VOV4.Sêdang - A kong pơlê Lâm Đồng pơreăng COVID-19 hiăng kâi hbrâ mơdât, yă mâu plâi, pôm pơxiâm to kơnâ, kuăn pơlê Đà Lạt dế tơkŭm pơtối ‘mâi mơnhông pêi chiâk pêi deăng.

Klêi kơ’nâi môi pơla ton tĭn rơhĭng rơhối, pơtê pêi kâ xua yă mâu tơmeăm pêi lo ing chiâk deăng chu rơpâ, tro lŭp ó, hên kơdrum kơchâi – reăng a Đà Lạt ƀă mâu kơpong ki achê mê dêi kong pơlê Lâm Đồng hiăng pơxiâm vêh pêi kâ, rĕng pêt tơmeăm vâ teăm tê ăm kơchơ tê mơdró. Jâ Nguyễn Thị Thu, ối a bêng 8, pơlê kong kơdrâm Đà Lạt tối ăm ‘nâi, xua pơreăng hiăng chôa ‘lâng châ mơdât, tơdroăng pơto tơmeăm xuân châ pơto tơ’lêi hlâu xua mê mâu tơmeăm pêi lo ing chiâk deăng hiăng vêh mơdêk yă, tung mê ki phá tơ-ê cho tơmeăm kơchâi hơlât hiăng tâk hên tâng pơchông ƀă hâi tiah hmâ. Xua mê, jâ ƀă hên rơpŏng kuăn pơlê ki ê tung pơlê kong kơdrâm dế thâ vêh mơ’no liăn pêi kâ vâ tê ăm mâu ngế tê mơdró.

“Pơla kố nah ôh tá ai kơchâi drêh xếo, hơlât to yă troh 1.000 liăn/xiâm. Nôkố yă hiăng vêh châ 600 liăn troh 800 liăn/xiâm tâng pơchông tiah yă hâi hdrối ôh tá ai pơreăng COVID-19. To lâi khế hiăng hluâ kuăn pơlê iâ pêt xua lŭp hên ƀă ôh tá châ tê, nôkố kơchâi drêh yă to kơnâ mê vâi pơxiâm vêh pêt. Hvái ngăn tơdjuôm kơchâi drêh dế mơdêk yă, kuăn pơlê pêi chiâk deăng phiu ro thế tơkŭm vêh pêi kâ’’.

Yă mơdêk, kuăn pơlê pêi chiâk deăng dế thăm rak ngăn reăng cúc vâ tê tung kơchơ mơdró

Ôh tá xê to kơchâi drêh, mơngế pêt reăng cúc a Đà Lạt xuân phiu ro xua yă reăng hiăng tâk rĕng tâk troh 30.000 rơpâu liăn/kơƀin cúc lưới, 15.000 liăn/kơƀin reăng tiah hmâ. Ƀă kơlo yă kố, rêm sao reăng cúc kuăn pơlê pêi chiâk deăng châ laih 40 rơtuh liăn. Tiô pôa Nguyễn Đình Thuận, ối a bêng 7, pơlê kong kơdrâm Đà Lạt, xuân pơtê pêt kơchâi drêh, reăng tung môi pơla ton, tơmeăm ôh tá bê tiô tơdroăng kal vâ xua mê yă mâu tơmeăm pêi lo ing chiâk deăng nếo kơdrâ to hên.

Mơhé ‘nâi tơdroăng hên mơngế rơtế vêh mơ’no liăn pêt, mơni tíu tê tơmeăm pêi lo ing chiâk deăng tung la ngiâ kô ôh tá tơdâng tơ’mô, chiâng trâm hên tơdroăng ôh tá tơniăn, laga ƀă pơreăng xông tâ tú chôa ‘lâng kâi mơdât ƀă tơniăn môi tiah nôkố, pôa xuân pói tơngah tơdroăng pêi pêt tơmeăm kô châ tơƀrê tung mâu rơnó la ngiâ. Pôa Nguyễn Đình Thuận, tối:

“Tối tơdjuôm ƀă yă reăng cúc môi tiah nôkố mê mâu ngế ki pêt châ liăn hên, châ liăn rơkâ. A hơnăm nah rơnó kố mê reăng cúc dế ai yă 40.000 liăn, hơnăm kố xua COVID-19 xua mê hiăng kơdroh ‘nâng. Kơchơ tê mơdró rơnó kố mê á ôh tá ‘nâi hdrối chiâng tơdroăng klâi, nôkố mơngế pêt reăng cúc châ yă kơnâ ƀă mâu reăng ki ê pơrá thế pui tah tâi tâng’’.

Châ ‘nâi, vâ tŏng kum kuăn pơlê pêi chiâk deăng, khu tê mơdró tơmeăm pêi lo ing chiâk deăng, kơvâ pêi chiâk deăng Lâm Đồng dế mơhnhôk pêi pro trang thông tin tê mơdró điê̆n tưh ‘’Tơmeăm pêi lo ing chiâk deăng kong pơlê Lâm Đồng’’ hneăng hơnăm 2021 – 2025. Pơtối mê, tơmeăm pêi lo ing chiâk deăng tŭm túa dế mot a rơnó pêi lơ hiăng vâ pôe xo dêi tơmeăm kô tơbleăng tơdrêng vâ mơdêk tơdroăng ki tơdjêp pơla tơdroăng pêt tơmeăm ƀă kal vâ, kum rak tơniăn tíu tê tơmeăm pêi lo ing chiâk deăng ăm kuăn pơlê pêi chiâk.

Quang Sáng chêh

A Sa Ly tơplôu ƀă tơbleăng