Đội K53 Kon Tum djâ lêng lăm tăng rôu kơxêng kiâ mâu mố đô̆i ki hlâ a kong têa Lếo ƀă Kul
Thứ tư, 06:00, 25/10/2023
Tơplôu: Gương/VOV Tây Nguyên
Tơplôu: Gương/VOV Tây Nguyên
VOV4.XơĐăng - Kơxo hâi lơ 24/10, a Tíu pêi cheăng dêi Khu xiâm pơkuâ ngăn lêng kong pơlê Kon Tum, Khu hnê mơhno 515 kong pơlê Kon Tum tơkŭm po Leh djâ mâu lêng Đô̆i K53 lăm pêi hnoăng cheăng tăng rôu, tơkŭm xo kơxêng kiâ mâu lêng mố đô̆i ƀă mâu pleăng hnoăng cheăng ƀă mơngế ki rơkê Việt Nam hlâ tung mâu rôh tơplâ a kong têa Lếo ƀă Kul.
Tung rơnó mơdrăng hơnăm 2023-2024, Đội K53 kong pơlê Kon Tum ƀă 67 ngế kăn ƀô̆ mâu lêng kô pêi hnoăng cheăng tăng rôu xo tơkŭm kơxêng kiâ mâu lêng mố đô̆i ƀă mâu ki rơkê dêi Việt Nam hiăng hlâ tung mâu rôh tơplâ a 3 to kong pơlê: Attapeau, Sekong, Champasak, dêi kong têa Lếo ƀă kong pơlê Rattanakiri, kong têa Kul.
Tơbleăng a rôh leh djâ lêng Đội K53 lăm tăng rôu kơxêng kiâ mố đô̆i, jâ Y Ngọc, Kăn phŏ hnê ngăn Vi ƀan kong pơlê, Ngế pơkuâ hnê hno 515 kong pơlê Kon Tum tối nhên, kố cho tơdroăng cheăng ki pá má môi, la ivá kân ƀă tĭng; mơhno tuăn pâ mê mâu kăn ƀă Kuăn pơlê mâu hdroâng kuăn ngo kong pơlê Kon Tum ƀă mâu ngế hlâ ai hnoăng tơnêi têa hiăng tơplâ ta troh hlâ ƀă hlâ khên tơnôu xua hnoăng cheăng pêi ki kân.
Viết bình luận