Pôa A Hring, hdroâng Rơteăng ối a pơlê Têa Rơman, cheăm Đăk Rơnga, tơring Đăk Tô, kong pơlê Kon Tum ai tối tiah kố: Rơpŏng pôa xuân môi tiah 120 rơpŏng tung pơlê nôkố hiăng ai tơdroăng rêh ối tơniăn, kro mơdrŏng tiah nôkố kơnôm ai tơdroăng tŏng kum kơhnâ khât dêi kăn ƀô̆ hnê mơhnhôk ‘na pêi chiâk deăng dêi tơring ‘na hnoăng hnê mơhno tối, lơ tăng rah mâu hdrê loăng ki tơtro ƀă hyôh kong prâi, tơnêi tíu ƀă vêh pro pơxúa ‘na tơdroăng cheăng kâ-rêh ối. Tơdroăng rêh ối hiăng chía tơtêk kro iâ, môi pâ kơnôm ai tơdroăng veăng kum kơhnâ khât dêi Hngêi rak liăn ing hnoăng kum ăm mung liăn. Maluâ ti mê, vâ khoh châ pêi pro ai pơxúa khât ‘na pêi lo kế tơmeăm, klêi kơ’nâi châ mung liăn, athế xúa tơtro tung tơrêm tơdroăng cheăng: Ing tơdroăng po pông tơnêi, tăng rah hdrê loăng, phon rơvât, hnoăng po văng nhâ, rak ngăn xuân athế châ hriâm ngăn i nhên. Ai mâu rơpŏng ‘nâ tung pơlê ai tơnêi, châ mung liăn, klêi mê mơ’no liăn cheăng kâ, laga, xua pêi cheăng kâ ôh tá châ tơƀrê xua ga tơdroăng xúa kơxô̆ liăn mê pêi pro mâu tơdroăng ki tá hâi teăm tơtro khât. Laga, ƀă rơpŏng pôa A Hring ga phá tơ-ê, ‘nâi hriăn plĕng vâ mơ’no kơxô̆ liăn tro roh, tro rơnó, tro tơdroăng, ing mê, nếo châ mơdêk ki mung liăn tơƀrê păng ‘nâng. Mâu hâi ki kố, drêng pơxiâm mot tung rơnó krí plâi kơphế, pôa A Hring hiăng ‘măn dêi lối 100 rơtuh liăn, rôe djâ vêh dêi a hngêi ai 50 tâ̆n phon eâk ro, phon vi sinh, vâ teăm rĕng rơvât ăm kơdrum deăng klêi kơ’nâi krí dêi plâi kơphế.

“Á mung liăn ing hngêi rak liăn Agribank tơring Đăk Tô lối 1 rơtal, mơ’no rôe hdrê loăng kơxu, phon rơvât, rôe hdrê loăng plâi mắc-ca (drêng mê nah yă ai 55 rơpâu liăn 1 xiâm). Dế nôkố á hiăng ai lối 7 ha loăng kơxu, 4 ha loăng mắc-ca... Tung hơnăm kố, á kô mơdrếo tâi tâng kơxô̆ liăn chĕn dêi Hngêi rak liăn, pơtối pêi pêt kế tơmeăm mơnhông pêi cheăng kâ”.

Xuân a pơlê Têa Rơman, rơpŏng pôa A Chăc ai 10 ha loăng kơxu, 6 ha loăng kơphế, mắc-ca. Riân to rơnó krí a hơnăm ki kố nah, tung 4 ha loăng mắc-ca pêt tơvât tung kơdrum loăng kơphế hiăng châ 5 tâ̆n. Tê mắc-ca ối drêh tung kơdrum deăng 1 tâ̆n châ 32 rơtuh liăn, rơpŏng pôa hiăng châ xo dêi lối 150 rơtuh liăn. Pôa A Chăc hiăng mĕn mơdâng hngêi kân rơdâ, krá lĕm, rôe rơxế ô tô ki kơnâ liăn ƀă mơ’no liăn kum ăm dêi kuăn ‘nĕng, cháu cháu châ hriâm tŭm.

“Kơnôm châ mung liăn ing Hngêi rak liăn kum ‘na Chiâk deăng dêi tơring Đăk Tô á hiăng mơ’no liăn rôe hdrê loăng plâi mắc-ca, kơphế, sầu riêng ƀă mâu hdrê loăng ki ê, rôe phon rơvât, pơkeăng xôh kơdê oâ hdrong... Xua mơ’no liăn vâ pêi pro tro tơdroăng mê vâi krâ ngin akố pêi châ hên kế tơmeăm, liăn ngân tơniăn, ki rơhêng vâ tối, xua ‘nâi mơ’no pêt hdrê loăng kơphế mê vâi krâ-nhŏng o tơniăn tung tơdroăng mơdrếo liăn rêm khế dêi hngêi rak liăn. Tâng vâ tối, pơchông ngăn ƀă 10 hơnăm hdrối nah, tơdroăng rêh kâ ối dêi vâi krâ-nhŏng o akố hiăng hơ’lêh hên ‘nâng”.

