VOV4.Xơ Đăng - Tiô mơnhên dêi Khu pơkuâ mơhno túa lĕm tro, Tơ’noăng ivá ƀă ôm hyô kong pơlê Đồng Tháp, pakĭng mâu kong pơlê dế mơnhông mơdêk hôm păng ‘nâng ‘na ôm hyô ƀă hên tơdroăng ôm hyô a hên tíu, tung mê ai mâu tơring kơpong tơkăng kong dêi kong pơlê xuân tá hâi xúa tâi tơmeăm khoăng ki ai, ki rơdêi tung kơvâ kố. Vâ thăm mơnhông ƀă pro tơ’lêi hlâu, vâ ôm hyô kơpong tơkăng kong xông hơngế tung la ngiâ, Khu pơkuâ Mơhno túa lĕm tro Tơ’noăng ivá ƀă ôm hyô kong pơlê hiăng tơrŭm ƀă tơring Hồng Ngự tơkŭm séa ngăn, tơdrêng amê pêi pro Pơkâ dêi Hô̆i đong kong pơlê, pơkâ ‘na troăng hơlâ tŏng kum mơnhông mơdêk ôm hyô tung kong pơlê Đồng Tháp troh mâu ngế krê, tíu cheăng dế mơjiâng mâu troăng pêi ôm hyô.

Famstay ‘’Klôh têa Hngêi’’ dêi nâ Tô Kim Thi ối a tơring Tân Hồng achê kố châ hên tơmối ‘nâi cho môi tíu ôm hyô nếo, ro tơniâ a kơpong tơkăng dêi kong pơlê Đồng Tháp.

Nôkố famstay ‘’Klôh têa Hngêi’’ ai péa kơbong châ mơjiâng pro tiô troăng ki lĕm ƀă kong prâi, tiô loăng cho ki xiâm, tung dế rôe tŭm tơmeăm xúa dêi môi kơbong vâ ối. Ki rơhêng vâ tối, pro tơmối hâk vâ má môi drêng troh akố cho tíu kân rơdâ phuâng lĕm ai pêt kơchâi drêh klôh păn ká ƀă mâu tơmeăm ki pro mơnâ mâ ngăn phá tơ-ê:

‘’Ki má môi tơmeăm dêi á akố ai môi hngêi ki đông pêng têa, kố cho môi tơdroăng ki phá tơ-ê dêi môi ngế kuăn pơlê rêh ối kơpong têa kroăng, hdrối nah rơpŏng á xuân hiăng rêh ối pêng têa kroăng tung hngêi đông pêng têa môi tiah kố mê á xuân vâ troh Klôh têa hngêi kố mê pó kô châ tâ môi hâi rêh ối tung hngêi đông pêng têa môi tiah lâi, tâi tâng mê á ‘măn tŭm tơmeăm xúa tung mê’’.

Xua ƀăng têa kân rơdâ xua mê teăng ki ối a hngêi ki đông pêng têa kroăng, nôkố, tơmối kô tâ tơdroăng rêh ối a kơpong têa kroăng kơnhŏng têa Đồng Tháp a Klôh têa hngêi kố. Pakĭng klôh păn ká ối ai klôh têa pêt reăng sen ƀă nâ Tô Kim Thi tối ăm ‘nâi dế pêt tơ’nôm kơdrum loăng plâi kâ xuân môi tiah mơjiâng pro, kêi đeăng tíu ối, tơdroăng vâ mơnúa châ tâ châ hlo, tê tơmeăm ôu kâ ăm tơmối drêng hiăng lôu péa khât ah.

‘’Ki vâ cho pú hmâ troh mê kô ăm kuăn ‘nĕng vâi châ tâ châ hlo tơdroăng pêt kơchâi drêh, vâi mơnúa pêt kơchâi drêh krúa lĕm, kô chiâng chêh hâi khế pêt vâ ai tơdroăng ki vâ vêh lăm pôu á môi xôh nếo, klêi mê kô chiâng vâ mơnúa châ tâ châ hlo kê reăng sen peăng mê, vo plong, kê sen, pê peăm, kât kuăn, akố hiăng lối 10 hơnăm ká akố rêh xêh tung têa tiah mê cho hên’’.

