VOV4.Xơ Đăng - Tung pơla achê kố, ƀă tơdroăng tơbrê tung kơvâ xua kŏng ngê̆ thong tin, pơ’lêh kơxô̆ vâ pơtối rak vế, rak  tơmeăm khoăng, vêa vong cho túa pêi ki mâu kơ koan tơnêi têa ƀă khu tơrŭm cheăng krê dêi kuăn pơlê hâk vâ rak mâu tơdroăng ki kơnía ton nah ai xúa. Mơjiâng tíu chêh ‘măn tơchoâm tung kơvâ mơhno túa lĕm tro xuân cho môi tung mâu tơdroăng pơkâ châ pêi pro troh drêng tối tơbleăng Tơdroăng tơkêa kơxô̆ 6 “Pơtối rak vế, pơtối rak ki pơxúa mơhno lĕm tro ton nah dêi mâu hdroâng kuăn ngo rơtế ƀă mơnhông ôm hyô, dêi tơdroăng pơkâ dêi tơnêi têa ‘na mơnhông cheăng kâ rêh ối kơpong hdroâng kuăn ngo.

Kong pơlê Thái Nguyên châ ‘nâi cho xiâm trâm tê mơdró hriâm cheăng kâ rêh ối pơlê pơla pơla kơpong kong ngo ƀă kơpong tơbăng peăng Kơnhŏng tơnêi têa, ƀă ai troh 46 hdroâng kuăn ngo nhŏng o rơtế rêh ối. Môi tiah ƀă tơdroăng, Thái Nguyên xuân xúa hên tơmeăm khoăng mơhno túa lĕm tro ton nah ki kơnía  ƀă hên túa.

A tíu mơđah tơbleăng um tơmeăm kong pơlê Thái Nguyên, pơla kố, mâu troăng  cheăng ƀă kơmăi kơmok pơrá phá dêi pó môi tiah tơmeăm rơnuâ pro 3D, kơxô̆ ki pơ’lêh chêh ‘măn tung kơmăi mâu tơmeăm dế chôa pơ’lêh túa rak ngăn ki ton nah, ƀă lối 32.000 tơmeăm châ ‘măn rak akố. Jâ Lương Thị Duyên, kăn phŏ pơkuâ Tíu mơđah tơbleăng tơmeăm ăm ‘nâi:

“Ngin hlê tiah kố, kố cho tơdroăng pêi ki kal khât, gá kum ăm Tíu mơđah tơbleăng um tơmeăm  châ mơhno tơbleăng ăm mâu ngế ki troh lăm ngăn vâ tí tăng ‘nâi ƀă nôkố tíu mơđah tơbleăng kố dế ối ’măn rak . Ƀă xuân kum pro tơ’lêi tung tơdroăng vâ tí tăng, séa ngăn vâ ‘nâi mâu tơdroăng, tơbleăng ăm hên ngế kuăn pơlê ‘nâi”.

Tiô mâu ngế rơkê ‘na tơdroăng cheăng mê, tơdroăng xúa kŏng ngê̆ ki nếo tơtro khât ƀă tơdroăng cheăng pơtối rak vế, pơtối rak ki kơnía dêi tơmeăm khoăng. Drêng pơ’lêh kơxô̆, kơmăi kô ăm phêp xo ‘mot idrâp dêi um, malối idrâp mơ’no ƀă loa ƀă um mơhno tŭm 3 tơdroăng hlo hmâng hleăng lĕm, tơ’mot mơngế vâ ngăn. Tơ’nôm amê ai mâu tơmeăm khoăng tá mâu tơmeăm ki hlo ƀă mâ, ƀă ôh tá hlo ƀă mâ  ki pơ’lêh kơxô̆ kô châ tơbleăng rĕng ing măng Internet, ôh tá êa pơkâ hâi khế, tíu nâl tơpui. Ƀă Thái Nguyên,  pơ’lêh kơxô̆  tơmeăm khoăng nếo bú mơdêk tung achê pơla kố. Malối cho ing klêi Khu kăn Đảng bộ kong pơlê kơxô̆ 01 ‘na pơ’lêh kơxô̆. Tiô nâ Nguyễn Thị Trang, Ngế pơkuâ ƀơrô mơhno túa lĕm tro tơring Phú Bình, kong pơlê Thái Nguyên, ƀă mâu tơdroăng ki vâ môi tiah ai hên mâu tơmeăm khoăng ton nah, dế ai nôkố, mơdêk xúa kŏng ngê̆ kơxô̆ dế châ rêm râ kơvâ cheăng, kong pơlê, tíu pêi cheăng vâ pêi pro.

“Tung tơdroăng pơ’lêh kơxô̆ ki tơdjâk troh mơhno túa lĕm tro, mê Vi ƀan tơring xuân tối cho tơkŭm pơ’lêh kơxô̆ tung tơdroăng ‘na tíu tơbâ ƀă kô pêi ahdrối pơ’lêh kơxô̆ ăm tíu tơbâ râ tơnêi têa vâ kuăn pơlê ƀă kong pơlê ƀă mâu tơmối ƀă vâi pú tung tơnêi têa, lâp plâi tơnêi xuân ‘nâi.

