Klêi kơ’nâi Hneăng hôp rôh má 15, Đảng đoân Kuô̆k hô̆i prế Khu pơkuâ ngăn Đảng Chin phuh pơkuâ, hnê mơhno kơtăng, nhên mâu kơ koan dêi Kuô̆k hô̆i, Chin phuh tơrŭm krá tơniăn ƀă mâu kơ koan, khu tơrŭm cheăng rĕng hbrâ rơnáu mâu tơdroăng ki kal rak tơniăn rơkê má môi vâ pơtroh ăm Kuô̆k hô̆i séa ngăn, pơkâ tơdroăng.

Ƀă mâu tơdroăng ki Vi ƀan pơkuâ Kuô̆k hô̆i hlo tá hâi tŭm tơdroăng vâ pơtroh ăm Kuô̆k hô̆i séa ngăn, ing rôh hôp má 6, pôa Bùi Văn Cường, ngế xiâm chêh tôm xo rơkong, Kăn pơkuâ ƀơrô cheăng Kuô̆k hô̆i pơkâ thế, Đảng Đoàn Kuô̆k hô̆i ƀă Khu pơkuâ ngăn Đảng Chin phuh séa ngăn, hnê mơhno mâu kơ koan pơtối hriăn ngăn, hbrâ rơnáu vâ pơtroh ăm Kuô̆k hô̆i séa ngăn, pơkâ a Hneăng hôp má 7.

Tơpui a Rôh hôp, pôa Phạm Minh Chính, Ngế pro xiâm hnê ngăn Chin phuh ăm ‘nâi, klêi kơ’nâi mơgêi Hneăng hôp má 5 dêi Kuô̆k hô̆i 1 hâi, Chin phuh hiăng hôp xing xoăng hnoăng cheăng hbrâ rơnáu mâu tơdroăng ki kal ối tung hnoăng pơkuâ vâ pơtroh ăm Kuô̆k hô̆i séa ngăn, pơkâ a Hneăng hôp má 6, Ngế pro xiâm hnê ngăn tơnêi têa tối nhên, tung pơla hdrối kố nah, mâu kơ koan dêi Kuô̆k hô̆i hiăng tơrŭm ƀă mâu kơ koan dêi Chin phuh:

“Tơrŭm kố ôh ti xê ai to mâu tơdroăng tơkêa luât mê ối ai hên tơdroăng cheăng ối tung hnoăng pơkuâ dêi Kuô̆k hô̆i, kơ koan ai hnoăng pơkuâ xiâm, pơkâ mâu tơdroăng ki kal dêi tơnêi têa, séa ngăn dêi khu pơkuâ xiâm, mơjiâng luât ki mâu tơdroăng kal kân Kuô̆k hô̆i pơrá tơrŭm krá tơniăn ƀă Chin phuh hlo tơƀrê khât. Á hlo tơdroăng ki tối tơbleăng, hlê plĕng dêi rơpó tơrŭm dêi Kuô̆k hô̆i. Kơnôm mê tơdroăng cheăng dêi Chin phuh tơ’lêi hlâu tâ, tá mâu tơdroăng ki tơdjâk troh pơkâ luât, tơdjâk troh mâu hnoăng cheăng kâ rêh ối pơlê pơla gâk kring cheăm bêng. Pơla hdrối kố nah, hôp Tơnêi têa xuân tơmâng xo, mơnhên tối khât tơdroăng ki tơrŭm krá tơniăn pơla Kuô̆k hô̆i ƀă Chin phuh’’.

Ối ai mâu tơdroăng ki ‘nâ ối hrá, tá hâi teăm vâ pơtroh ăm Kuô̆k hô̆i séa ngăn, pơkâ a Hneăng hôp má 6 tiô pơkâ, Ngế pro xiâm hnê ngăn Chin phuh rơhêng vâ mâu kơ koan dêi Kuô̆k hô̆i, Vi ƀan pơkuâ Kuô̆k hô̆i tối ăm mâu kơ koan ối tung Chin phuh ƀă Chin phuh xua kố cho mâu tơdroăng ki xơpá. Tung la ngiâ ah, Ngế pro xiâm hnê ngăn tơnêi têa pơkâ thế peăng kô pơtối tơrŭm krá tơniăn vâ hbrâ ăm mâu tơdroăng ki kal kố vâ pơtroh ăm Kuô̆k hô̆i séa ngăn, pơkâ a hneăng hôp ki achê má môi.

