To lâi hơnăm hdrối, rơpong hngêi BNướch Ngang, ối a tôh kơphô̆ phô̆ A Duông, pơlê kân Prao, tơring kong ngo Đông Giang, kong pơlê Quảng Nam cho rơpŏng kơtiê. Rêm hâi, pôa BNướch Ngang lăm tung kong pêi chiâk pêt pôm, pêt xik, pêt loăng plâi hôt..., tơdroăng rêh ối xơpá hên. Klêi mê, pôa BNướch Ngang châ Kơvâ ngăn pêi chiâk  kong pơlê Quảng Nam ƀă mâu kăn tơring Đông Giang veăng kum hdrê pêt pro kơdrum deăng, pêt kong.

Nôkố, pôa BNướch Ngang hiăng ai 4 ha pêt sâm ba kích prâp, 5ha loăng nhĕn ƀă loăng hré, loăng hâng. Pakĭng mê, pôa ối tơkŭm păn pú pái, păn chu prăng... rêm hơnăm, châ xo dêi rơkâ sap 150 rơtuh troh 200 rơtuh liăn. Pôa BNướch Ngang cho môi ngế đảng viên đi đo djâ troăng a hdrối tung mâu tơdroăng cheăng. Pôa nôkố pro Tôh trương tôh kơphô̆ A Duông, pơlê kân Prao, tơring Đông Giang. Pôa mơdoh hên chôu vâ trâm tơpui tơno hlối hnê kuăn pơlê kuăn ngo Cơ Tu mơnhông cheăng kâ. Ngế ki lâi kơtiê xơpá, tơxâng kal tŏng kum mê pôa kô kum hdrê pêt, pôa BNướch Ngang vâ kum mâu ki pá puât:

“A cho đảng viên thế pro djâ troăng lĕm ahdrối ăm mâu kuăn pơlê ki ê tung thôn hlo. Túa á pêi cheăng kâ tơƀrê hên kuăn pơlê dế hriâm pêi ƀối. Rêm hdroh hôp thôn ƀă đi đo hnê kuăn pơlê pêt mâu hdrê loăng plâi hlối hnê túa rak ngăn loăng plâi păn mơnăn. Púi vâ mâu kăn pơtối tŏng kum ăm mâu rơpŏng  hngêi ai tơnêi pê kâ ăm hdrê pêt, kum hnê kuăn pơlê pêi cheăng kâ vâ ai kơxô̆ liăn pê lo’’.

Pôa BNướch Ngang đi đo hnê kuăn pơlê rêh ối lĕm tro tiô túa nếo, tah túa tơlá ton nah ki ôh tá tro. Pôa A Lăng Minh, kuăn ngo Cơ Tu ối a pơlê kân Prao hơ’muăn hdrối nah, rơpŏng hngêi pôa kơtiê châ pôa BNướch Ngang lăm pôu tơrêm hngêi hnê túa pêi cheăng kâ, hnê păn mơnăn ƀă pêt loăng plâi troh nôkố tơdroăng rêh ối hiăng kơdroh ki xơpá.

“Đảng viên BNướch Ngang djâ troăng ahdrối mơnhông cheăng kâ a thôn pơlê. Pakĭng hnê kuăn pơlê túa păn mơnăn môi tiah pêt rak ngăn sâm ba kích prâp mê tơdroăng rêh ối dêi kuăn pơlê tơniăn, hiăng hluăn kơtiê’’.

Hên đảng viên hơnăm ối nếo a kơpong hngế hngo Đông Giang, kong pơlê Quảng Nam hiăng mơdêk hnoăng cheăng djâ troăng ahdrối, khên tơmiât, khên pêi, mơ-eăm pêi cheăng kơhnâ vâ hluăn kơtiê. Đảng viên  hơnăm ối nếo A Ting Nấu, ối a pơlê kân Prao, tơring Đông Giang xuân cho môi ngế pêi cheăng kơhnâ djâ troăng a hdrối. Nôkố, A Ting Nấu hiăng pro kơdroăng păn chu hdrê kŭn, păn pêap, chiâ long păn ká ƀă pêt hên hdrê loăng plâi mê cho plâi sầu riêng, loăng lòn bon ƀă hên ki ê.

Pôa Nguyễn Hữu Sanh, kăn ngăn Khu kuăn pơlê pêi chiâk deăng tơring Đông Giang, kong pơlê Quảng Nam ăm ‘nâi: hên ngế đảng viên tíu kố xuân mơhno hnoăng cheăng pêi djâ troăng ahdrối tung pêi chiâk kâ mơnhông cheăng kâ ăm rơpŏng hngêi, Hiăng hlo hên mâu ngế pêi cheăng kơhnâ djâ troăng ahdrối môi tiah pôa BNướch Ngang, A Ting Nấu... vâi mơhno ăm hlo nhên hiâm tuăn pêi cheăng kơhnâ dêi mơngế “đảng viên prôk ahdrối, kuăn pơlê prôk kơ’nâi’’, cho mâu ngế ki kơhnâ tung pêi cheăng mơhno ăm kuăn pơlê hlo hlối mơnhôk kuăn pơlê mơnhông pêi chiâk deăng vâ kơdroh kơklêa xăm kơtiê:

“Đảng viên djâ troăng ahdrối tung mơnhông cheăng kâ. Má môi, cho đảng viên cho mâu kuăn pơlê ki djâ troăng ahdrối tơbleăng pêi mâu túa cheăng kâ, malối mơnhông pro kơdrum deăng pêt loăng plâi, păn mơnăn, chiâng kơdrum kơdroăng ki pê ahdrối tung  pêi cheăng kâ ai pơxúa kum kuăn pơlê mơnhông pro kro mơdrŏng ƀă hluăn kơtiê krá tơniăn”.

Rêm hơnăm, Khu kuăn pơlê pêi chiâk kong pơlê Quảng Nam tơrŭm ƀă mâu kơvâ cheăng, kong pơlê, kơjo kum 1.500 ngế đảng viên cho mâu ngế tung Khu kuăn pơlê mung liăn pêi cheăng kâ tơvêh tơkâ iâ, mung hdrê pêt, hdrê păn, kum mâu đảng viên mơnhông cheăng kâ. Pôa Hồ Quang Bửu, Kăn phŏ hnê ngăn Vi ƀan kong pơlê Quảng Nam ăm ‘nâi: hên đảng viên ôh tá xê to pêi cheăng rơkê mê ối kơhnâ veăng kum hên ngế kuăn pơlê ki kơtiê xơpá ‘nâi túa pêi cheăng, mơdêk pê lo kế tơmeăm, mơnhông tơniăn tung rêh ối, veăng mơjiâng thôn pơlê nếo:

“Nôkố, ai mâu đảng viên a tơring kong ngo vâi mơnhông cheăng kâ hlo tơƀrê, vâi veăng pêi cheăng kâ ki tơluâ tơƀrê ƀă cho mâu ngế ki djâ troăng a hdrối ăm kuăn pơlê pro ƀối. Mê cho vâi pêt sâm ƀă pêt nhâ loăng pơkeăng pro pơxúa cheăng kâ. Tâng a kơpong kong ngo ai hên đảng viên ki kơhnâ pêi troăng lĕm ahdrối tiah mê, mê tơdroăng rêh ối dêi kuăn pơlê kô mơnhông  pơ’lêh hơ‘lêh tơ ê.