A cheăm Ia Hiao, kong pơlê Gia Lai châ mơjiâng ing tơdroăng tơ’mot 3 tíu pêi cheăng, mê cho (cheăm Chrôh Pơnan, cheăm Ia Hiao ƀă cheăm Ia Peng, tơring Phú Thiện ton nah) tơdroăng pêi cheăng tung mâu hâi mơ’nui hơnăm kơdrâm mơngế pêi vâ rĕng kêi. A mâu troăng prôk tung thôn, kăn ƀô̆, đảng viên ƀă kuăn pơlê rơtế lo pêi tah dêi mâu kơnâng, loăng, pleăng dêi tơnêi vâ ăm po rơdâ troăng vâi vâ pro troăng a mâu tíu ki xiâm.

Ing apoăng ko troăng vâ mot a thôn Sômalơng A cho hngêi dêi pôa Siu Hiếu, kăn hnê ngăn Măt trâ̆n tơnêi têa Việt Nam Cheăm Ia  Hiao. Tơnêi a krĭng troăng kân ƀă tơrêm met mơgăn kơnâ châ hrĭng rơtuh liăn châ pôa pleăng ăm tơdroăng tơkêa bro vâ po rơdâ troăng prôk la ôh tá pá mơdoh mơdon:

“Pơtối rak vế dêi Kăn hnê ngăn Măt trâ̆n, cho ngế pơkuâ xiâm tung tơdroăng cheăng hnê mơhnhôk kuăn pơlê pro troăng. Túa pêi kơtăn kố ôh tá xê to dêi thôn mê ối tâi tâng dêi cheăm Ia Hiao. Púi tơngah kuăn pơlê môi tuăn veăng kum, púi vâ troăng prôk rế rơdâ ƀă lĕm tâ vâ kuăn pơlê tơ’lêi hlâu tung prôk lăm”.

Troăng hơlâ ‘mâi pro troăng prôk ai hên ki rơdâ sap 3m troh 5,5m châ tơbleăng tâi tâng. Bú tung iâ khế, 52 rơpŏng kuăn pơlê hiăng pleăng vâ chê 4.500m2 tơnêi, tah lối 1.200m kơnâng B40, tơdrêng ƀă hên loăng plâi kâ, kơdroăng ro, hnôu ‘măn tơmeăm, ƀă tâi tâng kơnâ châ rơtal liăn. Kơnôm môi tuăn dêi rơpó, 4 to troăng prôk ƀă troăng cho mơ’no têa châ pro xŏn lối vâ chê 2,5km, kô châ mơjiâng pro tro tơdroăng, tah tíu têa lu, tíu  ôh ta krúa, ki hmâ pro pá ăm kuăn pơlê tung hên hơnăm hdrối.

Kuăn pơlê Ia Hiao tơdah troăng hơlâ mê ing tuăn vâ, tuăn chân khên tơnôu ƀă ‘nâi dêi hnoăng tơná thế pêi pro. Pôa Kpah Nghing, thôn Sômalơng A, tối:

“Mâu kăn, Tơnêi têa pro troăng a phiu ro khât ‘nâng, xua troăng nôkố kŭn, xo ah hmôi kuăn mơngế rế kơdrâm, hên kô ôh tá xâo prôk. Má péa nếo, cho tơdroăng rơxế xuân thế ví, tơloh dêi pó. Xua mê tơdroăng Tơnêi têa po rơdâ troăng tro tiô pơkâ kuăn pơlê ki vâ pleăng dêi tơnêi”.

A thôn Bình Long, pôa Nguyễn Văn Nhân xuân vâ môi tuăn pêi pro.

“Thế mơnhông thôn pơlê nếo po troăng prôk ăm kân rơdâ mê ngin vâ môi tuăn. Nôkố po rơdâ troăng prôk thế pro ti lâi, pro hlâu ăm kuăn pơlê po rơdâ troăng cho mơ’no têa má péa cho kơnâng po tro nhên ăm kuăn pơlê ngin á vâ môi tuăn”.

