Pŭn hơnăm hdrối nah, rơpŏng hngêi nâ K’Tâm ối a thôn 1, cheăm Liêng S’rônh, tơring Dam Rông (Lâm Đồng) cho rơpŏng kơtiê. 3 sào tơnêi pêt kơphế, báu, alâi pêi cheăng tiô chal krâ nah, tơdroăng rêh ối cheăng kâ dêi rơpŏng hngêi kơklêa hrâ mơnguâ đi đo. Hlo rơpŏng hngêi xơpá ‘nâng, jâ K’Nga, Kăn hnê ngăn Vi ƀan Măt trâ̆n tơnêi têa Việt Nam cheăm Liêng S’rônh hiăng troh pôu tơrêm to hngêi tí tăng ‘nâi plĕng, hnê tối ăm kuăn pơlê pơ’lêh tơnêi ki khăng kơtô pêt loăng plâi ôh tá chiêng mê pêt loăng dâu păn hdrong nếo, kum K’Tâm mung liăn, tơpui tơno  ƀă mâu tíu ki vâi ô eăng nhoăm loi vâ nâ mung rôe hdrê loăng dâu păn hdrong ƀă hlối hriâm túa păn hdrong. Klêi pơ’lêh tơnêi tơdroăng cheăng nếo, tơdroăng cheăng kâ dêi rơpŏng hngêi K’Tâm chôa lâng ‘mâi hơ’lêh. Nâ K’Tâm ăm ‘nâi, kơxô̆ liăn châ xo ing pêt loăng dâu păn hdrong hiăng kum nâ châ ‘mâi rơnêu hngêi, kum kuăn ‘nĕng châ hriâm.

 “Hdrối nah rơpŏng hngêi a pêt kơphế, kơnôm hnê tối dêi nâ K’Nga rơpŏng hngêi a hiăng pơ ‘lêh pêt loăng dâu păn hdrong hlo pơxúa châ liăn hên tâ pêt kơphế. Ƀă kơxô̆ liăn  dêi Vi ƀan Măt trâ̆n tơnêi têa Việt Nam tơring kơjo kum rôe mâu tơmeăm păn hdrong ăm mâu  xĭng, kơtum kơtŏn,  hiăng kum rơpŏng hngêi a ai tơ’nôm kơxô̆ liăn pê lo tơniăn vâ ai liăn hdrê tung rêh ối rêm hâi’’.

Ôh tá xê to nâ K’Tâm mê hên mâu rơpŏng kuăn pơlê hdroâng kuăn ngo K’ho ối a cheăm Liêng S’rônh, tơring Dam Rông hiăng mơ-eăm pêi cheăng kâ vâ hlŭn kơtiê kơnôm pơ’lêh túa pêi cheăng kâ, khên pơ’lêh hdrê plêt pêi tiô troăng hnê mơhno dêi Đảng ƀă Tơnêi têa. Vâ chiâng pêi tơdroăng mê, hên mâu kăn ƀô̆ đảng viên ối a cheăm, tung mê ai jâ K’Nga cho môi tung mâu ngế, hiăng mơhno nhên hnoăng cheăng ki djâ troăng a hdrối pêi pro ƀă kơhnâ hnê mơhnhôk kuăn pơlê pêi ƀôi ƀă hía hé.

Luâ 12 hơnăm pêi cheăng, mơhé pro kăn ƀô̆ hnê ngăn ‘na Luât, Kăn hnê ngăn vâi kơdrâi cheăm, lơ nốkố dế pro kăn hnê ngăn Vi ƀan Măt trâ̆n  tơnêi têa Việt Nam cheăm, jâ K’Nga xuân pêi pro tro hnoăng cheăng dêi mơngế đảng viên.

Jâ đi đo achê kuăn pơlê, hmâ ƀă kuăn pơlê, tơmâng khât troh pơlê, tơmâng kuăn pơlê tối, tí tăng ‘nâi plĕng tơdroăng púi vâ dêi kuăn pơlê vâ teăm hnê tối, tơleăng mơnhên mâu tơdroăng. Kơnôm ing mê, mâu tơdroăng mơhnhôk cheăng pêi xua pơlê cheăm mơhnhôk, môi tiah:  pơ’lêh hdrê pêt  kum kuăn pơlê mơnhông cheăng kâ, tơdjuôm ivá mơno mơjiâng thôn pơlê nếo, pleăng tơnêi ăm pro troăng kân, mơjiâng túa rêh ối a kơpong kuăn pơlê ối... xuân châ kuăn pơlê vâ môi tuăn. Mâu túa tơlá ton nah ki ôh pá tro, túa tơlá ki pâ hên tơmeăm pơkŏng, rĕng xo on veăng tá hâi tro hơnăm, kơnăng kiâ ki pro hên tơdroăng tơvâ tơvân xuân chôa tah lôi. Tiô jâ K’Nga, cho ngế kuăn dêi pơlê cho kăn ƀô̆ đảng viên thế ai hnoăng cheăng mơjiâng pơlê tơná rơkê plĕng ƀă mơnhông tơƀrê:

