A rôh trâm mâ kuăn pơlê a Đơn Dương, kuăn pơlê tơring Đơn Dương tối phiu ro khât drêng hlo mâu tơdroăng ki ƀlêi chiâng ki tơnêi têa, kong pơlê hiăng pêi châ rơhéa tung pơla hdrối kố nah. Malối cho tung hnoăng cheăng hbrâ mơdât kâ kơluâ châ tơƀrê khât, ăm hlo tơdroăng ki kơtăng dêi Đảng, luât dêi tơnêi têa.

Tiô hlá mơ-éa tối tơbleăng a mâu tíu trâm mâ kuăn pơlê, tung 9 khế apoăng hơnăm 2023, hnoăng cheăng hbrâ, mơdât kâ kơluâ a kong pơlê Lâm Đồng hiăng hlo hơ’lêh hên khât, châ tơƀrê hên tơdroăng. Lâp kong pơlê hiăng pêi pro 129 rôh séa ngăn ‘na tơdroăng ki chêh bro hlá mơ-éa ƀă vâ chê 1.500 rôh séa ngăn tung mâu kơvâ cheăng.

Klêi kơ’nâi séa ngăn liăn ngân hiăng ‘nâi ai mâu tơdroăng ki bro xôi ƀă kơxô̆ liăn 7.8 rơtal liăn; pơkâ xo tơvêh, pơkâ pơxâu phak xua bro xôi ƀă kơxô̆ liăn 10 rơtal; pâ thế ‘mâi rơnêu, ‘mâi mơnhông mâu tơdroăng ki tá hâi pêi pro klêi, mâu tơdroăng ki tá hâi teăm séa ngăn, pơxâu phak kơtăng mâu ngế ki bro xôi tiô pơkâ. Klêi kơ’nâi séa ngăn, séa ngăn a 11 mâu tơdroăng ki kơluâ châ ‘nâi dế châ pơxâu phâk tiô pơkâ; ai 18 tơdroăng ki tơdjâk troh bro xôi kâ kơluâ sap ing hơnăm hdrối.

Kuăn pơlê pâ thế ‘mâi rơnêu Luât Tơnêi tơníu kal nhên tâ nếo, tro ƀă tơdroăng ki ai khât dêi rêm kơpong, vâ pro pơxúa tơƀrê má môi ăm kuăn pơlê; ‘Na hngêi trăng troăng klông, pâ thế mơdêk pơkuâ ngăn, tơmâng troh hnoăng cheăng hbrâ ví têa kân lân lu malối cho tung rơnó mê hngê hiăng troh nôkố.

A rôh trâm kuăn pơlê, mâu ngế ki hnê, mâu sinh viên dêi Hngêi trung Đại học Đà Lạt hiăng pâ thế hên tơdroăng ki kal tơdjâk troh hnê hriâm, troăng hơlâ tŏng kum liăn khế, tơdroăng ki tŏng kum liăn, mơhá ăm mâu ngế ki hnê, tăng cheăng pêi ăm sinh viên klêi kơ’nâi hriâm klêi đại học, hlá mơéa mơdât ‘no hrê liăn bro mâu kế tơmeăm khoa hok ƀă hên ki ê ối trâm hên tơvâ tơvân ƀă ôh tá tơniăn.

Tung mê, ki kal má môi cho tơdroăng ki sinh viên, hriăn ngăn tơmâng troh kơvâ khoa hok dế hlo kơdroh ó khât.

Tiô pôa Lê Minh Chiến, Ngế pơkuâ hngêi trung Đại học Đà Lạt, rôh rah xo hok tro mot hriâm hơnăm kố hngêi trung Đại học Đà Lạt tơ’mot châ 2.800 ngế sinh viên hriâm tung mâu kơvâ cheăng, tung mê kơxô̆ sinh viên, hriăn plĕng sinh hriâm a mâu lâm râ đại học ƀă pá xôp đại học ƀă kơvâ khoa hok ki kal môi tiah Toán, Lý, Hóa ƀă hên ki ê bu iâ, thăm nếo ai khŏa bu ai 2 troh 3 ngế chêh inâi hriâm.

Xiâm kối xua mâu troăng hơlâ tŏng kum dêi Tơnêi têa ƀă kơvâ cheăng kố tá hâi ai tŭm ivá, mơhnhôk mâu ngế ki rơkê.

