Tung pơla hdrối kố nah, khu kăn séa ngăn dêi Vi ƀan pơkuâ Kuô̆k hô̆i ‘na “Tơdroăng pêi pro troăng hơlâ, luât ‘na mơjiâng on tơhrik pơla hơnăm 2021 – 2021” hiăng pêi cheăng, séa ngăn ki khât a mâu kong pơlê Quảng Nam, Quảng Ngãi, Sơn La, Gia Lai, Bạc Liêu, Bà Rịa - Vũng Tàu, Cà Mau ƀă Pơlê kong kân Hồ Chí Minh; pêi cheăng ƀă Chin phuh, mâu khu xiâm kơvâ cheăng, kơ koan, khu tơrŭm, khu mơdró kâ ki ai tơdjâk troh; tơkŭm po mâu rôh hôp kum ăm tơdroăng ki séa ngăn, malối cho rôh hôp xo rơkong tơpui tối dêi khu ki rơkê ‘na kơxop hlá mơéa Tối tơbleăng séa ngăn.

Tơdroăng séa ngăn vâ mơnhên tối tŭm, tơdrăng, tâi tâng tơdroăng ki pêi pro troăng hơlâ, luât ‘na mơjiâng bro on tơhrik tung pơla hdrối nah. Ing mê, mơnhên mâu troăng hơlâ ki kal, ton xŏn vâ hơ’lêh ƀă tơbleăng teăm tơdrêng mâu túa tơmiât, troăng hơlâ dêi Đảng ‘na mơjiâng bro on tơhrik.