Pơtối tơdroăng Hneăng hôp má 6, kơxo kố, Kuô̆k hô̆i tơpui tơno a hngêi hôp kân mơnhên tơdroăng pêi pro liăn ngân hơnăm 2023; Mơnhên tơdế hneăng pêi pro pơkâ pêi mơ’no liăn cheăng tơnêi têa iâ khế hneăng hơnăm 2021 – 2025; Pơkâ pêi liăn ngân tơnêi têa ƀă mung, mơdrếo chĕn tơnêi têa 5 hơnăm hneăng hơnăm 2021 – 2025. Peăng kơxê, mâu kăn teăng mâ tơpui tơno a hngêi hôp kân ‘na mâu tơdroăng xiâm laga tơpui phá tơ-ê dêi pó dêi tơdroăng tơkêa bro Luât mâu khu ăm mung liăn (‘mâi rơnêu).

Kơxo lơ 2/11, Kuô̆k hô̆i mơnhên tơdroăng rak ngăn liăn ngân tơnêi têa hơnăm 2023, troăng xing xoăng liăn ngân tơnêi têa hơnăm 2024 Tơbleăng ‘na tơdroăng rak ngăn liăn ngân tơnêi têa hơnăm 2023, tối hdrối liăn ngân tơnêi têa, troăng pêi xing xoăng liăn ngân tơnêi têa hơnăm 2024, Pơkâ pêi liăn ngân tơnêi têa 3 hơnăm 2024 – 2026, pôa Hồ Đức Phớc, Ngế xiâm pơkuâ liăn ngân tối ăm ‘nâi, xo hnoăng liăn ngân tơnêi têa pêi pro 9 khế hơnăm 2023 ƀă 75% tiô tối hdrối, kơlo têk chu liăn ngân tơnêi têa châ dâng 15% GDP.

Xo hnoăng liăn ngân tơnêi têa plâ hơnăm tâk dâng 4,6% tâng pơchông tối hdrối. ‘Na mơ’no liăn ngân tơnêi têa hơnăm 2023, tiô tối hdrối pêi pro 9 khế ƀă dâng 59% tiô tối hdrối. Hơnăm 2023, tiô tối hdrối châ péa xôh mơ’no liăn ngân tơnêi têa dâng 4% GDP.  Troh mơ’nui hơnăm 2023, mâu pơkâ chĕn liăn tơnêi têa, chĕn Chin phuh, chĕn kong têa ê dêi tơnêi têa, hnoăng cheăng thế chêl tơdrêng dêi Chin phuh tung kơpong Kuô̆k hô̆i ăm phêp.