Mâu ngế ki veăng tơ’noăng cho kăn ƀô̆, mơngế pơkuâ, kăn pơkuâ mâu khu râ pơkuâ cheăng a kong pơlê ƀă Vi ƀan hnê ngăn mâu tơring, pơlê kong krâm, pơlê kong kơdrâm, Vi ƀan hnê ngăn mâu cheăm, bêng, pơlê kân ƀă kuăn pơlê Việt Nam sap ing 18 hơnăm tơngi klêng, nôkố dế rêh ối, pêi cheăng, hriâm tâp a kong pơlê Dak Lak.

Tơdroăng ki xiâm mê cho: troăng hơlâ pơkâ dêi Đảng, Tơnêi têa ƀă kong pơlê Dak Lak tơdjâk troh tơdroăng ki tơbleăng, pêi pro hnoăng cheăng hơ’lêh chêh pro hlá mơ-éa Tơnêi têa pơla hơnăm 2021 – 2025, troăng pơkâ tơmiât troh hơnăm 2030.

Pôa Bạch Văn Mạnh, kăn pơkuâ Khu ngăn kong pơlê, tơring cheăm ƀă hnoăng cheăng dêi mâu kăn ƀô̆ kong pơlê Dak Lak ăm ‘nâi, kố cho hơnăm ki má 2 kong pơlê Dak Lak tơkŭm po rôh tơ’noăng tơdrêng ing troăng hyôh internet tăng ‘nâi túa ki hơ’lêh chêh pro hlá mơ-éa râ kong pơlê.

Ing rôh tơ’noăng, khu kăn ƀô̆, mơngế pơkuâ, mơngế cheăng kơ koan cho khu ki prôk ahdrối tung tăng ‘nâi, hriăn ngăn trâu hngế, ‘nâi nhên tơdroăng ki xiâm, troăng hơlâ, túa pơkâ ‘na hơ’lêh chêh pro hlá mơ-éa xúa tung tơdroăng cheăng rêm hâi tiô túa ki tơƀrê tâ.