Cho kong pơlê peăng kong ngo tơkăng kong, kơxô̆ mơngế pêi cheăng cho hdroâng kuăn ngo châ lối 80%, mâu hơnăm hdrối nah, Lai Châu đi đo mơnhên tơdroăng pêi pro tro mâu troăng hơlâ tŏng kum hdroâng kuăn ngo, kum hdroâng kuăn ngo mơnhông mơdêk cheăng kâ, tơniăn tung rêh ối, xut tah hrâ mơnguâ kơtiê xơpá.

Ƀă 20 hdroâng kuăn ngo rêh ối, tung mê ai 4 hdroâng kuăn ngo iâ ngế cho Cống, Mảng, La Hủ ƀă Si La, tơdroăng ki hlê plĕng ‘na khôi túa lĕm tro hên hĭn. Maluâ cho tơ’lêi hlâu la xuân cho pơloăng mơnúa ƀă khu kăn pơkuâ rêm râ tung tơdroăng mơdêk ki kơnía ‘na mơhno túa lĕm tro pơla mâu hdroâng kuăn ngo a kong pơlê vâ rơtế mơnhông mơdêk. Lai Châu hiăng pơkâ tơdroăng ‘na troăng hơlâ tŏng kum mơnhông pêi chiâk deăng kế tơmeăm tơkŭm tung pơla hơnăm 2021 – 2025.

Kố cho tơdroăng ki tơ’lêi vâ mâu tơring, pơlê kong kơdrâm mơhnhôk mơjiâng, tơ’mot mâu khu pêi cheăng tơrŭm ‘no liăn cheăng, tơrŭm, rơtế prôk ƀă khu kăn pơkuâ cheăm, tơring mơjiâng ƀlêi chiâng tơdroăng môi to cheăm to kế tơmeăm, tối nhên cho môi tung hên troăng hơlâ tŏng kum tơƀrê dêi Lai Châu vâ tŏng kum ăm vâi krâ nhŏng o hdroâng kuăn ngo tăng hlo tíu tê ăm kế tơmeăm pêi lo ing chiâk deăng kum xut tah hrâ mơnguâ kơtiê xơpá krá ton.

Pôa Lê Xuân Tiến – Kăm phŏ pơkuâ Khu ngăn cheăng kơmăi kơmok ƀă tê mơdró Lai Châu ăm ‘nâi:

“Tung pơla hơnăm 2021 – 2025 mê mơnhên mơjiâng bro 7 to kơchơ kơpong hdroâng kuăn ngo. Ƀă tơdroăng ki tơdjêp mâu kế tơmeăm pêi lo ing chiâk deăng dêi hdroâng kuăn ngo, Khu ngăn kơmăi kơmok ƀă tê mơdró hiăng tí tăng ‘nâi plĕng ăm Vi ƀan kong pơlê mơjiâng bro 16 tơdroăng vâ tơbleăng pêi pro, vâ tơdjêp tâi tâng mâu kế tơmeăm pêi lo ing chiâk deăng dêi vâi krâ nhŏng o tung mâu siêu thĭ, tíu xiâm tê mơdró a kong pơlê xuân môi tiah mâu kong pơlê ki ê”.

Sap ing môi kong pơlê ki ôh ti ai inâi, ai lơgât pêt loăng plâi kâ, nôkố Sơn La hiăng chiâng tíu ki pêt loăng plâi kâ kân má môi peăng Kơnhŏng ƀă ối má 2 tung lâp tơnêi têa. Kế tơmeăm châ tê ngi kong têa ki xơpá má môi tung lâp plâi tơnêi ƀă ki kơnía pơxúa rêm hơnăm sap ing 150 troh 170 rơtuh dollars Mih, lối rơpâu ngế kuăn pơlê pêi chiâk cho hdroâng kuăn ngo chiâng ngế ki kro, mơdrŏng khât.

Rơtế ƀă tơdroăng ki mơdêk rơdêi mơjiâng kong pơlê chiâng tíu ki pêt loăng plâi kâ dêi peăng Kơnhŏng cho hnoăng cheăng mơdêk tơdroăng ki tê kế tơmeăm pêi lo ing chiâk deăng ing mâu rôh pơkâ mơdêk tê mơdró. Nôkố, ai 16 túa kế tơmeăm pêi lo ing chiâk deăng dêi kong pơlê Sơn La veăng tê ngi kong têa ê tê tung mâu kơchơ mơdró tung 12 to kong têa.

