Kố cho hơnăm má pái ki pơtối dêi Tíu xiâm Khu kuăn pơlê pêi chiâk deăng Việt Nam tơkŭm po rah xo 100 ngế kuăn pơlê Việt Nam kơhnâ rơkê; xuân cho rôh ki apoăng tíu xiâm Khu kuăn pơlê Việt Nam tơkŭm po rah xo vâ khĕn kơdeăn 63 khu pêi cheăng tơrŭm kơhnâ rơkê tung lâp tơnêi têa.

Troh veăng leh ƀă tơbleăng a rôh leh khĕn kơdeăn, pôa Trần Thanh Mẫn, Ngế cheăng tung khu xiâm kal kí, Kăn phŏ hnê ngăn Kuô̆k hô̆i pơkâ thế, Khu kuăn pơlê pêi chiâk deăng rêm râ pơtối mơdêk rơdêi tơdroăng nếo ai, hnê tối, hnê trâu rơdâ troh mâu kăn ƀô̆, mâu ngế, kuăn pơlê, tơrŭm pêi chiâk ‘na mâu troăng rơhlâ, tơdroăng Pơkâ dêi Đảng, luât tơnêi têa, malối cho kơvâ pêi chiâk, kuăn pơlê pêi chiâk, thôn pơlê, tơdjâk troh ki pơxúa, hnoăng cheăng pêi dêi kuăn pơlê.

Pơ-eăng troh lâp lu ‘na mơngế ki lĕm kơhnâ pêi cheăng lĕm tro, vâ mâu rơpŏng pêi chiâk tê mơdró kâ rơkê, khu pêi cheăng tơrŭm pêi chiâk chiâng mơngế ki  xiâm veăng mơnhông cheăng kâ - rêh ối a mâu kơpong thôn dêi tung lâp tơnêi têa.