăng tâ pơreăng”.

Bu tung péa pái hâi klêi kơ’nâi châ ‘nâi ro tro pơreăng a 2 pơlê dêi cheăm Đăk ‘Jrăng, tơring Mang Yang, têa rơtốu lo a kéa ing pơreăng êi kéa po pom a ro hiăng hlo tâ  tú troh a 2 to cheăm Đăk Đoa ƀă 1 to cheăm dêi tơring Čư Sê, ƀă tâi tâng mâu ro ki tâ pơreăng ai 47 to. Tối ’na tơdroăng mơdât pơreăng mê, pôa Lữ Quốc Tuấn, Kăn phŏ hnê ngăn Vi ƀan cheăm Ia Pêt, tơring Đăk Đoa, Gia Lai ăm ‘nâi:

 “Tơkŭm mơdât a mâu troăng vâ mot tung thôn, cheăm, xôh pơkeăng kơdê pơreăng a lâp tung cheăm. Ƀă mâu kơpôu ro chu ki păn, mâu rơpŏng ai păn ro ki tro tâ pơreăng, mê cheăm tơbleăng thế ăm mâu droh rơtăm, khu ngăn kuăn pơlê pêi chiâk xôh pơkeăng 1 hdroh tung 1 hâi; ƀă mâu rơpŏng ai ro tro hâi teăm tâ pơreăng thế tơkŭm xôh pơkeăng 1 hdroh tung 2 hâi”.

Nôkố, tâi tâng mâu ro a kong pơlê Gia Lai ai lối 435 rơpâu to, kơxô̆ ki kố hên má 2 tung lâp tơnêi têa; ki hên cho păn iâ utâi utá, tung kơpong hdroâng kuăn ngo. Tơdroăng hbrâ mơdât pơreăng ăm mâu ro ki păn ai pơxúa khât tung tơdroăng mơnhông cheăng kâ dêi kuăn pơlê. Xua mê, Vi ƀan kong pơlê Gia Lai hiăng ai hlá mơ-éa pơtroh tơdrêng ‘na tơdroăng tơbleăng mâu tơdroăng hbrâ mơdât pơreăng êi kéa po pom a a kơpôu, ro ki păn tung kong polê.

Ing mê, Vi ƀan kong pơlê Gia Lai thế mâu cheăm, tơring tung kong pơlê ƀă kơvâ ngăn ‘na pêi chiâk pro kơtăng mâu troăng hơlâ pơkâ mơdât pơreăng ôh tá ăm pơreăng châ tâ tú, rôe vaccine pâk ăm kơpôu ro, pêi pro tơdroăng tŏng kum ƀă prâu tah mâu kơpôu ro ki tâ pơreăng, séa ngăn kơtăng mâu kơpôu ro ki păn vâ hbrâ pêi pro mâu troăng hơlâ ki pơkâ.

Kăn ƀô̆ ngăn pơkeăng pơlât mơnăn Gia Lai khăm pơlât kơpôu ro

Pôa Dương Ngọc Thanh, Kăn phŏ hnê ngăn pơlât mơnăn kong pơlê Gia Lai tối tiah kố, mâu kế ki xiâm djâ tâ tú pơreăng êi kéa po pom a ro cho mâu rối, tri trôu. Tơdroăng kố tơ’nôm ƀă khôi túa păn kơ’nêi hmâng vâ ƀă kong tô pơ-oh, ‘na hngiâm kơchoh têa achê kố cho ki xiâm pro tơ’lêi tâ pơreăng êi kéa lo po pom a mơnăn tâ tú troh lâp lu. Pôa hnê tối ăm kuăn pơlê thế tơtrŏng hbrâ mơdât pơreăng:

“Mơni pơreăng kô tâ tú lâp lu xua tơdjâk ing pơreăng môi tiah mâu rối văng, gá pruân hrik têa ‘mêi gá kô kâi kơneăng troh hơngế  tơko\ng djâ pơreăng pâk a kơpôu ro ki kố troh ro ki ê. Tơdroăng kố, ƀă kuăn pơlê ki păn mơnăn, malối mâu ngế păn ro, thế rak ngăn krâu dêi ro, thế rôe vaccine vâ pâk pơkeăng mơdât pơreăng, pro ăm ai kế mơjiâng chiâng mơheăm. Drêng hlo kơpôu ro tơviah thế tơbleăng tơdrêng ăm mâu kăn cheăm vâ tơrŭm ƀă mâu kơ koan cheăng kơvâ pơlât hnê hbrâ mơdât pơreăng’’.

VOV Tây Nguyên