Dom bhum palei di tinh Binh Duong padang ngak sang bahrau sumu gauk ka urang kathaot saong urang raidiuk kan kandah, dalam Danak dak brei oh daok baoh sang taik tahak. Urak ini, tinh Binh Duong daok labaih 455 baoh sang urang kan kandah daok khin hu bruk daong padang bahrau atau pasiam veik sang daok. Langiu di padang sang ka rahra dalam tinh, Binh Duong daok hu jao bruk daong dua tinh Nghe An saong Bac Lieu ngak danak dak brei oh daok boh sang taik tahak haong taong abih jien buh tame ngak lac 90 ty dong.

Ban raya HCM kuhria buh tame 781 ti dong piah padang ngak tatua Rạch Dơi birau angaok jalan Lê Văn Lương, pambuak huyen Nhà Bè haong huyện Cần Giuộc, tỉnh Long An di puac thun ini. Ini lac sa dalam dom danak dak anak tal hu Ban raya HCM buh jien tame ngak dahlau piah pambuak haong tinh Long An. Tui bruk ba tabiak, tatua Rạch Dơi atah labaih 452 m,  praong 15m. Gam haong tatua Rạch Dơi, Mban jalan mbak  Ban raya HCM jeng kuhria padang ngak tatua Rạch Tôm di jalan Lê Văn Lương dalam thun ini.

Urak ini, tinh Tra Vinh hu 4 sang mac ndien apui saong 5 sang mac ndien angin, ndien ia harei hu ngak bruk haong taong abih cong suat 4.820MW. Tukvak 2026-2030, Tra Vinh hu mbaoh tangin brei ngak veik 5 danak dak tra, dalam nan hu ndien ia harei pagam di pabung sang, ndien hareik harom saong ndien sinh khoi, tagok taong abih cong suat 288MW. Dom danak dak ini daong ka Tra Vinh paglaong kein lagaih patagok gah nang luong tai tao, nang luong hacih sa-at, lac labik pasak ngak tabiak nang luong tai tao di dalam taneh ia saong mek hu bruk patakik tathuak nerak ròng bằng 0 dalam thun 2050.

Akaok UB bhap bini tinh Ca Mau hu payua harak samar chip tal dom jabat chuyen mon, iew brei samar pasang iek, pasiam veik bruk arieng metai ralo di tinh ini. Di dom xã dalam huyen Năm Căn hu arieng metai. Meng akaok thun tal ini, dalam tỉnh Cà Mau hu labaih 1.500 ha arieng metai. Arieng ruak mboh nyu radei radei, sambo mau bleit, ta-da arieng ndik nyei, nerak… 

Dom tinh gah Meraong negar daok yam tame tabung glaong bilan pandiak thu lagu. Dalam dom harei anak tal meda hu rah tabiak pandiak 35 - 36 do C. Tui Pasak kuhria khan brei thau langik tasik negar, pandiak bhang praong meda rah tabiak di bhum Tay Nguyen saong Meraong negar meng bilan 4 anak tal. Dut haong kuhria rah tapa di rilo thun, pandiak bhang rah tabiak suai jang saong dom harei pandiak takik jang dut haong tukvak ini thun 2024, nan thu lagu saong njom ia mbak takik kanjah jhak. Taphia nan, meda mbuan rah tabiak dom mbang hajan karei bilan pagam tui rabuk jakala, caga hajan oh yau bhian di dom labik.

Dom mbang apui khuah glai rah tabiak meng harei 21/3 meng blaoh di dom labik dalam negar Han Quoc daok tah tabiak. Mbiah tal ini, hu 18 urang metai, 19 urang njauk rambuac. Apui khuah mbang 17 ribau ha glai, ba tal labaih 26.000 bhap bini brei panduan ba nao daok di dom labik hu salamat. Di labik apui khuah glai, hu mbaok jaik 5.000 urang, yaok rituh sruh kapal ahaok  saong yaok ratuh  radaih  padam apui. Quyen Tong thong Han Quoc  Han Duck-soo sanya brei ba abih prein khang di manuac urang, mac moc radaih ndap nda piah padam apui khuah glai.

Rajaei Trung Quoc bahrau ba tabiak dom jalan bahrau piah brei kein lagaih jang ka urang dam dara dalam bruk tut angan tame harak khin tok gauk. Tui nan mbaoh tangin brei ka dom meyut meyau tut angan tame harak khin tok gauk di labik dom urang nan daok diukrai, salih ka bruk gilac mai sang piah tut angan di jabat karja palei yau dahlau daih. Taphia, Trung Quoc jeng jhul khang bruk yah klak dom adat lakhah caga palai jien yau ndok pandap alin lakhah glaong, tagok jien piah brei khin tok anek bik drei atau padang harei lakhah praong prang palai jien.

Ngoai truong Nga Sergei Lavrov khan lac Sarak daong brei salamat jalan tasik Bien Den  lac bruk lagaih  piah ba Nga gilac veik  mai haong darak pasar ngu coc saong khak drak, tapa nan duah hu jien laba saong  rik tame bruk khik brei ginup padai brah pandap mbang di dunya. Panuac meyai yau nan  hu ba tabiak hadei tuk My ngak hu siam dom jalan langyah  karei di Ucraina saong Nga ka bruk padeih  mesruh metak di tasik Bien Den, jeng brei padeih dom mbang mesruh metak ka bruk nang luong.