Tiô khu ngăn hnê hriâm ƀă hnê mơjiâng tuăn ngoâ rơkê kong pơlê Dak Nông, hơnăm hriâm 2023 – 2024 lâp kong pơlê ối kal 1021 ngế thái cô ƀiên chê̆, tung mê, râ mầm non kal 235 ngế, râ má môi ối kal 324 ngế, râ má péa kal 260 ngế ƀă râ má pái kal 202 ngế.

Tơdroăng ki ối kal thái cô kố hiăng tơdjâk ó khât troh tơdroăng hnê ƀă hriâm, malối cho a kơpong hngế hngo, kơpong hdroâng kuăn ngo. Vâ tŏng kum pơtân ‘na tơdroăng kố, Vi ƀan hnê ngăn kong pơlê Dak Nông nếo pơtroh ăm Hô̆i đong hnê ngăn kong pơlê séa ngăn tơbleăng 622 tơkêa thái cô, hâi khế kĭ hlá mơ-éa tơkêa cho 12 khế.

Jâ Nguyễn Thị Thu Hương, Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Nông ăm ‘nâi, maluâ ối kal lối 1 rơpâu ngế thái cô la bu tí tăng ‘nâi plĕng 622 ngế cho pêi pro tiô Pơkâ 111 hơnăm 2022 dêi Chin phuh. ‘Na ki ton xŏn, kong pơlê pơtối pâ thế tơnêi têa vâ ‘mot tơ’nôm ƀiên chê̆ ăm kơvâ hnê hriâm kong pơlê, rak vế tŭm kơxô̆ ngế thái cô tiô pơkâ.