“Ƀă tơdroăng tah lôi túa tơlá ton nah ki ôh pa stro môi tiah mơdâm kiâ hên măng, pâ tơmeăm hên drêng xo ŏng mé a pơlê cheăm, mê a rơtế ƀă Đảng ủy, Vi ƀan cheăm hiăng pêi pro tro tơdroăng hnê tối, thế kuăn pơlê tah lôi túa tơlá ton nah ki ôh pá tro tung cheăng kâ, tung pêi chiâk, tung rêh ối. Pơtih: Drêng ai mơngế hlâ pôi tá mơdâm ton luâ 48 chôu  pêi pro tiô troăng rơhlâ tơdjuôm dêi Đảng ủy,  khu ngăn đảng tơring. Tơdroăng ăm tơmeăm drêng xo  ŏng mé xuân hiăng kơdroh há túa tơlá ki ôh pá tro thế ăm hên tơmeăm.  Ƀă tơdroăng cheăng pơtối rak túa lĕm tro xuân châ mơdêk, malối cho ‘na tơdroăng pơtối rak ki kơnía git túa lĕm tro tŏn chêng koăng xuân môi tiah túa kơ’nhon xuang, tơdroăng rơngêi ting ting, hơdruê tiô tơdrá kuăn ngo a kố xuân châ mơnhông ƀă pơtối rak vế’’.

Liêng Srônh cho cheăm ai lối 70% pơ’leăng mâ kuăn pơlê cho kuăn ngo, tung mê ki hên cho mơngế K’ho. Tiô jâ Nguyễn Thị Thu Hiền, Kăn phŏ hnê ngăn Đảng ủy cheăm Liêng Srônh, tơring Dam Rông, mơhé tơdroăng rêh ối cheăng kâ dêi kuăn pơlê hiăng pơ’lêh tơƀrê hên tâng vâ pơchông ƀă hdrối nah la xuân ối hên tơdroăng ki xơpá, pơloăng mơnúa  kal pơtối mơ-eăm nếo vâ châ mơnhông tơ ƀrê. Xua Mê, tơdroăng pơtối rak vế hnoăng cheăng pêi dêi đảng viên, malối cho mâu đảng viên kuăn ngo tung mơnhông cheăng kâ - rêh ối cho kal khât păng ‘nâng. Đảng viên K’Nga hiăng pêi tro hnoăng cheăng tơná ƀă chiâng ngế ki djâ troăng lêm kơhnâ vâ hên ngế đảng viên ki ê tung cheăm hriâm ƀă pêi ƀôi. Jâ Nguyễn Thị Thu Hiền, tối:

“Luâ 10 hơnăm pleăng hnoăng cheăng tơná ăm kong pơlê ƀă nâ K’Nga cho ngế kuăn pơlê pâ nhoăm tung kơpong hdroâng kuăn ngo. Tung tơdroăng cheăng hne etối mơhnhôk kuăn pơlê thế rak vế pêi pro tro tiô troăng rơhlâ dêi Đảng, luât tơnêi têa . Tung mê ki tơ ƀrê má môi cho hnê kuăn pơlê tung tơdroăng rêh ối pơlê pơla va amơjiâng thôn pơlê nếo, mơnhông cheăng kâ, kum kuăn pơlê hlŭn kơtiê krá ton. Malối cho jâ K’Nga hiăng kum hên kuăn pơlê hdroâng kuăn ngo ki rêh ối a kố mơ-eăm hlŭn kơtiê krá ton’’.

Mâu hnoăng veăng ‘no dêi tơná tung tơdroăng cheăng pêi, jâ K’Nga , Kăn hnê ngăn Vi ƀan Măt trâ̆n tơnêi têa Việt Nam cheăm Liêng S’rônh hiăng châ xo hên ƀâng kơdeăn khê̆n hlá mơ-eăm khê̆n kơdeăn dêi cheăm, tơring ƀă kong pơlê Lâm Đồng. Kố cho mâu tơmeăm ki mơhno, mơhnhôk teăm tơdrêng vâ jâ K’Nga pơtối mơ-eăm ‘no hnoăng tơná, pơtối pêi cheăng ai pơxúa hnoăng cheăng dêi kăn ƀô̆ đảng viên tung kơpong hdroâng kuăn ngo./.