Kế tơmeăm pêi lo ing chiâk deăng xuân hiăng châ tê tơrŭm tung mâu siêu thĭ ki kân môi tiah: Lotte, Hapro, WinMart. Kế tơmeăm pêi lo ing chiâk deăng tơniăn krúa dêi Sơn La rế hía rế châ mâu ngế ki roê hâk vâ ƀă mơnhên tối khât ‘na ki dâi lĕm. Pôa Quàng Văn Dương - Ngế ki cheăng tung Khu pêi cheăng tơrŭm Pêi chiâk deăng Xuân Tiến, Sơn La rơhêng vâ:

“Tơdroăng ki rơhêng vâ dêi vâi krâ nhŏng o xuân môi tiah dêi khu pêi cheăng cho rơhêng vâ mâu tơdroăng ki tê kế tơmeăm kố, rơhêng vâ kế tơmeăm cho plâi nong kố rế hía rế mơnhông, vâ tê châ hên, châ hên ngế ‘nâi troh, rơhêng vâ tung tơnêi têa ƀă rơhêng vâ châ tê a kong têa ê nếo”.

Bình Phước cho tíu ki ai tơnêi tơníu tơtro, hyôh kong prâi kong kế tơniăn lĕm vâ pêt loăng plâi hôt ƀă châ ngăn cho tíu ki pêt hên loăng plâi hôt drêng châ vâ chê 50% ƀăng tơnêi ƀă lối 54% dêi lâp tơnêi têa. Kloăng hôt Bình Phước gá lĕm khât tâng pơchông ƀă kloăng hôp ki roê xo ing kong têa ê, veăng kum ăm loăng plâi hôt chiâng loăng plâi ki ton hơnăm rơdêi pro pơxúa ki kơnâ vâ tê ngi kong têa hên, chiâng kế tơmeăm vâ tê ngi kong têa ê xiâm dêi kong pơlê tung mâu hơnăm a chê kố.

Jâ Thân Thị Xiêm – Kăn pơkuâ Kŏng ti pêi cheăng tiô rơnó môi tung khu An Thuận tơhrâ rơtế prôk ƀă kuăn pơlê pêi chiâk Bình Phước tung tơdroăng ki tê.

“Ngin hiăng rơtế prôk ƀă vâi krâ nhŏng o kuăn pơlê dêi Bình Phước, sap ing hdroâng kuăn ngo tá troh kuăn pơlê hdroâng S’Tiêng, mê ngin hiăng tơrŭm ƀă vâi krâ nhŏng o drêng rơnó mê hngê troh, mâu tơdroăng xơpá dêi vâi krâ nhŏng o mê ngin veăng kum ƀă drêng châ krí xo kế tơmeăm mê ngin kô rơtế ƀă vâi krâ nhŏng o veăng kum tơdroăng pôu râng kố, vâ ăm kloăng hôt vêh troh a hngêi ‘măn kơdĭng kloăng, tro tơdroăng dêi Bình Phước vâ tăng cheăng pêi ăm vâi krâ nhŏng o klêi kơ’nâi mâu hâi kong mê hngê ƀă klêi kơ’nâi hâi krí xo, xua vâi krâ nhŏng o dêi tơnêi Bình Phước bu ai tơdroăng pêi lo xiâm ing kloăng plâi hôt”.

Tung pơla hdrối kố nah, kơvâ cheăng kơmăi kơmok ƀă tê mơdró đi đo tơkŭm mơdêk rơdêi mâu tơdroăng ki pơkâ mơdêk tê mơdró vâ tơrŭm tê roê kế tơmeăm ăm kuăn pơlê, tung mê, ai kuăn pơlê hdroâng kuăn ngo peăng kong ngo kơpong hngế hngo. Khu xiâm ngăn kơmăi kơmok ƀă tê mơdró hiăng rơtế ƀă mâu kong pơlê đi đo mơ-eăm vâ kế tơmeăm kố châ mơđah tơbleăng troh lâp lu mâu kong têa ƀă châ hên khu ki tơrŭm cheăng tăng troh.

Mâu tơdroăng cheăng tŏng kum ki kal kố hiăng bro ivá lĕm tro ƀă kế tơmeăm tê kế tơmeăm pêi lo ing chiâk deăng dêi vâi krâ nhŏng o tâk ing mâu hơnăm ƀă ai mâ a mâu tíu tê ki kân xuân môi tiah tê ngi kong têa ê.