Kăn Hà Ánh Phượng, ngế ki lo ing Phú Thọ ăm ‘nâi, tơdroăng ki hnê hriâm phôh thong hơnăm 2018 pơtối mơdêk tơƀrê, pêi pro châ tơdroăng ki rơhêng vâ dêi Pơkâ 88 dêi Kuô̆k hô̆i hiăng pơkâ mơ’no. Laga, kăn Hà Ánh Phượng ối tôu tuăn ƀă kơxop hlá mơ-éa rôh má 2 dêi Tơdroăng pơkâ rah xo hlá mơ-éa hriâm tung tơdroăng ki hnê hriâm phôh thong. Tiah mê, rêm tíu ki hnê hriâm mơjiâng môi Hô̆i đong rah xo hlá mơ-éa hriâm. Pơkâ môi tiah mê ối ai hên tơdroăng ki ôh tá tơniăn.

“Má môi, hên tíu ki hnê hriâm tung tơdroăng ki ai khât bu ai to môi troh péa ngế thái cô dêi môi môn hriâm. Tung pơla mê, hlá mơ-éa hriâm hlo gá hên. Kố cho môi tơdroăng cheăng gá chía tơbrêi ƀă tơdroăng ki tơdrăng tá hâi hên xua ivá dêi ngế thái cô tá hâi tơdâng. Má péa, á tơmiât tơdroăng kố kô pro pá tung tơbleăng lơ hnê tơ’nôm ăm mâu thái cô xúa hlá mơ-éa hriâm, malối cho xơpá ăm hok tro drêng athế vêh hriâm lơ pơ’lêh hngêi trung hriâm”.

         Tiô Trần Văn Sáu, ngế ki lo ing Đồng Tháp, Pơkâ 88 tối nhên Khu xiâm ngăn hnê hriâm ƀă hnê mơjiâng tuăn ngoâ rơkê tơkŭm chêh bro môi khu hlá mơ-éa hriâm. Khu hlá mơ-éa hriâm kố châ séa ngăn, kĭ tơdâng tơ’mô ƀă mâu khu hlá mơéa hriâm xua khu tơrŭm, mâu ngế krê chêh bro. Mơhno nhên Pơkâ 88 châ pơkâ a hơnăm 2014, troh hơnăm 2020 nếo ai Pơkâ 122, pôa Trần Văn Sáu pơkâ tơdroăng 6 hơnăm, tiah lâi Khu xiâm ngăn hnê hriâm ƀă hnê mơjiâng tuăn ngoâ rơkê ôh tá tơkŭm pêi pro Pơkâ kố?

Tung pơla mê, tơpôu tâi tâng tơdroăng ki chêh bro hlá mơ-éa hriâm ƀă túa pơ’lêh pơlê pơla, ing mê chiâng tơdjâk troh tơdroăng ki bro ai hên hĭn hlá mơ-éa hriâm, yă tê to kơnâ.

“Đảng krếo thế pơlê pơla hơ’lêh tŏng kum ăm tơdroăng ki hriâm tâp, la Tơnêi têa athế rak vế hnoăng cheăng ki xiâm tung hnê hriâm. Pôi tá pơ’lêh pơlê pơla chiâng tơdroăng ki tê mơdró hlá mơ-éa hriâm. Ki khât ăm hlo, a kơvâ cheăng ki lâi drêng pơlê pơla hơ’lêh pơrá kơdroh yă, krê hlá mơ-éa hriâm rế hía rế hơ’lêh mê yă tê rế to kơnâ. Kố cho môi tơdroăng ki phá tơviah ƀă ôh tá ai tơdroăng séa ngăn ki lâi vâ rak tơniăn hlá mơ-éa hriâm pơtối kơdroh”.