Famstay Klôh têa hngêi bu cho môi tung hên tíu troh a kơpong tơkăng kong Đồng Tháp. Achê tơring Tân Hồng, tơring Hồng Ngự ai 6 tíu châ rah xo vâ pơkâ troăng prôk la ngiâ tơdjêp mơnhông mơdêk ôm hyô, mê cho: pơlê ki ai plong, kơpong pêt kơchâi drêh tơniăn lĕm a cheăm Long Thuận, mâu toăng hngêi ton nah lối hrĭng hơnăm, Đình Long Khánh châ ối tung tơmeăm râ tơnêi têa, pơlê teăn rơneăm hmân ếo tiô khôi vâi krâ nah ƀă tíu têa hum kân rơdâ a cheăm Long Khánh A.

Mơhé tá hâi mơnhên khât cho tíu troh lăm ngăn ôm hyô dêi kong pơlê laga tung pơla kố nah, hên tơmối tung tơnêi têa ƀă kong têa ê hiăng rah tíu kố cho tíu troh tung troăng prôk ôm hyô dêi tơná. Xua mê, khu râ kăn pơkuâ tơring xuân hiăng pêi pro tơdroăng pơkuâ a mâu tíu troh, tơdrêng amê chôa ‘lâng mơjiâng um méa ôm hyô dêi tơring. Pôa Nguyễn Đức Trí, Kăn pơkuâ ƀơrô mơhno túa lĕm tro tơring Hồng Ngự, kong pơlê Đồng Tháp tối ăm ‘nâi:

‘’Viƀan tơring ai hnê mơhno mâu khu râ kơvâ cheăng, tung mê ai kơvâ mơhno túa lĕm tro ƀă Vi ƀan cheăm Long Khánh A pêi tơtro tơdroăng má môi cho tơniăn pơlê pơla, má péa nếo, ‘na mơgrúa lĕm kong prâi. Má pái, ‘na tĕm yă liăn ngân a mâu kơpong ôm hyô’’.

Pakĭng tơdroăng hnê mơhno tơ’nôm mâu pơkâ tung tơdroăng pơkuâ tơdroăng cheăng ăm tơring, Khu pơkuâ ‘na mơhno túa lĕm tro Tơ’noăng ivá ƀă Ôm hyô xuân hiăng pêi pro mâu troăng hơlâ tŏng kum ‘na mơnhông mơdêk ôm hyô tung kong pơlê, tiô Pơkâ kơxô̆ 210 dêi Hô̆i đong kong pơlê. Ki nhên, kô tŏng kum mơ’no liăn cheăng mơjiâng hngêi ăm tơmối kâ koi ối pơtê, tŏng kum liăn rơkâ ki mung mơ’no mơnhông tơdroăng ôm hyô pơlê pơla ƀă khu tơkŭm po, ngế krê tiô pơkâ  a Pơkâ kố. Tiô pôa Ngô Quang Tuyên, Kăn phŏ pơkuâ Khu pơkuâ ‘na mơhno túa lĕm tro ƀă ôm hyô kong pơlê Đồng Tháp:

‘’Klêi kơ’nâi séa ngăn kố mê pin kô rơtế dêi pó ‘nân vâ mơnhên ăm gá tro ƀă tơmeăm ki ai hlâu. Má péa, pin kô mơjiâng tơmeăm ki mê cho tŏng kum mâu rơpŏng ƀă mâu tơring vâ mơjiâng mâu tơmeăm ôm hyô ki phá tơ-ê, ing tơmeăm ki rơdêi dêi rêm tơring, pin kô kum hnê mơhno vâ kô mơnhông mơdêk ôm hyô vâ pơxiâm tăng cheăng pêi, vâ pêi ôm hyô tíu kố, pro ti lâi ăm gá châ tơƀrê’’.

Rơtế ƀă mâu tơdroăng ki tơ’lêi hlâu ƀă tơdroăng ki ai hlâu ing kong kế, tơ’nôm amê cho mâu troăng hơlâ tŏng kum ki nhên kô cho tơdroăng ki tơ’lêi hlâu vâ kuăn pơlê ƀă mâu khu mơ’no liăn cheăng po rơdâ, mơdêk tâ mê nếo tơdroăng ki hôm mâu tơdroăng cheăng pêi mơdró, kum ăm ôm hyô a tơring Hồng Ngự tối krê ƀă mâu tơring a kơpong tơkăng kong dêi Đồng Tháp tối tơdjuôm cho khât xông rơdêi  păng ‘nâng tung la ngiâ’’.

VOV4 chêh

A Sa Ly tơplôu ƀă tơbleăng