Mâu kăn mơnhên tối tung pơla têa rế hía mơni kô rế xiâ, ôh tá pêi pro châ tơdroăng ki rơhêng vâ xúa tung mơnhông mơdêk cheăng kâ rêh ối pơlê pơla mê tơdroăng ki Kơxop hlá mơéa Luât rak ngăn kong ƀă têa ki ‘mâi hơ’lêh, rơnêu, pro mơnhông mâu tơdroăng pơkâ tơdjuôm, kơjo kum tung pơkuâ ngăn têa, ‘mot tơ’nôm mâu ngế ki kal châ chêh inâi ‘na têa tung kơdâm tơnêi cho tơtro.

Nâ Lê Thị Ngọc Linh, ngế ki lo ing Bạc Liêu tơpui leăng:

“Nôkố tơdroăng ki chiâ tăng, xúa têa tung kơdâm tơnêi hmâng vâ ôh tá tiô pơkâ mơni kô chiâng tơdjâk troh pro kơdroh kơdró têa, têa tung kơdâm tơnêi chiâng ‘mêi. A Khoản 2 Troăng 52 kơxop hlá mơ-éa luât pơkâ chiâ tăng têa tung kơdâm tơnêi dêi rơpŏng kuăn pơlê vâ xúa ăm ôu kâ hum roh dêi tơná athế pêi pro tơdrăng. Ing kơxô̆ ki chêh tối tơdrăng ăm kơ koan pơkuâ ngăn kô ai mâu tơdroăng ki pơchân teăm tơdrêng mâu tơdroăng ki kơdró têa ki vâi dế chiâ ai troăng hơlâ rak vế tơtro”.

Tối troh têa ki ôu kâ hum roh, mâu kăn pơkâ thế kal ai túa pơkâ nhên tâ túa pơkâ rak vế ƀă mâu kế tơmeăm ki mơ’no têa ôu kâ hum roh. Xua ki dâi lĕm dêi kdró têa ôu kâ hum roh ai tơdjâk troh tơdrêng troh ivá châ chăn dêi kuăn pơlê. Pôa Huỳnh Thị Phúc tối dêi tơdroăng ki tơná púi vâ:

“Tung mâu tơdroăng ki nhên xua pơkâ thế kal pêi tơdrêng dêi têa ôu kâ hum roh kuăn pơlê vâ xúa hên pơtih tung pơla kong tô mơdrăng, khăng khoăng, tôu ton mê pơkâ thế chiâk tăng tăng tơkâ luâ tơdroăng ki vâi ăm phep chiâ. Á pâ thế khu ki chêh bro kơxop hlá mơ-éa hriăn ngăn ‘mot tơ’nôm mâu tơdroăng pơkâ ‘na tơdroăng ki hbru ăm phêp, chiâ tăng têa vâ rơkê tâ tung mâu tơdroăng ki ôh tá tơniăn dêi kong prâi ƀă sap ing tơdroăng ki ai khât dêi tơdroăng rêh ối mơjiâng bro tê mơdró kế tơmeăm xuân môi tiah kum tơdroăng rêh ối ăm kuăn pơlê”.

Kơxop hlá mơ-éa Luât nôkố pơkâ hlá mơ-éa ‘no xúa mâu têa, tung pơla nôkố tơdroăng ki mơni kong kô tô mơdrăng, khăng khoăng, ôh tá ai têa mơni kô trâm rêm hơnăm, tiô nâ Nguyễn Thị Thu Thủy, ngế ki lo ing Bình Định, kal ai hlá mơ-éa chêh tối tơbleăng rĕng vâ hbrâ rơnáu:

“Khu ki chêh bro kal pơkâ 2 hơnăm 1 hdroh mơjiâng mâu hlá mơ-éa ki hbrâ ví tung mâu tơdroăng ki kong kế têa kum ăm mơ’no têa kơphô̆ tung tơdroăng ki kong prâi pro hơ’lêh. Mâu hlá mơ-éa chêh mê ăm mâu kơphô̆ ki tơdjâk xua têa xăng po lân mot ƀă mâu tơdroăng ki tơdjâk ó ki ê xua kong prâi pro hơ’lêh; pơkuâ ngăn tơniăn tơdroăng ki mơ’no trếo ‘mêi tung têa vâ mơ’no têa ăm mâu kơphô̆ mâu tơdroăng ki ôh tá mơhúa sap ing mơ’no trếo ‘mêi ing kơpong hngêi kơmăi ki xiâm, mâu tơdroăng ki ‘mêi sap ing mâu kong pơlê, pơlê kong kân peăng kơnhŏng têa kroăng; hriăn ngăn mơjiâng mâu hlá mơ-éa chêh ki ôh tá mơhúa tung mâu têa tung tơdroăng ki ôh tá tơniăn”.

Tối ki ai khât a tâi tâng mâu kong pơlê tá hâi mơjiâng tơdroăng ki pơkuâ têa a kong pơlê, tối tơbleăng tơdroăng kal, hlá mơ-éa mơnhên tối ‘na têa ối tơprâ tơprŭng, Vương Thị Hương, ngế ki lo ing Hà Giang tối:

“Á môi tuăn khât ƀă tơdroăng ki kơchuâ chêh túa pơkâ tối tơbleăng tơdroăng kal tíu ki ‘măn rak hlá mơ-éa chêh ‘na têa tơkŭm tung lâp tơnêi vâ pin ai troăng tối tơbleăng môi tuăn. Laga tung kơxop hlá mơ-éa luât tá hâi ai pơkâ nhên. Xua mê, á pâ thế ‘mot tơ’nôm’na hâi khế, troăng hơlâ pêi klêi tơdroăng ki mơjiâng tíu ‘măn rak hlá mơ-éa chêh ‘na têa tơnêi têa vâ kum ăm hnoăng cheăng pơkuâ ngăn têa tiô kong ngê̆ kơxô̆ dêi tơnêi têa ƀă kong pơlê”.

Hlo mâu tơdroăng ki pơ’lêh dêi kong prâi, Nguyễn Hữu Thông, ngế ki lo ing Bình Thuận ai tối tiah kố, kal pơkâ nhên tâ ‘na tơdroăng ki xúa khoa hok, kong ngê̆ tung pơkuâ ngăn, rak vế, chiâ, xúa têa, hbrâ ví tơdroăng ki tơdjâk ‘mêi xua têa pro.

“Á pâ thế ‘mot tơ’nôm tơdroăng ki hriăn ngăn troăng kơmăi ki hrik kơ’hleăng têa kơxĭ chiâng têa xúa vâ pro tơdroăng ki ai hlâu ‘na têa xuân môi tiah rak tơniăn bê têa cho têa vâ ôu kâ hum roh kum ăm kuăn pơlê, malối cho kuăn pơlê ki ối a mâu chuăn, rơlố tung tíu, khoản 1, troăng 6 dêi kơxop hlá mơ-éa luât”.