Pôa A Như, kăn thôn Plei Lay, cheăm Ya Chim, pơlê kong kơdrâm Kon Tum tối ăm ‘nâi: Plei Lay ai 296 rơpŏng, ai 960 pơ’leăng mâ mơngế, ki hên to hdroâng mơngế Jarai. Vâ chê tâi vâi krâ-nhŏng o tung pơlê pơrá châ mung liăn ing Hngêi rak liăn kum kluăn pơlê kơtiê ƀă Hngêi rak liăn Agribank vâ mơ’no mơnhông pêi chiâk pêi deăng. Pôa A Dit, môi rơpŏng ki nếo ối a Plei Lay, dế mơjiâng môi toăng hngêi kơnâ vâ chê 150 rơtuh liăn, ai tối tiah kố:

“Á cho hdroâng Jarai, mơnê Hngêi rak liăn hiăng kum ăm á châ mung liăn, tâi tâng kơxô̆ liăn á châ mung mê ai 50 rơtuh liăn. Á chiâ klôh păn ká, pêi pêt xêh kơphế, tiu, rơpŏng ngin tâng vâ tối ‘na tơdroăng rêh kâ ối xuân chía niân tâ hdrối nah. Tơdroăng châ xo dêi kế tơmeăm, tê dêi tiu xuân dah châ liăn chía hên mê xuân chía ro. Á mơnê Hngêi rak liăn hiăng kum ăm vâi krâ-nhŏng o ai liăn vâ pêi cheăng kâ”.

Nâ Y Cô Viên, ối a pơlê Kep Ram, cheăm Hoà Bình, Pơlê kong kơdrâm Kon Tum ai kơdum loăng kơxu kân rơdâ châ 2 ha 5 sao, păn 13 to pu pái, 1 ha deăng pôm loăng, 8 sao klâng pêt 2 rơnó báu. Ing deăng kơxu, deăng pôm, khu pu pái mê, hơnăm 2022 nâ hiăng châ kơdĭng dêi lối 80 rơtuh liăn. Nâ Y Cô Viên tối tiah kố: Dế nôkố dế pro hlá mơ-eá vâ mung liăn ing hngêi rak liăn dâng 150 rơtuh liăn vâ pro hnôu ƀă tíu ki mơdró tơmeăm.

“Á mơ’no dêi liăn vâ pêt loăng kơxu, păn ro, pu pái. Xo kơxô̆ liăn ki mê rôe hdrê ro pin tung pơlê, kô kơhnâ mơ-eăm păn roăng, rak ngăn dêi ro, pu pái tơná. Ki má péa nếo, á kô xúa kơxô̆ liăn ki mung mê vâ mơdâng pro hngêi mơdró phon. Xo phon ing kŏng ti, tê ăm vâi krâ-nhŏng o, kum ăm kuăn pơlê châ tơ’lêi lăm rôe phon achê hngêi, yă xuân chía rơpâ, vâ kuăn pơlê tơ’lêi châ rôe, ai phon rơvât dêi tơmeăm pêt ki hiăng pêt mơjiâng. Ki má pái, tơdroăng mơjiâng pro hngêi mơdró kố kô tơ’lêi tung pêi lo liăn ngân iâ êt”.

Pôa Nguyễn Công Thành Phương, Kăn phŏ pơkuâ Hngêi rak liăn Agribank, ai tíu pêi cheăng a kong pơlê Kon Tum tối ăm ‘nâi: Tâi tâng kơxô̆ liăn ki vâi krâ - nhŏng o hdroâng kuăn ngo mung ing Hngêi rak liăn Agribank ai vâ chê 650 rơtal liăn, tâi tâng ai lối 4 rơpâu ngế mung. Tơkéa vâ tối tâi tâng vâi krâ mung kơxô̆ liăn ki mê vâ rôe hdrê, pêi pêt, păn mơjiâng tro tơdroăng, mê khoh châ mơnhông ki tơƀrê tung kơdroh kơklêa, xăm kơtiê.

“Ki hên mâu vâi krâ-nhŏng o mung liăn cho vâ mơdêk păn mơnăn mơnôa, kơpôu ro, pêi pêt hdrê tơmeăm. Pakĭng tơdroăng ki ăm mung liăn châ ôh tá mơdrếo laih hên, Agribank ki ai tíu cheăng a kong pơlê Kon Tum hiăng rơnáu pêi pro dêi xêh tung mâu roh hnê tối, tơbleăng pơtâng ‘na troăng hơlâ, troăng pơkâ dêi Đảng, Tơnêi têa, tơbleăng tối mâu túa cheăng ki lĕm tro, túa pêi pro ki nếo veăng kum mơdêk ki hloh hlê rơkê plĕng ăm vâi krâ-nhŏng o hdroâng kuăn ngo ki iâ mơngế”.