Pôa Nguyễn Kim Sơn, ngế xiâm ngăn hnê hriâm ƀă hnê mơjiâng tuăn ngoâ rơkê tơpui tối leăng:

“Mâu kăn tơmâng ngăn troh tơdroăng pơkâ dêi Khu kăn séa ngăn cho pơcháu ăm Khu xiâm ngăn hnê hriâm hbrâ rơnáu pơtroh ăm Kuô̆k hô̆i túa pơkâ ki ai tơdjâk troh tơdroăng ki chêh bro môi khu hlá mơ-éa hriâm. Ngin tơmiât tiah kố sap ing nôkố troh hơnăm 2024 tơdroăng ki kal má môi kal kơjo apoăng mê cho séa ngăn ki tro dêi hlá mơ-éa hriâm lâm 5, 9, 12 ăm gá tro, tơniăn tŭm hlá mơ-éa hriâm hdrối vâ mot hơnăm hriâm nếo, ƀă tơdroăng ki châ pơcháu mê ngin kô hriăn ngăn mơ-eăm tung 2 hơnăm la ngiâ, drêng tơdroăng pơkâ pơ’lêh hlá mơ-éa hriâm ki nếo hiăng klêi ah mê kô mơnhên tối trâu hngế tâ ƀă pơkâ mơ’no tơdroăng ăm Kuô̆k hô̆i kơ’nâi mê”.

Hngêi hôp Kuô̆k hô̆i xuân tơpui tối hên tâ ƀă mâu tơdroăng tơpui tơno tơdjâk troh kơvâ khăm pơlât. Mâu kăn mơhno nhên, tung pơla hdrối nah xuân ối ai tơdroăng ki hrá tung tŏng kum pơkeăng. Tơdroăng ki tơbriât tê, roê pơkeăng maluâ hiăng hlo hơ’lêh la tơdroăng ki roê mâu kế xúa tung khăm pơlât hên hlo ôh tá tơniăn.

Xơpá má môi nôkố cho ôh tá châ roê kế ki dâi ƀă xúa kih thuât ki nếo. Tơdroăng ki kuăn pơlê tro pơreăng ŭm tung châ tâk hên.Pôa Nguyễn Tri Thức, ngế ki lo ing Pơlê kong kân Hồ Chí Minh tối tơdroăng tơmiât dêi tơná:

“Á pâ thế Kuô̆k hô̆i, Chin phuh tơmâng ngăn hbrâ rơnáu bro 2 to tíu xạ trị a Hà Nội ƀă Pơlê kong kân Hồ Chí Minh vâ kuăn pơlê Việt Nam châ pơlât xúa mâu kơmăi kơmok ki rơkê má môi dei kong têa ê. Pin ai môi tơdroăng ki tơ’lêi hlâu, mâu ƀok thái pơkeăng dế pêi cheăng tung kơvâ xạ trị a Hà Nội ƀă Pơlê kong kân Hồ Chí Minh mơni kô châ xúa mâu kơmăi kmok ki kố klêi kơ’nâi 6 khế châ hnê a kong têa ê”.

Tơpui tối leăng, jâ Đào Hồng Lan, ngế xiâm ngăn pơkeăng ƀă khăm pơlât ăm ‘nâi, xiâm kối cho xua mâu kế tơmeăm pêi cheăng tung lâp plâi tơnêi iâ, yă tê kơnâ tung lâp plâi tơnêi. Khu xiâm dế mơ-eăm ai mâu troăng hơlâ vâ ‘mâi rơnêu mâu tơdroăng ki ôh tá tơniăn ‘na pơkeăng, kế tơmeăm xúa tung khăm pơlât a hên tíu khăm pơlât. Ai mâu troăng hơlâ tŏng kum ƀă mâu tơdroăng ki tơvâ tung pơla tơbleăng pêi pro. ‘Na troăng hơlâ pơkâ tung la ngiâ, jâ Đào Hồng Lan ăm ‘nâi, kô tơrŭm ƀă mâu kong pơlê, mâu tíu khăm pơlât vâ séa ngăn mâu tơdroăng ki tơvâ ai tơdjâk troh tơdroăng rak tơniăn bê tŭm pơkeăng, kế tơmeăm xúa tung khăm pơlât vâ tŏng kum tiô hnoăng pơkuâ.