Nôkố tung kong pơlê Thái Nguyên ai lối 800 tíu tơbâ, tíu ki lĕm lối 500 tơmeăm ki kơnía git na tơmeăm khoăng, tung mê ai 17 tơmeăm khoăng dêi hdroâng kuăn ngo châ mơnhên cho tơmeăm khoăng ki kơnía git dêi tơnêi têa, tơdrêng ƀă rơpâu tơmeăm ki dế ‘măn rak a tíu mơđah tơbleăng um tơmeăm kong pơlê. Vâ mơdêk ki tơ-ƀrê tung tơdroăng cheăng rak ngăn ƀă tơbleăng kơvâ mơhno túa lĕm tro, tơ’noăng ivá ƀă ôm hyô xuân pơkâ troăng rơhlâ nhên vâ rĕng pê klêi tơdroăng cheăng xúa kŏng ngê̆  kơxô̆, veăng pơtối rak vế, pơtối rak ki pơxúa tơmeăm khoăng mơhno túa lê̆m tro tung kong pơlê.

Nôkố, kuăn pơlê 53 hdroâng kuăn ngo dế ai lối 14 rơtuh ngế kuăn pơlê, rêh ối a lối 52 to kong pơlê, tơkŭm a mâu kơpong ki ối xơpá, kơpong mơ’nui lui dêi tơnêi têa. Ki khât gá ăm hlo, tơdroăng chêh ‘măn tung kơmăi pơ’lêh kơxô̆ ‘na túa lĕm tro hdroâng kuăn ngo ôh tá xê to kum mơdêk ki tơƀrê tung tơdroăng rak ngăn tơmeăm khoăng ki lĕm tro, mê ối cho tơmeăm ki vâ mơhno ki kơnía ton nah tung tơdroăng xúa kơmăi kơmok.

Pôa  Hà Việt Quân, Ngế pơkuâ ƀơrô xing xoăng tơdroăng cheăng tiô tơdroăng Pơkâ dêi tơnêi têa ‘na mơnhông cheăng kâ rêh ối kơpong hdroâng kuăn ngo ƀă kong ngo ăm ‘nâi, tơdroăng tơkêa bro kơxô̆ 6 ai 19 tơdroăng ƀă tâi tâng kơxô̆ liăn dâng 5.900 rơtal liăn. Tơkéa vâ tối kô cho rôh apoăng ai môi tơdroăng tơkêa bro ki kân tiah mê ‘măn ăm kơvâ cheăng mơhno túa lĕm tro hdroâng kuăn ngo. Mâu tơdroăng cheăng pêi cho mơdêk tơdroăng vâ xúa ‘na rêh ối tuăn ngôa, pơtối rak vế ƀă pơtối pêi pro túa lĕm tro, tiah mê nếo châ mơjiâng, hnê tung hngêi trung, tơkŭm po mâu rôh mơdĭng, ƀă malối cho pơ’lêh kơxô̆ tơmeăm khoăng.

“Tơdroăng hơ’muăn ‘na pơ’lêh kơxô̆ mâu tơmeăm khoăng kơnía ton nah ‘na mơhno túa lĕm tro mê Ngế xiâm hnê ngăn dêi ngin hiăng hnê mơhno ‘na tơdroăng ti tăng ‘nâi plĕng  ‘na tơdroăng pơ’lêh kơxô̆ ƀă pơ’lêh nếo kơxô̆ chêh ‘măn mâu tơdroăng vâ tơbleăng pêi ‘na tơdroăng tí tăng pêi tơdroăng pơkâ dêi tơnêi têa. Pakĭng mê, Ngế pro xiâm xuân hiăng hnê mơhno thế tí tăng ‘nâi plĕng, tơrŭm ƀă  Khu xiâm ngăn Mơhno túa lĕm tro, mâu khu xiâm, kơvâ cheăng tơdjâk troh ƀă malối cho mâu kong pơlê, mâu kuăn pơlê mâu hdroâng kuăn ngo mơjiâng môi tơdroăng tíu mơhno tơbleăng kơxô̆, vâ pơtối rak vế xuân môi tiah tơbleăng ki kơnía ‘na túa lĕm tro dêi hdroâng kuăn ngo. Ƀă ai tíu mơđah tơbleăng tơdroăng chêh ‘măn tối tơchoâm ‘na mơhno túa lĕm tro tối krê ‘na túa lĕm tro cheăng kâ pơlê pơla, pêi pro ăm tơdroăng mơnhông mơdêk ki pơxúa ‘na tuăn ngôa xuân môi tiah tơbleăng ăm tơdroăng pơkâ mơhông cheăng kâ rêh ối pơlê pơla ing mâu tơdroăng ôm hyô./.

Gương tơplôu ƀă tơbleăng