“Đảng, Tơnêi têa, Chin phuh ƀă Kuô̆k hô̆i kal tơmâng ngăn tâ nếo ƀă mâu troăng hơlâ tŏng kum ăm kăn ƀô̆ giảng viên, khu ki hriăn ngăn bă sinh viên ai troăng hơlâ tŏng kum môi tiah nôkố kơvâ hnê sư phạm. Kơvâ sư phạm nôkố pakĭng châ hriâm tê kơtê mê kơlo liăn tŏng kum nâp liăn hriâm xuân kơnâ tâ ƀă mâu ngế ki hiăng hriâm klêi nếo lo hngêi trung”.

Ai ngế ki ‘nâ pâ thế athế po rơdâ liăn kơdĭng mơnhông khoa hok tơnêi têa, ví tơdroăng ki hiât lôi túa tơmiât khoa hok, ôh tá tơ’mot ƀă mơhno tơdroăng ki tơmiât rơkê khoa hok tung mâu ngế ki rơkê plĕng; séa ngăn bro ton hơnăm pơtê cheăng ăm giảng viên đại học; tung mê, ai Hngêi trung Đại học Đà Lạt.

Xua tung tơdroăng ki ai khât rơhêng vâ bro ton hơnăm pêi cheăng hôm cho ai ƀằng giảng viên cao cấp, tung pơla vâ pêi pro chiâng bằng cao câ̆p mê hâi khế pêi cheăng ôh ti ai xếo, kố cho tơdroăng ki ai khât a kơpong Tây Nguyên, kơpong Tây Nam Bộ pơrá trâm xơpá. Hên ngế cho sinh viên pâ thế ‘na tơdroăng ki hbru liăn ăm kơvâ sư phạm gá hrá khât tâng pơchông ƀă tơdroăng pơkâ thế ki ai khât; pâ thế ‘na rôh tơ’lêi tăng cheăng pêi ăm sinh viên, malối cho ƀă mâu kuăn muăn hdroâng kuăn ngo xua nôkố klêi kơ’nâi hriâm klêi đại học hên sinh viên ôh tá ai cheăng pêi, tơdroăng rêh ối rơpŏng hngêi xơpá.

Teăng mâ Khu kăn Kuô̆k hô̆i Lâm Đồng, pôa Phan Đình Trạc tơmâng xo mâu rơkong tơpui tối pâ thế dêi kuăn pơlê, tơdrêng amê hlối ăm ‘nâi kô tối ăm Kuô̆k hô̆i tung hneăng hôp má 6 la ngiâ.

“Bro tiah lâi vâ mâu vâi o hâk vâ hriăn ngăn khoa hok, hâk vâ tung mâu kơvâ khoa hok ƀă mâu thái cô hnê khoa hok ki kal xuân athế hâk vâ khât. Bro tiah lâi mâu tơdroăng ki hâk vâ mê xuân athế ngăn tung mâu tơdroăng ki rak tơniăn ‘na tơdroăng rêh ối, tâng ôh pin kô tá châ rơhéa. Kố cho ƀai toán dêi Tơnêi têa, tơnêi têa athế pêi”.

       Ngế xiâm pơkuâ Tơnêi têa xuân pơchân kong pơlê Lâm Đồng ƀă Pơlê kong kơdrâm Đà Lạt kal tơkŭm tơmâng mâu rơkong tơpui tối tiô túa ki tâi tâng, tơdrăng, kal ai mâu đề tài hriăn ngăn khoa hok nhên tơdjâk troh kơvâ tơhnah tơhnâp tơnêi, văng, hngêi ối, tơdjâk troh túa ki lĕm, túa pơkâ dêi Pơlê kong kơdrâm Đà Lạt tung pơla hdrối kố nah.

Tơdroăng tơbleăng ‘nhiê tah tâi hngêi nhĕng tung pêt kế tơmeăm; troăng hơlâ rak vế mơhno túa lĕm tro; hnoăng cheăng rak ngăn kong loăng hngó, mơnhông mơdêk cheăng kâ pêt mâu hdrê loăng a kơdâm loăng ƀă hên ki ê cho mâu tơdroăng ki pâ thế tâi tâng pơlê pơla rơtế tơdjuôm ivá mơdêk pôu râng hnoăng cheăng.

Drêng kố, pôa Phan Đình Trạc rơtế ƀă Khu kăn Kuô̆k hô̆i kong pơlê Lâm Đồng hiăng diâp 20 hnoăng liăn hriâm rơkê, rêm hnoăng kơnâ 10 rơtuh liăn ăm sinh viên hngêi trung Đại học Đà Lạt ai tơdroăng rêh ối xơpá la hiăng mơ-eăm tung hriâm tâp.