“Tơkŭm mơhnhôk kuăn pơlê pleăng dêi tơnêi, po rơdâ mâu troăng kân vâ prôk” cho môi tung 5 tơdroăng ki tơbrê châ Đảng ƀô̆ cheăm Ia Hiao tối a hâi Hôp kân rôh má 1. Kố cho tơdroăng cheăng mơjiâng pro tơtro ƀă tơdroăng a cheăm, kong pơlê, pro xiâm vâ râ ủi, mâu kăn ƀă khu grup pơ’lêh chiâng tơdroăng pêi pro plâ hneăng.  Tung mê, Khu ngăn vâi kơdrâi cheăm châ pơcháu hnoăng cheăng pêi pơkuâ tơdroăng hnê mơhnhôk - môi pâ tơdroăng cheăng ki pá la kal thế rơkê ƀĕng ƀeăn, hlối kâi chân tuăn. Jâ Trần Thị Minh Hiền, Kăn hnê ngăn Khu vâi kơdrâi cheăm Ia Hiao, ăm ‘nâi:

“Khu ngăn vâi kơdrâi cheăm hiăng hên rôh lăm pôu tơrêm rơpŏng hngêi, trâm mâ tơrêm ngế kuăn pơlê vâ mơhnhôk hnê tối ăm kuăn pơlê ‘nâi troăng hơlâ vâ pro troăng ƀă chiâ troăng cho mơ’no têa hbrông. Tối nhên ăm kuăn pơlê hlê mê cho po rơdâ troăng prôk ƀă chiâ troăng cho mơ’no têa hbrông ôh tá xê to ‘mâi pro lĕm ngiâ méa thôn pơlê ƀă mơjiâng thôn pơlê nếo mê ối pro hlâu ăm kuăn pơlê vâ rêh ối, hlối tơ’lêi tung prôk lăm, kơdroh tơdroăng troh rơnó mêi têa lân lu lơ chiâng lu troăng xua ôh tá ai troăng têa hbrông hiu”.

Rôh Hôp kân xuân tối nhên troăng vâ pêi: Đảng ƀô̆ krúa lĕm, mâu kăn pêi cheăng tơdrăng - hriăn pêi ki nếo - pêi pro, măt trâ̆n ƀă mâu khu tơrŭm cheăng kal kí - pơlê pơla cho xiâm pê ki vâ môi tuăn tâi tâng kuăn pơlê. Tơrêm khu tơrŭm cheăng châ pơcháu tơdroăng cheăng pêi, tối tơdroăng ki pá ăm mâu kăn ‘nâi, pro chiâng tơdroăng ki hmâ pêi rơkê ƀeăn, ai hnoăng cheăng pêi hlối môi tuăn. Laga, xơpá xuân ối. Pôa Bùi Hữu Tâm, Phŏ Hnê ngăn Đảng ủy cheăm Ia Hiao, tối nhên:

“Khu pơkuâ cheăng hiăng tối nhên mâu tơdroăng xơpá tung pêi pro, pơla pêi pro a tơdroăng xo liăn ngân bú ai hâi khế pê klêi troh lơ 31 khế 12 hơnăm 2025 mê tung pơla pêi thế pêi hên troăng hơlâ rơkê. Tung pơla tơbleăng, klêi tăng ‘nâi mâu tơdroăng mê hlo kuăn pơlê vâ môi tuăn po rơdâ ƀă mơdêk râ? Klêi mê ai ngế ki ‘nâi tơmiât vâ pleăng tơnêi, tơmeăm vâ pro ôh tá kal chêl thiăn”.

Ing mâu troăng prôk dế po rơdâ, mâu troăng dế pro... cho vâ mơhno ăm hlo nhên tơdroăng ki môi tuăn “Kuăn pơlê ‘nâi, kuăn pơlê tơpui, kuăn pơlê pêi, kuăn pơlê xúa”. Drêng troăng hơlâ ki kân châ mơnhên ƀă cheăng pêi ai pơxúa khât, ƀă tơdroăng djâ troăng ahdrối dêi kăn ƀô̆, vâ môi tuăn dêi kuăn pơlê kô chiâng ivá rơdêi tung tơdroăng rêh ối. Mê cho drêng tơdroăng pơkâ dêi Đảng châ xúa tung rêh ối, pro xiâm vâ pơ’lêh tơrêm kơpong kuăn pơlê.