Tơpui mơ’nui rôh hôp, pôa Vương Đình Huệ, Kăn xiâm hnê ngăn Kuô̆k hô̆i ăm ‘nâi, vâ hbrâ ăm hneăng hôp má 6, Đảng đoân Kuô̆k hô̆i ƀă khu pơkuâ ngăn Đảng Chin phuh hiang teăm tơpui tơno, pêi pro tro tơdroăng, pêi pro châ tơdroăng ki rơhêng vâ pơkâ mơ’no.

Môi tuăn ƀă rơkong tơpui tối dêi mâu kăn ki veăng hôp a rôh hôp ƀă pôa Phạm Minh Chính, Ngế pro xiâm hnê ngăn Chin phuh, pôa Vương Đình Huệ, Kăn xiâm hnê ngăn Kuô̆k hô̆i phiu ro hlo tơdroăng ki hbrâ nhên dêi péa Ƀơrô cheăng hiăng tơrŭm krá tơniăn, mâu rơkong tơpui tối hiăng châ môi tuăn ƀă mâu túa pơkâ mơ’no; tơdrêng amê hlối tối nhên, kal athế pơtối hbrâ rơnáu nhên tiô tơdroăng pơkâ tung khế 1/2024 kô pơkâ tơleăng mâu tơdroăng ki tá hâi tơleăng klêi.

“Hneăng hôp má 6, Kuô̆k hô̆i hneăng 15 ai hên tơdroăng cheăng tá hnoăng cheăng mơjiâng luât, séa ngăn, pơkâ mâu tơdroăng ki kal dêi tơnêi têa, cho hneăng hôp tơdế hneăng tơdjâk troh tơdroăng ki xo phĭu pôk mâu kăn cheăng tung Kuô̆k hô̆i pôk, kĭ. Hên tơdroăng ki kal ai tơdjâk troh tơdrêng troh mơnhông mơdêk cheăng kâ rêh ối pơlê pơla ƀă tơdroăng rêh ối dêi kuăn pơlê. Kăn pơkuâ Đảng, Tơnêi têa, tá mâu kăn pơkuâ kăch măng, kuăn pơlê tung lâp tơnêi têa xuân tơngah tung tơdroăng ƀlêi chiâng dêi hneăng hôp rôh kố môi tiah mâu hneăng hôp ki hdrối’’.

Kăn xiâm hnê ngăn Kuô̆k hô̆i pơkâ thế Chin phuh rơtế ƀă mâu kơ koan dêi Kuô̆k hô̆i tơrŭm vâ pơtối pêi pro tro hnoăng cheăng hbrâ vâ rak vế ki rơkê dêi mâu tơdroăng tơkêa luât tiô tối hdrối kô pơtroh ăm Kuô̆k hô̆i a hneăng hôp rôh kố, malối cho mâu tơdroăng tơkêa luât ki xơpá, ôh tá tơniăn.

Ƀă mâu tơdroăng ki kal kân ki ối ai hên rơkong tơpui tối phá ra phá dêi rơpó, kal ai mâu túa pơkâ pơrá phá dêi rơpó, kal athế châ hbrâ rơnáu nhên tơdroăng ki kal, troăng tơpui tối leăng mâu ki kal, mâu tơdroăng ki tá hâi pêi pro klêi, mâu tơdroăng ối bô bối túa pơkâ vâ Mâu kăn Kuô̆k hô̆i tơpui tơno, ăm rơkong veăng tơpui tối, rak tơniăn rơkê hnoăng cheăng luât a hneăng hôp.

Kăn xiâm hnê ngăn Kuô̆k hô̆i xuân pơchân kal đi đo tối tơbleăng ’na tơdroăng kal ‘na tơdroăng ki ôh tá tơniăn dêi hneăng hôp, malối cho ƀă mâu rôh hôp tơpui tơno, ăm rơkong veăng tơpui tối ‘na mâu tơdroăng ki châ kuăn pơlê kal vâ ‘nâi plĕng môi tiah tơdroăng ki xo phĭu pôk, kơ-êng ƀă tiâ mơnhên a hneăng hôp, pôi tá ăm ai tơdroăng ki ôh ti tối tơbleăng tơdroăng kal; pơkâ troăng hnê tối ki kal, ki xiâm, tro tơdroăng, tro túa pơkâ dêi Đảng, luât dêi Tơnêi têa, rak tơniăn tro, tŭm têk, teăm tơdrêng, veăng kum tối tơbleăng tơdrăng tŭm mâu tơdroăng dêi hneăng hôp troh kuăn pơlê tung lâp tơnêi têa.